وسى ورايدا وتكەن جىلى اقتوبە وبلىسىندا «اۋىل قامقورشىسى» اتتى بىرەگەي جوبانى جۇزەگە اسىرۋ قولعا الىنعان بولاتىن. سول كەزدە «اتامەكەن» ۇلتتىق كاسىپكەرلەر پالاتاسىنىڭ وڭىردەگى بولىمشەسى باستاماشى بولعان جوباعا اقتوبە وبلىستىق اكىمدىگى دە اجەپتاۋىر قولداۋ كورسەتكەنى ۇمىتلا قويعان جوق. ساتىمەن باستالعان ىلكىمدى ءىستىڭ العاشقى ناتيجەلەرى دە كوڭىلگە قونعانداي ەدى. بۇعان وتكەن جىلى وڭىردەگى شاعىن جانە ءىرى دەڭگەيدەگى بيزنەس وكىلدەرى 2 ميلليارد تەڭگەدەن استام قاراجات جۇمساعانى تولىق دالەل.
سونداي-اق قازىرگى قولىمىزدا بار دەرەكتەر «اۋىل قامقورشىسى» جوباسىن ودان ءارى جالعاستىرۋ ءۇشىن بيىل وبلىس اۋماعىنداعى 199 ەلدى-مەكەندە 344 جوبانى ىسكە قوسۋ جوسپارلانعانىن كورسەتەدى. وسى دەرەكتەرگە اۋىلعا قارجىلاي قولداۋ كورسەتەىن بيزنەس وكىلدەرى مەن مەتسەناتتاردىڭ جالپى سانى دا كورسەتىلگەن. ناقتى ايتقاندا ولاردىڭ قاتارى 289 ادام بولىپ وتىر. ياعني اۋىل قامقورشىلارىنىڭ وسىناۋ ۇلكەن توبى بيىلعى جىلى وبلىستىڭ ەلدى-مەكندەرىندە قۇنى 2 ميلليارد 600 ميلليون تەنگەگە تەڭ الەۋمەتتىك-تۇرمىستىق باعىتتاعى نىسانداردى پايدالانۋعا بەرۋى كوزدەلگەن. مىنە, تۋعان اي تۋراعان ەتپەن بىردەي دەگەندەي بيىلعى 2019 جىلدىڭ الاشقى توقسانى دا ارتتا قالىپ, كۇنتىزبەمىزگە ءساۋىر ايى دا كەلىپ ورنىقتى. وسىندايدا بۇگىنگى ناقتى ءىستىڭ جاي-كۇيى قانداي دەگەن ساۋال ەرىكسىز تۋىندايدى. ءبىز كوكەيدەگى وي-پىكىرىمىزدى «اتامەكەن» ۇلتتىق كاسىپكەرلەر پالاتاسى اقتوبە وبلىستىق بولىمشەسىنىڭ ءتورايىمى انار دارجانوۆاعا جەتكىزگەن ەدىك. ول قاپەلىمدە «اۋىل قامقورشىسى» جوباسىنا قاتىستى نە دەپ جاۋاپ قايتارارىن بىلمەي, ءسال توسىلىپ قالدى دا, سودان سوڭ پالاتا بولىمشەسىنىڭ ءبىر وتىرىسىندا بۇل ماسەلە قارالعانىن ايتىپ بەردى. ايتسە دە, اتامەكەندىكتەردىڭ سول باسقوسۋىندا ناقتى قانداي شەشىم الىنعانى دا ءتورايىم تاراپىنان ايتىلماي قالدى. جوعارىدا ايتىلعانداي اۋىلعا قامقورلىق كورسەتۋدى كوزدەگەن 289 بيزەس وكىلى قايدا ءجۇر؟ سانامىزعا قوناقتاعان ساۋالدىڭ ءبىر توركىنى وسىنداي بولدى. ءسويتىپ, ا.دارجانوۆامەن بىرگە ولاردىڭ دەرەكتەرىن بىلۋگە تالپىنىس جاساعانىمىزبەن, بۇل ارەكەتىمىز دە ءتيىستى ناتيجە بەرە قويمادى. ارادا تاعى دا بىرنەشە كۇندەر مەن اپتالار ءوتتى. وسى ۋاقىتتىڭ ارالىعىندا «اتامەكەننىڭ» ايماقتاعى باس وكىلىنە قايتا-قايتا ساۋال سالۋمەن بولدىق. ايتەۋىر ءبىر كۇنى ول تەمىر اۋدانىندا ءومىرباي جايلىشەۆ دەگەن ەل ازاماتى 150 ورىندىق بالالار باقشاسىن سالۋعا بەل بۋعانىن ايتىپ بەردى. انار جارجانوۆانىڭ ءجون سىلتەۋى بويىنشا ونى تەمىر اۋدانى اكىمىنىڭ ورىنباسارى مارات مۇڭايتپاسوۆ ارقىلى تاۋىپ الىپ, باستاعان قادامىنا ءسات-ساپار تىلەدىك.
الايدا ءو.جايلىشەۆتىڭ مالىمدەۋىنشە وعان بالالار باقشاسى عيماراتىن تۇرعىزۋ ءۇشىن بولىنگەن جەر اۋماعى تارلىق ەتەدى ەكەن. سوندىقتان ول بۇل ماسەلە تۇبەگەيلى شەشىمىن تاپتى دەپ ايتۋعا بولمايتىنىن جەتكىزدى. بۇعان جەر ماماندارى مەن ساۋلەتشىنىڭ تۇبەگەيلى شەشىمى كەرەك ەكەن. ونىڭ ۇستىنە ءدال وسى جەر تەلىمى تۇسىنان «قازاقتەلەكومنىڭ» جەراستى بايلانىس جەلىلەرى وتەتىن كورىنەدى. مەن ءۇشىن مۇنىڭ ءوزى دە كادىمگىدەي قولايسىزدىق كەلتىرپ تۇر دەيدى ءومىرباي جايلىشەۆ.
ايتسە دە وسى ارادا «اۋىل قامقورشىسى» جوباسىنا وراي وڭ مىسال ايتۋدىڭ دا ورايى كەلىپ تۇرعانداي. ياعني قازىرگى كەزدە وڭىرگە بەلگىلى كاسىپكەر, «ناۋرىز-سين» جشس-نىڭ ديرەكتورى يبراگيم سارسەنباەۆ «اۋىل –ەل بەسىگى» مەن «اۋىل قامقورشىسى» الەۋمەتتىك جوبالارى شەڭبەرىندە شالعايداعى ىرعىز اۋدانىندا بالالار سپورت كەشەنىن سالۋدى قولعا الىپتى. بۇل ءۇشىن ول ءوز ەسەبىنەن 20,5 ميلليون تەڭگە قاراجات ءبولىپتى. ايتسە دە قازىرگى كۇنى مۇنداي مىسالدىردىڭ ساۋساقپەن ساناپ الارلىقتاي از ەكەنى دە ايقىن كورىنەدى.
اتالعان جوبالار جوعارىدا ايتىلعانداي اۋىلدىق اۋماقتاردى قايتادان جاڭعىرتۋعا سەپتىگىن تيگىزە الۋىمەن قۇندى. تۇتاستاي العاندا وبلىستا وتكەن جىلى قولعا الىنعان «اۋىل قامقورشىسى» جوباسىنىڭ قارقىنى باسەڭدەپ قالعانى قىنجىلتپاي قويمايدى. ەشتەن دە كەش جاقسى دەمەي مە, حالقىمىز. تۋعان جەرى الدىنداعى قارىزى مەن پارىزىن ۇمىتپاي, تۋعان توپىراعىنا جاناشىر بولا بىلەتىن ازاماتتار بۇل ىسكە تاعى دا بەت بۇرسا -«اۋىل قامقورشىسى» جوباسى قايتادان تىك تۇرىپ كەتەتىنىنە ەشقاداي كۇمان جوق.
اقتوبە
