جاڭا شەشىم تمد ەكونوميكالىق كەڭەسىنىڭ جانىنداعى ەكونوميكالىق ماسەلەلەر جونىندەگى كوميسسيانىڭ وتىرىسىندا قابىلداندى.
تمد قاتىسۋشى مەملەكەتتەرىنىڭ سەيسميكاعا ءتوزىمدى قۇرىلىس سالاسىنداعى بازالىق ۇيىم تمد ەلدەرىندەگى عىلىمي-زەرتتەۋ ينستيتۋتتارىنىڭ ءتيىمدى ىنتىماقتاستىعى جانە تاجىريبە الماسۋى ءۇشىن بىرىڭعاي پلاتفورماعا اينالادى دەپ جوسپارلانىپ وتىر.
بازالىق ۇيىم قىزمەتىنىڭ شەڭبەرىندە تمد قاتىسۋشى مەملەكەتتەر ەلدەرىنىڭ تانىمال, قازىرگى عالىمدارى مەن ماماندارى اراسىنان عىلىمي كەڭەس قۇرۋ, سونىمەن بىرگە عيماراتتار مەن قۇرىلىستاردىڭ سەيسميكاعا توزىمدىلىگىن قامتاماسىز ەتۋ ماسەلەلەرىن شەشۋگە جاس عالىمداردى بەلسەندى تارتۋ جوسپارلانىپ وتىر. سونداي-اق تمد نورمالارىن ۇيلەستىرۋ ماسەلەلەرى بويىنشا جۇمىس توبىن قۇرۋ جانە سەيسميكاعا ءتوزىمدى قۇرىلىس سالاسىندا بىرىڭعاي اقپاراتتىق بازا قالىپتاستىرۋ كوزدەلگەن.
«قازقسعزي» اق باس ديرەكتورى بەگمان كۋلباەۆ تمد ەكونوميكالىق كەڭەسىنىڭ جانىنداعى ەكونوميكالىق ماسەلەلەر جونىندەگى كوميسسيا وتىرىسىنداعى بايانداماسىندا: «سەيسميكالىق قاۋىپتى اۋماقتارداعى قۇرىلىس كەزىندە قاجەتتى قاۋىپسىزدىك دەڭگەيىن قامتاماسىز ەتۋ, تمد قاتىسۋشى مەملەكەتتەرىنىڭ اۋماعىن جالپى سەيسميكالىق شاعىن ايماقتاندىرۋ كارتاسىن ازىرلەۋ, كۇردەلى ينجەنەرلىك-گەولوگيالىق جاعدايلاردا ءار ءتۇرلى كونسترۋكتيۆتىك شەشىمدەردىڭ توزىمدىلىگىنە تالداۋ جۇرگىزۋ, سونداي-اق ءتيىمدى سەيسميكالىق وقشاۋلاۋ ادىستەرىن جاساپ شىعارۋ ءۇشىن جاعدايلار مەن ءتيىمدى مەحانيزمدەردى تەك بىرىككەن كۇش ارقىلى عانا قۇرۋعا بولادى», – دەپ اتاپ ءوتتى.
بازالىق ۇيىم تۋرالى جوبا بۇعان دەيىن تمد ەلدەرىنىڭ قۇرىلىس قىزمەتىندەگى ىنتىماقتاستىق جونىندەگى ۇكىمەتارالىق كەڭەستىڭ وتىرىسىندا قاراستىرىلىپ, ماقۇلدانعانىن ەسكە سالامىز.
ايناش ەسالي,
«Egemen Qazaqstan»
الماتى
