«قازاقمىس» كورپوراتسياسى جشس, وڭتۇستىككورەيالىق ەنسە ۋنيۆەرسيتەتىنىڭ «سەۆەرانس» گوسپيتالى مەن «Severance-KZ حالىقارالىق مەديتسينالىق قورى» قوعامدىق قورىنىڭ باسشىلارى ۇزاقمەرزىمدى ىنتىماقتاستىق تۋرالى ۇشجاقتى مەموراندۋمعا قول قويدى.
«سەۆەرانس» گوسپيتالى وڭتۇستىك كورەيا رەسپۋبليكاسىنداعى ماڭدايالدى مەديتسينالىق مەكەمەلەردىڭ ءبىرى جانە ازيانىڭ دەنساۋلىق ساقتاۋ جۇيەسىندە كوشباسشى دەپ تانىلعان. ونىڭ ماماندارى استانالىق ەنسە ۋنيۆەرسيتەتىنىڭ اكادەميالىق بازاسىندا جۇمىس ىستەيدى.
قول قويىلعان قۇجاتقا سايكەس, وڭتۇستىككورەيالىقتار جەزقازعان مەديتسينالىق ورتالىعىنىڭ ماماندارىنا عىلىمي جانە ونەركاسىپتىك مەديتسينا سالاسىندا تاجىريبەلىك جانە كونسۋلتاتيۆتىك كومەك كورسەتەدى. سونىمەن بىرگە, كەلىسىمدە دەنساۋلىق ساقتاۋ سالاسىنا زاماناۋي تەحنولوگيالاردى ەنگىزۋمەن قاتار, ەنسە ۋنيۆەرسيتەتى ازىرلەگەن ارنايى باعدارلاما نەگىزىندە قازاقستاندىق مەديتسينا قىزمەتكەرلەرىن وقىتۋ كوزدەلگەن.
مۇنداي تىعىز ىنتىماقتاستىق «قازاقمىس» كومپانيالار توبىنىڭ جۇمىسشىلارى مەن جەزقازعان ءوڭىرىنىڭ تۇرعىندارىنا ساپالى مەديتسينالىق قىزمەت كورسەتۋ ىسىندەگى ءبىزدىڭ العا قويعان ماقساتتارىمىزدىڭ ورىندالۋىنا وڭ ىقپال ەتەدى دەپ ۇمىتتەنەمىز, – دەدى «قازاقمىس كورپوراتسياسى» جشس باسقارۋشى كەڭەسىنىڭ باس ديرەكتورى باقتيار قىرىقپىشەۆ.
قول قويىلعان مەموراندۋم قازاقستاننىڭ تۇڭعىش پرەزيدەنتى باستاپ بەرگەن دەنساۋلىق ساقتاۋ سالاسىنداعى قازاقستان-كورەيا ىنتىماقتاستىعىنا قوسىلعان ايتارلىقتاي ۇلەس بولماق.
ورايى كەلىپ تۇرعاندا قازاقستانىڭ تۇڭعىش پرەزيدەنتى – ەلباسى نۇرسۇلتان نازارباەۆ ەنسە ۋنيۆەرسيتەتىنىڭ قۇرمەتتى پروفەسسورى ەكەنىن ەسكە سالا كەتكەن ءجون.
ايناش ەسالي,
«Egemen Qazaqstan»
