«قايتىس بولعان جانداردىڭ تۋعان-تۋىستارىنا اكىمدىك اتىنان جانە ءوز اتىمنان قايعىرا كوڭىل ايتامىن. بۇگىنگى جكو-سى سالدارىنان ەكى ادام قايتىس بولىپ, 36 ادام ءتۇرلى جاراقات العان. قازىر ولار مەديتسينالىق كومەك الۋدا», - دەدى باقىت سۇلتانوۆ اكىمدىكتە وتكەن جينالىستا.
وسى ورايدا اكىم بۇگىنگى جول كولىك وقيعاسىنان قايتىس بولعانداردىڭ وتباسىنا, زارداپ شەككەندەرگە جان-جاقتى كومەك كورسەتۋدى جانە جكو-نىڭ سەبەبىن انىقتاۋدى تاپسىردى.
سونىمەن قاتار, قالالىق قوعامدىق دەنساۋلىق ساقتاۋ باسقارما باسشىسى قامالجان نادىروۆتىڭ ايتۋىنشا, وقيعا ورنىندا جەدەل جاردەمنىڭ 19 بريگاداسى جۇمىس جاساۋدا.
بارلىعى 36 ادام زارداپ شەككەن, ەكى ادام قايتىس بولىپ, 23 ادام اۋرۋحاناعا جاتقىزىلعان. 17 ادام امبۋلاتورلىق ەم الۋدا. قازىر ءۇش ادامعا وپەراتسيا جاسالۋدا, تاعى ءتورت ادام دايىندالۋدا. ولاردىڭ قاتارىندا 1983 جىلى تۋعان فيليپين ەلىنىڭ ازاماتى بار, ونىڭ جاعدايى اۋىر. الدىن الا دياگنوزى: «كەۋدە قۋىسى جاراقاتتانعان جانە جامباسى سىنعان». زارداپ شەگۋشىلەرمەن پسيحولوگتار جۇمىس ىستەۋدە», – دەدى ق. نادىروۆ.
جكو-نا جەدەل جاردەم كولىگى دە تۇسكەن. ونىڭ ىشىندە ەكى فەلدشەر مەن جۇرگىزۋشى بولعان. جۇرگىزۋشى ءدىن امان. ال ءبىر فەلدشەر تىزە جاراقاتىمەن ءبىرىنشى قالالىق اۋرۋحاناعا جەتكىزىلگەن.
وسىعان دەيىن حابارلانعانىمىزداي, بۇگىن ۇلى دالا كوشەسى مەن قابانباي باتىر داڭعىلى قيىلىسىندا ءۇش اۆتوبۋس جانە جەڭىل كولىكتەردىڭ قاتىسۋىمەن جول كولىك وقيعاسى ورىن العان. قالا ماڭىنا قاتىنايتىن № 303 مارشرۋت اۆتوبۋسى № 12 باعدار اۆتوبۋسىمەن سوقتىعىسقان بولاتىن.
