ءتيىستى ورىنداردىڭ ءمالىمەتىنشە, وقيعانىڭ نەگىزى اتالعان كەن ورنىنداعى كۇردەلى ۋچاسكەدە ناۋرىز ايىنىڭ 13-24-ءى ارالىعىندا جۇرگىزىلگەن ۇڭعىمانىڭ قۇرىلىسى بارىسىندا, سونداي-اق كۇردەلەندىرىلگەن بۇرعىلاۋ ەرىتىندىسىمەن ۇڭعىمانى جۋ جۇمىستارىن, گريفونداردى جويۋ ءۇشىن جوندەۋ-وقشاۋلاۋ جۇمىستارىن جۇرگىزۋ بارىسىندا شىققان تەحنوگەندىك سيپاتتاعى گاز-سۋ ارالاس تابيعي بۇرقاعىنان باستالعان. اراعا 12 كۇن سالىپ كەن ورنىنىڭ ورتالىق بولىگىنە ءتان بولىپ تابىلاتىن بۇل سۇيىقتىق, ياعني جەر بەتىنە شىققان گاز-سۋ قوسپاسىنىڭ وشاعى جانا باستادى. 10-15 مەتر بيىكتىكتە الاۋلاي جانعان ءورتتى ءسوندىرۋ وڭاي بولمادى. قۇرامىندا توتەنشە جاعداي دەپارتامەنتىنىڭ وكىلدەرى, ەكولوگتار, ءتارتىپ ساقشىلارى, وندىرىستىك قاۋىپسىزدىك ماماندارى, قمگ, «ماڭعىستاۋمۇنايگاز» اق, «سيبۋ» جشس جانە ماڭعىستاۋ وبلىسى اكىمدىگىنىڭ قىزمەتكەرلەرى بار جەدەل ءورت ءسوندىرۋ شتابى قۇرىلىپ, وقيعا ورنىنا «سەمسەر-ءورت ءسوندىرۋشى» جشس جاۋىنگەرلىك توبى, اقتاۋ قالاسىنىڭ موقق 6 ءورت ءسوندىرۋ توبى كەلىپ جەتكەن.
ءورتتى سوندىرۋگە 4 اۆتوتسيستەرنا, 1 جىلجىمالى سورعى ستانساسى, 1 گاز-سۋ ءسوندىرۋشى اۆتوكولىگى كەلىپ, جەدەل جۇمىسقا كىرىستى. ولارمەن بىرگە, ءورت شىققان جەردە ماڭعىستاۋ وبلىسىنىڭ تجد, «فاير پروتەكشن لتد» جشس جەكە قۇرامىنىڭ 53 ادامى جانە ءورت ءسوندىرۋ تەحنيكاسىنىڭ 12 بىرلىگى جۇمىلدىرىلعان. ءورتتى ءسوندىرۋ بارىسىندا جانعان جەردى تاسىمالداناتىن لافەتتىك وقپاندارمەن ءسوندىرۋ ءۇشىن بىرنەشە رەت تالپىنىستار جاسالعانمەن, ءورت وشاعىنا كىرمە جولداردىڭ جوقتىعىنا بايلانىستى ءورتتى اۋىزدىقتاۋ مۇمكىن بولمادى. ەكى-ءۇش كۇن بويى ءورتتى اۋىزدىقتاۋ جانە توتەنشە جاعدايدى جويۋ ءۇشىن بارلىق شارا قولدانىلىپ, توتەنشە وقيعا ورنىنا 80 مامان, 25 ءتۇرلى تەحنيكا جۇمىلدىرىلدى.
ناتيجەسىندە 27 ناۋرىزدان 28 ناۋرىزعا قاراعان ءتۇندە اتالعان ۇڭعىما ماڭايىنداعى گريفوندا شىققان ءورت ءسوندىرىلدى. قازىر پايدا بولعان گريفوندار جابىلىپ, گاز-سۋ ارالاس تابيعي بۇرقاقتىڭ جەر بەتىنە شىعۋى توقتاتىلدى. ال وقيعا ورنىندا زارداپ شەككەندەر مەن قازا بولعاندار جوق. الدىن الا مالىمەتتەر بويىنشا, ماتەريالدىق شىعىن كولەمى شامالى. سونداي-اق قازىرگى ساتتە قايتا قالپىنا كەلتىرۋ ءۇشىن كەشەندى جۇمىستار جۇرگىزىلۋدە. ماماندار الداعى ۋاقىتتا وسىنداي توتەنشە جاعدايلار قايتالانباس ءۇشىن جان-جاقتى ساراپتامالىق جۇمىستار جۇرگىزەتىن بولادى.
گۇلايىم شىنتەمىرقىزى,
«Egemen Qazaqstan»
ماڭعىستاۋ وبلىسى
