پرەزيدەنت • 02 ءساۋىر، 2019

ەلباسى شامالعان اۋىلىندا تۇرعىندارمەن كەزدەستى

370 رەت كورسەتىلدى

قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆ الماتى وبلىسى قاراساي اۋدانىنا ارنايى ساپارمەن باردى.

نۇرسۇلتان نازارباەۆ شامالعان اۋىلىنداعى قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ «اتامەكەن» تاريحي-مادەني ورتالىعىندا جەرگىلىكتى تۇرعىندارمەن كەزدەستى. تۋعان جەرىنە ءتاۋ ەتۋگە كەلگەن ەلباسىمەن كەزدەسۋگە 3 مىڭنان استام ادام جينالدى.

- ءوزىنىڭ تۋعان اۋىلىن جاقسى كورمەگەن ادام وتانىن سۇيە المايدى. ۇلى ەلگە دەگەن ماحاببات كىشكەنتاي ەلدى مەكەندى قادىرلەۋدەن باستالادى. مەن قىرىق جىل قالادا قىزمەت ەتسەم دە تۋعان توپىراعىمدى ەسىمنەن شىعارعان ەمەسپىن. قيىن-قىستاۋ كەزەڭدە، تاۋەلسىزدىكتى ساقتاپ قالۋ ءۇشىن ءتۇرلى تاۋەكەلدى جولدان وتكەندە كىشى وتانىمنىڭ توپىراعى جانىما قۋات بەرىپ، جىگەرلەندىرىپ وتىردى. تۋعان جەردى ءسۇيۋ ارقىلى الەمگە قازاق دەگەن حالىقتىڭ بار ەكەنىن، ەل ەكەنىن تانىتىپ، ۇلى وتانىمىزدىڭ ابىرويىن اسقاقتاتتىق. 170 ەلدى ارالاپ، ەكى جۇزدەن استام باسقا ەلدىڭ پرەزيدەنتتەرىمەن كەزدەستىم. ءبىر ادام ءۇشىن بۇل وراسان باقىت. بۇگىن سىزدەردىڭ الدارىڭىزعا وسى اۋىلدىڭ توپىراعىندا وسكەن بالاداي  بولىپ كەلىپ تۇرمىن. ارينە، اۋىل وزگەرگەن، زامان وزعان. ءبىزدىڭ قيىن دا قىزىقتى بالالىق شاعىمىزدىڭ بەلگىسىن قازىر تابۋ قيىن. قۇرداستارىم دا ساۋساقپەن سانارلىق. بۇگىن مۇلدەم باسقا ۇرپاقتى كورىپ تۇرمىن. ولار باقىتتى، جاڭا زاماننىڭ وكىلدەرى. وسى ۇرپاعىمىزدىڭ دامىعان ەلدە تۇرۋ ءۇشىن از ەڭبەكتەنبەدىك. قازىر ەلىمىزدى الەم مويىندادى. بالالارىمىز شەتەلدە ءبىلىم الۋدا، اۋىلدا تۇرىپ وزىق تەحنولوگياعا قول جەتكىزدىك. وسىنىڭ ءبارى ەلىمىزدەگى بەيبىتشىلىكتىڭ، قازاقتىڭ بىرلىگىنىڭ ارقاسى. وسى بەرەكە-بىرلىكتى قالپىمىزبەن العا قادام باسىپ، وركەندەي بەرۋىمىز كەرەك، - دەدى نۇرسۇلتان نازارباەۆ حالىقپەن كەزدەسۋدە.

ەلباسىنىڭ كىندىك قانى تامعان اۋىلداعى «اتامەكەن» تاريحي-مادەني ورتالىعى نۇرسۇلتان نازارباەۆتىڭ مەملەكەت باسشىسى رەتىندەگى ورنەكتى ءومىر جولىنان سىر شەرتىپ قانا قويماي، تۇتاس ەلىمىزدىڭ تاۋەلسىزدىك تاريحىنان مول ماعلۇمات بەرەتىن نىسان. قازىر مۇندا كەلۋشىلەر قاتارى كوبەيگەن. 22 000 ادام قونىستانعان شامالعان كەنتىنىڭ تۇرعىندارى ءۇشىن «اتامەكەن» ورتالىعى ولكە مەن  ءوڭىر شەجىرەسىنىڭ كيەلى شاڭىراعى ىسپەتتى بولسا، سىرت وڭىردەن ارنايى كەلىپ، باس سۇعاتىن ادامدار ءۇشىن ءتاۋ ەتەر تاريحي ورىنعا اينالىپ وتىر.

ەلباسى نۇرسۇلتان نازارباەۆ قاراساي اۋدانىنا ساپارى اياسىندا  شامالعان كەنتىندە جاڭادان سالىنىپ جاتقان دەنە شىنىقتىرۋ جانە ساۋىقتىرۋ كەشەنىنىڭ قۇرىلىس بارىسىمەن تانىستى. دەنە شىنىقتىرۋ-ساۋىقتىرۋ كەشەنىنىڭ اۋماعى 7300 شارشى مەتر ەكەن. نىسان 6 بلوكتان تۇرادى. ۆولەيبول، باسكەتبول، گاندبول جانە مينيفۋتبولعا ارنالعان امبەباپ زالدا جارىس تاماشالاۋ ءۇشىن 300 ورىندىق جەكە تريبۋنا بولادى. شىعىس جەكپە-جەگى، بوكس، كۇرەس سياقتى سپورت تۇرلەرىنە ارنالعان جاتتىعۋ زالىنا جاپسارلاس 160 ادامدىق كورەرمەن زالى بولەك سالىنۋدا. ءجۇزۋ باسسەينىنە دە سۇرانىس كوپ بولاتىن ءتۇرى بار. بۇل كەشەن ءبىر مەزگىلدە 300 ادامنىڭ سپورتپەن شۇعىلدانۋىنا مۇمكىندىك بەرمەك. ايتپاقشى، بۇقارالىق سپورتتى دامىتۋعا ارنالعان كەشەننىڭ قۇرىلىسى ەلباسىنىڭ تىكەلەي قولداۋىمەن جانە ونىڭ جەكە قاراجاتىنا سالىنۋدا.

ەلباسى نۇرسۇلتان نازارباەۆ شامالعان اۋىلىندا بىرگە وقىعان سىنىپتاستارىمەن جانە بالا كەزدەگى دوستارىمەن كەزدەسىپ، اڭگىمەلەستى. اڭگىمەلەسۋ بارىسىندا ەجەلگى دوستار وزدەرىنىڭ ەستەلىكتەرىن ءبولىسىپ، ءوڭىردىڭ قازىرگى دامۋ جاعدايىن تالقىلادى.

سوڭعى جاڭالىقتار

ۇقساس جاڭالىقتار