«ماعان جاقسى مۇعالىم بارىنەن دە قىمبات, ويتكەنى مۇعالىم – مەكتەپتىڭ جۇرەگى» دەپ ىبىراي التىنسارين ايتقانداي, ۇستاز – ۇلاعاتتى ەسىم. شىنايى ۇستاز شاكىرت جۇرەگىنە جول تابا بىلەدى, جاستارعا باعىت-باعدار بەرىپ, ولاردى ادامگەرشىلىككە, ادالدىققا, بىلىمگە ۇمتىلۋعا جەتەلەيدى. سونداي اسىل قاسيەتتەردى بويىنا جيعان ۇستازدىڭ ءبىرى – ماڭعىستاۋ وبلىسىنىڭ جاڭاوزەن قالاسىنداعى №10 ورتا مەكتەپ ديرەكتورىنىڭ تاربيە جۇمىسى جونىندەگى ورىنباسارى, حيميا ءپانىنىڭ مۇعالىمى ەلميرا دوسىباي. «ۇستاز بولۋ ءوز ۋاقىتىڭدى اياماي, وزگەنىڭ باقىتىن ايالاۋ» دەپ ۇلى جازۋشى مۇحتار اۋەزوۆ ايتقانداي, ەلميرا ۇستازدىقتىڭ قىر-سىرىن مەڭگەرۋگە جەتە تالاپتانۋدىڭ ناتيجەسىندە جاس تا بولسا كوپتەگەن جەتىستىككە قول جەتكىزدى.
جۇبايى اسكەري قىزمەتكەر بولعاندىقتان, جاڭاوزەن قالاسىنداعى №10 ورتا مەكتەبىنە جۋىردا اۋىسىپ كەلگەن ە.دوسىباي بىرقاتار مادەني ءىس-شارا مەن حيميا ءپانى بويىنشا اشىق ساباقتار, قالا كولەمىندە بىرنەشە سەمينار وتكىزىپ, جاستارعا سانالى تاربيە مەن تەرەڭ ءبىلىم بەرۋدە ۇجىم مەن اتا-انالار تاراپىنان ىلتيپاتقا يە بولىپ وتىر.
جاقىندا مەكتەبىمىزدىڭ 7 «ا» سىنىپ وقۋشىلارىمەن ءۇش تىلدە وقىتۋعا بايلانىستى جاڭا فورماتتا اعىلشىن تىلىندە وتكىزگەن قالالىق سەمينارعا قاتىسۋشىلار, مۇعالىمدەر جانە مەنتور پەريزات بايتيكوۆا مۇعالىمنىڭ اعىلشىن تىلىندە ساباق وتكىزۋىن, جاڭاشا ءادىس-تاسىلدەردى قولدانۋىن, بەينە جانە فوتو ماتەريالداردى ورىندى پايدالانا ءبىلۋىن جوعارى باعالادى. جۋىردا ە.دوسىباي قالالىق مۇعالىمدەر وليمپياداسىندا ءىى ورىنعا يە بولدى. مەكتەپ تىنىس-تىرشىلىگىنە قاراپ, بەرىلگەن تاپسىرمانى ۋاقىتىمەن اتقارعانى ءۇشىن جاڭاوزەن قالالىق جاستار رەسۋرستارى ورتالىعىنىڭ ديرەكتورى ع.قۇرمانعاليەۆتىڭ العىس حاتى جانە توسبەلگىسىمەن ماراپاتتالدى.
«ۇستاز – جاراتىلىسىنان وزىنە ايتىلعاننىڭ ءبارىن جەتە تۇسىنگەن, كورگەن, ەستىگەن جانە اڭعارعان نارسەلەردى جادىندا جاقسى ساقتايتىن, ەشنارسەنى ۇمىتپايتىن, العىر دا اڭعارىمپاز اقىل يەسى, مەيلىنشە شەشەن, ونەر-بىلىمگە قۇشتار, اسا قاناعاتشىل, جانى اسقاق جانە ار-نامىسىن ارداقتايتىن, جاقىندارىنا دا, جات ادامدارىنا دا ءادىل, جۇرتتىڭ بارىنە جاقسىلىق پەن ىزگىلىك كورسەتىپ, قورقىنىش پەن جاسقانۋ دەگەندى بىلمەيتىن باتىل, ەرجۇرەك بولۋى كەرەك» دەپ دانا ءال-فارابي ايتقانداي, ەلميرا كەلدەبەكقىزىنىڭ بالالار الدىندا ءوزىنىڭ بارلىق ادامي بولمىسىمەن, پەداگوگيكالىق مادەنيەتىمەن ۇلگى بولۋى كوڭىلگە شۋاق قۇيادى.
اينۇر شاموۆا,
№10 ورتا مەكتەپتىڭ ورىس ءتىلى مەن ادەبيەتى ءپانىنىڭ مۇعالىمى
ماڭعىستاۋ وبلىسى, جاڭاوزەن قالاسى
