بيىلعى 13 ناۋرىزىندا «ماڭعىستاۋمۇنايگاز» اق-عا قاراستى «قالامقاس» كەن ورنىنىڭ كۇردەلى ۋچاسكەسىندە ۇڭعىمانىڭ قۇرىلىسى بارىسىندا كەن ورنىنىڭ ورتالىق بولىگىنە ءتان تەحنوگەندىك سيپاتتاعى گاز-سۋ ارالاس تابيعي بۇرقاعى شىققان. 25 ناۋرىزدا جەر بەتىنە شىققان گاز-سۋ قوسپاسىنىڭ وشاعى جانا باستادى.
جەدەل شتاب قۇرىلىپ, ونىڭ قۇرامىنا توتەنشە جاعداي دەپارتامەنتىنىڭ وكىلدەرى, ەكولوگتار, ءتارتىپ ساقشىلارى, وندىرىستىك قاۋىپسىزدىك ماماندارى, قمگ, «ماڭعىستاۋمۇنايگاز» اق, «سيبۋ» جشس جانە ماڭعىستاۋ وبلىسى اكىمدىگىنىڭ قىزمەتكەرلەرى كىردى.
ءورتتى اۋىزدىقتاۋ جانە توتەنشە جاعدايدى جويۋ ءۇشىن بارلىق شارا قولدانىلدى. توتەنشە وقيعا ورنىندا 80 مامان, 25 ءتۇرلى تەحنيكا جۇمىلدىرىلدى.
28.03.2019 تۇنگى ساعات 01.05-تە №8237 ۇڭعىماسى ماڭايىنداعى گريفوندا شىققان ءورت ءسوندىرىلدى. قازىرگى تاڭدا, پايدا بولعان گريفوندار جابىلىپ, گاز-سۋ ارالاس تابيعي بۇرقاقتىڭ جەر بەتىنە شىعۋى توقتاتىلدى.
زارداپ شەككەندەر مەن قازا بولعاندار جوق. الدىن الا مالىمەتتەر بويىنشا, ماتەريالدىق شىعىن كولەمى شامالى.
قازىرگى ساتتە قايتا قالپىنا كەلتىرۋ ءۇشىن كەشەندى جۇمىستار جۇرگىزىلۋدە. ماماندار الداعى ۋاقىتتا وسىنداي توتەنشە جاعدايلار قايتالانباس ءۇشىن جان-جاقتى ساراپتامالىق جۇمىستارىن جۇرگىزەتىن بولادى.
گۇلايىم شىنتەمىرقىزى,
«Egemen Qazagstan»
ماڭعىستاۋ وبلىسى
