بيىل قىس جىلى بولىپ, وتكەن جىلدىڭ قاراشا ايىنىڭ سوڭىندا سەڭ ءجۇرۋ بايقالعان. وسىعان بايلانىستى دەپارتامەنت تاراپىنان ءىس-شارالار جوسپارى بەكىتىلگەن.
ياعني, سۋ تاسقىنىنىڭ الدىن الۋ باعىتىن قالىپتاستىرۋ, سۋدى وبلىس اۋماعىنداعى سىرداريا وزەنىمەن قاۋىپسىز وتكىزۋ ماقساتىندا "كازگيدرومەت" رمك جانە "قازسۋشار" رمك قىزىلوردا وبلىسى بويىنشا فيليالدارىنان وزەندەگى سۋدىڭ دەڭگەيى مەن اۋا رايى تۋرالى كۇندەلىكتى اقپاراتتار الىنىپ, سىرداريا وزەنىنە مونيتورينگ جۇمىستارى جۇرگىزىلىپ وتىر.
قىزىلوردا قالاسى مەن اۋدانداردا تاسقىن سۋ كەزەڭىندە 156 مىڭعا جۋىق ادامدى كوشىرۋگە ارنالعان 79 ەۆاكۋاتسيالىق جيناقتاۋ جانە 99 قابىلداۋ پۋنكتى دايىندىققا كەلتىرىلدى.
قالا, اۋدان اكىمدىكتەرىنىڭ مالىمەتى بويىنشا سۋ تاسقىنىنا قارسى شارالارعا ماتەريالدىق-تەحنيكالىق قور 141,8 توننا جانار-جاعار ماي, 156 000 دانا قاپ, 16 960 باۋ قامىس, 6 550 دانا پاشىن, 4 455 قارابۋرا, 287 توننا قويتاس ت.ب. قاجەتتى ماتەريالدار قورلارى جاساقتالدى.
وبلىس بويىنشا 2018-2019 ج.ج. قىسقى-كوكتەمگى سۋ تاسقىنىنا قارسى شارالارعا قاتىستىرىلاتىن كۇشتەر مەن قۇرالداردىڭ قۇرامى: 1081 ادام, 361 بىرلىك تەحنيكا, 75 سۋ سورۋ موتوپومپاسى جانە 2 تىكۇشاق بىرلىگىن قۇرادى.
ونىڭ ىشىندە قىزىلوردا وبلىسىنىڭ توتەنشە جاعدايلار دەپارتامەنتىنەن 117 جەكە قۇرام, 18 تەحنيكا, 10 ءجۇزۋ قۇرالدارى مەن موتوپومپا دايىندىققا كەلتىرىلدى.
قىزىلوردا وبلىسى.
