فورۋم ۇيىمداستىرۋشىلارى شارانىڭ ابىرويمەن وتۋىنە بار كۇش-جىگەرىن جۇمساپ جاتىر. فورۋمنىڭ نەگىزگى ماقساتى – ءار ايەل ءوزىنىڭ باعاسىن, قوعامدا قۇرمەتكە لايىق ەكەنىن كورسەتۋ. بۇل فورۋم بيىلعى جىلى جاڭا فورماتتا وتەدى. ءاربىر قاتىسۋشى ءوزىن ء–وزى تانىستىرىپ قىزىل كىلەمدە جۇرەدى.
ايتا كەتسەك, «اسىل انا» ءفورۋمىنىڭ نەگىزى 2016 جىلى قالانعان. رايگۇل مۇقاشەۆا جانە گۇلبارى مىرزاعاليەۆا نەگىزىن قالعان فورۋم العاش رەت اقتوبە قالاسىندا وتكەن بولاتىن. شارادان تۇسكەن قاراجاتتىڭ جارتىسى اقتوبەدەگى «انالار ۇيىنە» بەرىلەدى. ۇيىمداستىرۋشىلار 2018 جىلى جوبانىڭ اۋقىمىن كەڭەيتىپ, قازاقستاننىڭ باسقا دا قالالارىن قامتۋ تۋرالى شەشىم قابىلدادى.
شارادا ارنايى «اسىل انا» جۇلدەسىمەن ماراپاتتاۋ ءراسىمى بولادى. ودان باسقا دا نوميناتسيالار قاراستىرىلعان. فورۋمعا بالا تاربيەسى مەن جۇمىسىن قاتار الىپ جۇرگەن بارلىق ايەل قاتىسا الادى. جۇلدە بالا تاربيەسىمەن اينالىسا وتىرىپ, ءوز-ءوزىن دامىتۋدى جولعا قويعان ايەلدەردى ىنتالاندىرۋ ءۇشىن تاعايىندالىپ وتىر. ولار ءومىر جولىندا ادام قىزىعارلىقتاي جەتىستىكتەرگە جەتىپ, ءوزىن مويىنداتا بىلگەن جاندار. شاراعا قوعام قايراتكەرلەرى دە قاتىسىپ, قاتىسۋشىلار مەن قوناقتارعا قۋانىش سىيلايدى دەپ جوسپارلانىپ وتىر.
ودان بولەك شارا بارىسىندا بالالار مەن ايەلدەرگە ارنالعان جارمەڭكە وتەتىن بولادى. شارا ۇيىمداستىرۋشىلارىنىڭ ايتۋىنشا, وسىنداي اۋقىمدى شارا وتكىزۋ ولار ءۇشىن ۇلكەن ماقتانىش ءارى زور جەتىستىك. شارادا وتباسى دەمالىسىنداعى انالار مەن ىسكەر ايەلدەردىڭ كەزدەسۋى جوسپارلانعان.
