بايقاۋدى ۇيىمداستىرۋعا «عىلىمي مەديتسينالىق قوعامى» قوعامدىق بىرلەستىگى ۇيىتقى بولىپ وتىر.
بايقاۋ بيىل 31 تامىزدا اياقتالادى. بۇرىن رەسپۋبليكا دەڭگەيىندە وتىكىزىلىپ كەلگەن شىعارماشىلىق جارىس ۇستىمىزدەگى جىلدان باستاپ حالىقارالىق دەڭگەيگە كوتەرىلدى. بيىل بايقاۋعا قاتىسۋعا باسقا ەلدەردەن دە بالالار شاقىرىلىپ, جارىستىڭ اياسى كەڭىپ كەلەدى.
بۇل باستامانىڭ ماقساتى – دەنى ساۋ بالالاردىڭ ءتۇرلى دەرتتەرگە شالدىققان زامانداستارىنا دەگەن تۇسىنىستىگى مەن شىدامدىلىعىن شىڭداۋ بولىپ تابىلادى. ويتكەنى, كەمىس كوزقاراستار ناۋقاس بالالاردىڭ الەۋمەتتىك بەلسەندىلىگى مەن ومىرگە دەگەن قۇشتارلىعىنا تۇساۋ سالاتىنى ايان.
بايقاۋ ەكى كەزەڭنەن تۇرادى. ءبىرىنشى – جازۋشىلار بايقاۋىنا قاتىسۋشىلار «ءبىر كۇنى تاڭەرتەڭ ويانىپ, مەن ءوزىمدى ەرەكشە بولعانىمدى سەزىندىم» دەگەن سويلەمنەن باستالاتىن شاعىن شىعارمانى (ەرتەگى, اڭگىمە, نوۆەللا, وسيەت اڭگىمە) كەز كەلگەن جانردا جازىپ شىعۋى ءتيىس. بيىل بايقاۋعا شەتەلدىك بالالار دا قاتىساتىندىقتان, ولار اعىلشىن, ورىس, قازاق تىلدەرىندە قالام تەربەيتىن بولادى.
قاتىسۋشىلارعا شىعارمالارىن انا تىلىندە دە جازۋعا ەرىك بەرىلگەن. بىراق بايقاۋدىڭ ءۇش ءتىلىنىڭ بىرىندە اۋدارماسى قوسا بەرىلۋى ءتيىس.
ەكىنشى كەزەڭ – سۋرەتتەر بايقاۋىندا ءبىرىنشى كەزەڭدە قازىلار القاسى ىرىكتەگەن جازۋشىلار بايقاۋىنىڭ ۇزدىك شىعارمالارىنا سۋرەت سالۋعا تاپسىرما بەرىلەدى. ەكىنشى كەزەڭنىڭ دە بارلىق تۋىندىلارىن كاسىبي قازىلار القاسى ساراپتايدى.
بايقاۋ قورىتىندىسى بويىنشا ەڭ ۇزدىك شىعارمالار مەن سۋرەتتەر كىتاپ بولىپ شىعادى. كىتاپتى ساتۋدان تۇسكەن قاراجات ونكولوگيالىق جانە باسقا دا اۋىر سىرقاتتارمەن شالدىققان بالالارعا تابىستالادى.
سونداي-اق ۇزدىك دەپ تانىلعان شىعارمالاردىڭ بىرىنە سپەكتاكل قويىلادى. بۇل سپەكتاكلدەگى رولدەردى مۇمكىندىگى شەكتەۋلى بالالار وينايدى.
بايقاۋ بارىسىندا تانىمال بالالار جازۋشىلارى مەن سۋرەتشىلەرى شاقىرىلىپ, ولار الماتى قالاسىنداعى بالالار ورتالىقتارىندا, اۋرۋحانالاردا ەمدەلىپ جاتقان بالالارعا ارت-تەراپيا رەتىندە, سونداي-اق ۆەبينار تۇرىندە ونلاين-رەجيمىندە جازۋ جانە بەينەلەۋ ونەرى بويىنشا شەبەرلىك دارىستەرىن وتكىزەدى.
ال 2018 جىلى بايقاۋعا Sanofi, قازاقستان-رەسەي مەديتسينا ۋنيۆەرسيتەتى, «درۋجنىە رەبياتا» گازەتى, «Unity» وتباسىلىق فەستيۆالى مەن الماتى قالالىق كىتاپحانالار جۇيەسى دەمەۋشىلىك تانىتىپ, قولداۋ كورسەتكەن بولاتىن. ال 2019 جىلى الماتى قالالىق بالالار كلينيكالىق اۋرۋحاناسى مەن پەدياتريا جانە بالالار حيرۋرگياسى عىلىمي-زەرتتەۋ ينستيتۋتىنىڭ ەمدەلۋشىلەرى قاتىساتىن بايقاۋعا «الماتىكىتاپ باسپاسى» دەمەۋشى بولىپ وتىر.
الماتى
