قالا اكىمى عابيدوللا ءابدىراحىموۆ پرەزيدەنتكە قالادا قۇرىلىسى ءجۇرىپ جاتقان بىرقاتار جوبالاردى تانىستىردى. اۋقىمدى جوبالاردىڭ ءبىرى رەتىندە شىمكەنت سيتي قالاشىعىنا توقتالىپ, جاڭا اۋدانعا Highvill, Bazis-A, Bi Group, Otau Group كومپانيالارى ينۆەستيتسيا سالىپ جاتقاندىعىن جەتكىزدى.
اتالعان جاڭا اۋداندا جاقىن بولاشاقتا 5 مەكتەپ, 9 باباقشا, مەكتەپ تىس 2 مەكەمە, 1 ەمحانا مەن 12 ءدارىحانا, 1,5 ملن.م2 اۋماققا كوپقاباتتى تۇرعىن ءۇي قۇرىلىسى سالىنادى. جالپى اۋماعى 427 گەكتار جەرگە 50 000 تۇرعىن قونىستانادى دەپ جوسپارلانۋدا. ءىرى قۇرىلىس كومپانيالارى كونگرەسس-حولل, دراما تەاترى, مۋلتيفۋنكتسيونالدى مادەني ورتالىق, مۇز ارەناسى, ءجۇزۋ باسسەينى, 600 ورىندىق قوناكۇي, بانك بولىمشەلەرىنىڭ قۇرىلىسىنا قاتىسپاق.
ساپار اياسىندا قازاقستان پرەزيدەنتى ءۇشىنشى مەگاپوليستەگى 4 گەتار اۋماقتى الىپ جاتقان شاھاردىڭ ەجەلگى تاريحىنان سىر شەرتەتەتىن شىمكەنت ەسكى قالاشىعىنىڭ ەسكيزدى جوباسىن كورىپ, وڭ باعاسىن بەردى.
ايتا كەتەرلىگى, قالانىڭ قاق ورتاسىندا ورنالاسقان تسيتادەلدىڭ اۋدانى 40*50 م, بيىكتىگى 25م, جوبانىڭ قۇنى شامامەن 8,3 ملرد تەڭگە. قازىرگى تاڭدا مۇندا شاحريستان قازبا جۇمىستارىن جالعاستىرۋ, قورعاۋ اۋماعىنىڭ جوباسىن ازىرلەۋ, ەسكى قالاشىق ورنىن جاڭعىرتۋ, وڭتۇستىك جانە باتىس بولىكتەرىنىڭ بەلدەۋلەرىن كۇشەيتۋ بويىنشا قۇرىلىس جۇمىستارى جۇرگىزىلۋدە.
سونىمەن قاتار شىمكەنتتەگى تاريحي ورىنداردىڭ ءبىرى «قوشقار اتا» وزەنى جاعالاۋى جوباسى قولعا الىنۋدا. جالپى اۋدانى 54,6 گەكتاردى قۇراعان اۋماقتىڭ 10,56 گەكتارىنا كوگەلداندىرۋ جۇمىستارى جۇرگىزىلسە, 1,52 گەكتارىنا ساۋلەتتىك كومپوزيتسيالارىنىڭ قۇرىلىسى الاڭى ورنالاسقان. وزەن جاعالاۋىنا 302 400 م2 ايماققا 32 كوپقاباتتى تۇرعىن ءۇي سالۋ جوسپارلانۋدا. جوبانىڭ جالپى قۇنى 32,4 ملرد تەڭگەنى قۇرايدى.
پرەزيدەنت ءوز كەزەگىندە شاھارداعى جولاۋشى تاسىمالىنا بايلانىستى بىرقاتار جوبالارمەن دە تانىسىپ شىقتى. سونىڭ ءبىرى رەتىندە جاڭا اۋەجاي قۇرىلىسىنا باسا نازار اۋدارىلۋدا. وسىعان وراي قۇنى 17,5 ملرد تەڭگەنى قۇرايتىن «Scat اۋەكومپانياسى» جاڭا تەرمينالى سالىنباق. اتالعان الاڭدا اۆتوكولىك جولىمەن قامتاماسىز ەتۋ, ۇشاقتارعا ارنالعان پەررون قۇرىلىسى, اۋەجاي اۋماعىن اباتتاندىرۋ بويىنشا قۇرىلىس باستالماق. جاقىن بولاشاقتا ەسكى اۋەجاي ورنىنان 3 قاباتتى عيمارات, 4 تەلەسكوپتىق ءدالىزدىڭ عيماراتى تۇرعىزىلماق. جوبا جۇزەگە اسقان جاعدايدا قازىرگى 14 رەيستىك قىزمەت كورسەتۋ 36 رەيسكە دەيىن وسەدى دەپ كۇتىلۋدە.
سونداي-اق, مەملەكەت باسشىسى شىمكەنت تەمىرجول ۆوكزالىنىڭ قۇرىلىسىن قايتا جۇرگىزۋ جوباسىن كورىپ شىقتى. جاڭارتۋدان وتكەن جولاۋشى تاسىمال بەكەتى وسى جىلدىڭ جەلتوقسان ايىندا پايدالانۋعا بەرىلمەك. ناتيجەسىندە ۆوكزال عيماراتىنىڭ اۋماعىن 1700-دەن 3500-گە دەيىن كەڭەيىپ, بىردەي ۋاقىتتا 5500 دەن 9000 جولاۋشىعا دەيىن قابىلداي الاتىن دارەجەگە جەتپەك.
ساپار اياسىندا قازاقستان پرەزيدەنتى ءۇشىنشى مەگاپوليستەگى «ازالا تەكستيل» فابريكاسى مەن «مەديكەر» مەديتسينالىق ورتالىعىننىڭ ءوندىرىس ورنىندا بولدى. ءارى, وسىنداعى جۇمىس بارىسىمەن تانىستى.
«ازالا تەكستيل» فابريكاسىندا بۇگىندە 650-دەن استام ادام ەڭبەك ەتەدى. ولار نارىققا كورپە مەن جاستىق تىسى, سۇلگى مەن جايمالار, تۇرمىسقا قاجەتتى توقىما بۇيىمدارىن شىعارۋدا. كاسىپورىن ايىنا 500 توننا ماقتانى وڭدەپ, ودان 1,5 ميلليون مەتر ماتا توقيدى.
شىمكەنت قالاسىنا جاساعان جۇمىس ساپارى بارىسىندا پرەزيدەنت ناۋرىز مەيرامى قارساڭىندا جاڭادان اشىلعان زاماناۋي مەديتسينالىق ورتالىقتى ارالاپ كوردى. وتاندىق كلينيكانىڭ جۇمىسىمەن تانىسقان قاسىم-جومارت كەمەل ۇلى دەنساۋلىق ساقتاۋ سالاسىنا باسا ءمان بەرۋدى تاپسىردى. مۇندا قالاداعى العاشقى سپورتتىق مەديتسينا ورتالىق جۇمىس ىستەيدى. شىمكەنتتە بالاماسى جوق بىرەگەي مەديتسينالىق قۇرىلعىسى بار ورتالىقتا تۇرعىندارعا مەديتسينالىق قىزمەتتىڭ بارلىق ءتۇرى كورسەتىلەدى. ال, سپورتتىق مەديتسينا ورتالىعىندا كاسىپقوي سپورتشىلار دايىندىق پەن وڭالتۋ پروتسەستەرىن وتە الادى. «تاۋلىگىنە 500-گە دەيىن ناۋقاس قابىلداي الامىز», دەيدى كلينيكانىڭ باس ديرەكتورى باقىتجان پوزيلوۆ.
نۇرشات توكەن,
«Egemen Qazaqstan»
شىمكەنت
