شاراينا
سەنبى, 22 قىركۇيەك 2012 7:01
33 مىڭ اسكەرىن شىعاردى
اقش اۋعانستانعا 2009 جىلى ەنگىزگەن 33 مىڭ ادامنان تۇراتىن اسكەري قۇراماسىن ەلدەن شىعاردى. «اسسوشەيتەد پرەسس» اگەنتتىگىنىڭ حابارلاۋىنشا, اۋعانستان اۋماعىندا جالپى سانى 68 مىڭ اسكەري قىزمەتشى قالىپ وتىر.
سەنبى, 22 قىركۇيەك 2012 7:01
33 مىڭ اسكەرىن شىعاردى
اقش اۋعانستانعا 2009 جىلى ەنگىزگەن 33 مىڭ ادامنان تۇراتىن اسكەري قۇراماسىن ەلدەن شىعاردى. «اسسوشەيتەد پرەسس» اگەنتتىگىنىڭ حابارلاۋىنشا, اۋعانستان اۋماعىندا جالپى سانى 68 مىڭ اسكەري قىزمەتشى قالىپ وتىر.
جوسپار بويىنشا اقش پەن ناتو-نىڭ اسكەري كۇشتەرى اۋعانستاننان 2014 جىلدىڭ سوڭىنا دەيىن تولىق شىعارىلۋى ءتيىس. ال اتالعان 33 مىڭ اسكەري قىزمەتشىنى ەل اۋماعىنان الىپ كەتۋ بىرنەشە ايعا سوزىلدى. دەگەنمەن, اۋعاندىق اسكەريلەرگە ەلدىڭ قاۋىپسىزدىگىن قامتاماسىز ەتۋدى باسى ءبۇتىن وتكىزىپ بەرۋ ماسەلەسى جوسپارلانعان مەرزىمنەن ءارى قاراي سوزىلۋى دا مۇمكىن. بۇعان اۋعاندىق اسكەريلەر مەن پوليتسەيلەردىڭ سوڭعى كەزدە ناتو اسكەريلەرىنە ءجيى شابۋىل جاساۋى سەبەپ بولىپ وتىرعان سەكىلدى. وسى جىلدىڭ باسىنان بەرى اۋعانستاندا ناتو-نىڭ 250 اسكەري قىزمەتكەرى قازا تاپقان. ولاردىڭ كوپشىلىگى – امەريكالىقتار.
تۇرعىنداردىڭ ۇرەيىن باسۋ ءۇشىن
مەحيكونىڭ ماڭىنداعى نەساۋالكويوتل قالاسىنا اسكەريلەر مەن فەدەرالدىق پوليتسيانىڭ كۇشتەرى ەنگىزىلدى. «رەيتەر» اگەنتتىگىنىڭ اقپاراتتارىنا قاراعاندا, ەنگىزىلگەن اسكەريلەردىڭ سانى 700-دەن اسادى.
وعان مەحيكو شتاتى كونگرەسىنىڭ مۇشەسى حايمە سەررانو سەديلونىڭ ءولتىرىلۋى سەبەپ بولعان. ونى قالا كوشەلەرىنىڭ بىرىندە بەلگىسىز بىرەۋلەر پىشاقتاپ كەتكەن. قىلمىستى كىمدەر جاساعانى, ونىڭ سەبەپ-سالدارى بەلگىسىز بولىپ وتىر. شتاتتاعى قاۋىپسىزدىك دەپارتامەنتى وكىلىنىڭ تۇسىندىرۋىنشە, قالاعا اسكەريلەردىڭ كىرگىزىلۋى تۇرعىنداردى ۇرەيلەندىرمەۋگە جانە ولاردىڭ قاۋىپسىزدىگىن قامتاماسىز ەتۋگە بايلانىستى. ويتكەنى, كونگرەسسمەن ولتىرىلگەننەن كەيىن قالادا ءبىر-بىرىنە قارسى باندالاردىڭ ءوزارا ەسەپ ايىرىساتىنى جونىندە وسەك-اياڭ تاراعان. سونىڭ سالدارىنان مادەنيەت جانە ساۋدا ورىندارى جابىلىپ, ادامدار كوشەگە شىعۋدان قورىققان.
ازامات سوعىسىنىڭ سالدارى
سيريا بيلىگى الەپپو قالاسىندا 100-دەن استام اۋعاندىق تەررورشىنىڭ كوزى جويىلعانىن مالىمدەدى. SAنA مەملەكەتتىك اگەنتتىگىنىڭ تاراتقان اقپاراتتارىنا قاراعاندا, ۇكىمەتتىك اسكەريلەر بۇل وپەراتسيانى بىرنەشە كۇن ىشىندە جۇزەگە اسىرعان.
وسىنىڭ ناتيجەسىندە 100-دەن استام تەررورشى ءولتىرىلىپ, پۋلەمەتتەر ورناتىلعان 15 اۆتوكولىك جويىلعان. سونىمەن قاتار, داماسكىدە 100-گە جۋىق سودىر تۇتقىندالعان. كەشە بەلگىلى بولعانىنداي, داماسك قالاسىنىڭ ماڭايىندا سيريا ارمياسىنىڭ تىكۇشاعى اتىپ ءتۇسىرىلگەن سياقتى. بۇل جونىندە سيريا بيلىگى مەن مەملەكەتتىك باق-تار ەشنارسە ايتپاي وتىر. پرەزيدەنت باشار اسادتىڭ اسكەريلەرى مەن وپپوزيتسيالىق كۇشتەر اراسىنداعى قاقتىعىستىڭ باستالعانىنا 18 ايدان استى. وسى جىلدىڭ جازىندا ول كەڭ كولەمدەگى ازامات سوعىسىنا ۇلاستى.
تىيىم سالۋ قاجەت دەپ سانايدى
رەسەيلىكتەردىڭ ۇشتەن ەكىسى شەنەۋنىكتەردىڭ شەتەلدەردە دۇنيە-م ۇلىك ۇستاۋلارىنا تولىق تىيىم سالۋ قاجەت دەپ ەسەپتەيدى. بۇكىلرەسەيلىك قوعامدىق پىكىرلەردى زەرتتەۋ ورتالىعىنىڭ جۇرگىزگەن ساۋالداماسىنىڭ قورىتىندىسى وسىنى كورسەتىپ وتىر.
«كوممەرسانت» باسىلىمىندا جاريالانعان ساۋالدامانىڭ مالىمەتتەرى بويىنشا اتالعان ماسەلەگە سۇراۋ سالىنعان رەسەيلىكتەردىڭ 61 پايىزى زاڭنامانى قاتايتۋ شەنەۋنىكتەر مەن دەپۋتاتتارعا قاتىستى ەكەندىگىن ايتقان. ال 28 پايىزى شەنەۋنىكتەردىڭ شەتەلدەردە اكتيۆتەر ۇستاۋىنا تىيىم سالۋدىڭ قاجەتى جوق, بىراق ولارعا ەرەكشە ەسەپ جۇرگىزگەن ءجون, دەپ جاۋاپ بەرگەن. سونداي-اق سۇراۋ سالىنعانداردىڭ 62 پايىزى بۇل تالاپتاردى ورىنداماعانداردى قاتاڭ جازالاپ, باس بوستاندىقتارىنان ايىرۋ جازاسىنا تارتۋ تۇرلەرىن ەنگىزۋ كەرەك دەپ ەسەپتەيدى.
ساياسي باسپانا سۇرادى
تبيليسي تۇرمەسىندەگى جازاسىن وتەۋشىلەرگە زورلىق-زومبىلىق جاساعانى تۋرالى تۇسىرىلگەن بەينەجازبانىڭ اۆتورى ۆلاديمير بەدۋكادزە بەلگيا بيلىگىنە وزىنە جانە وتباسى مۇشەلەرىنە ساياسي باسپانا بەرۋدى وتىنگەن رەسمي حات جولدادى. بۇل جونىندە يتار-تااس اگەنتتىگى حابارلادى.
بەدۋكادزە گرۋزيا بيلىگى وزىنە جانە وتباسىنا قاۋىپ ءتوندىرىپ وتىر, قىسىم كورسەتىپ جاتىر, دەپ مالىمدەگەن سياقتى حاتىندا. ول سونداي-اق بەلگيا اۋماعىندا ءوزىن تولىق قاۋىپسىز سەزىنە المايتىنىن دا ايتقان. بەدۋكادزە بۇرىن گلاندسك تۇرمەسىندە ىستەپ, وسى جىلدىڭ مامىرىندا باسقا ەلگە كەتكەن ەكەن. قازىرگى كەزدە ول بەلگيا اۋماعىندا تۇرىپ جاتقان كورىنەدى. تۇرمەدەگىلەرگە زورلىق-زومبىلىق كورسەتىلگەنى تۋرالى بەينەجازبا 18 قىركۇيەكتە كورسەتىلدى. سونىڭ كەسىرىنەن الدىمەن گرۋزيانىڭ جازانى ورىنداۋ ىستەرى جونىندەگى مينيستر ح.كالماحەليدزە, ودان كەيىن ىشكى ىستەر ءمينيسترى ب.احالايا وتستاۆكاعا كەتتى.
اۋماقتىق داۋدىڭ سالقىنى
قىتاي ۇكىمەتى پيانيست يۋندي ءليدىڭ جاپونياعا گاسترولدىك ساپارمەن بارۋىن توقتاتا تۇرعانى ءجون دەپ تاپتى. جوسپار بويىنشا ول جاپونياعا 2013 جىلدىڭ قاڭتارىندا بارۋى ءتيىس ەدى.
جاپونيا باسىلىمدارىنىڭ جازۋىنشا, قىتاي بيلىگىنىڭ بۇل شەشىمى جاپونيا مەن قىتاي اراسىنداعى ارالعا قاتىستى تۋىنداعان داۋعا تىكەلەي بايلانىستى. ەكى ەلدىڭ اراسىنداعى داۋ شىعىس قىتاي تەڭىزىندەگى ادام تۇرمايتىن (قىتاي ونى دياويۋيجاويۋ, جاپونيا سەنكاكۋ دەپ اتايدى) ارالعا بايلانىستى ورشىگەن ەدى. ويتكەنى, ۇستىمىزدەگى جىلدىڭ تامىزىندا جاپوندىق بەلسەندىلەر توبى وسى ارالعا بارىپ, جاپونيانىڭ تۋىن ورناتتى. بۇل قىتاي تاراپىنا ۇنامادى. ونىڭ سوڭى قىتاي اۋماعىنداعى جاپونيا كومپانيالارىنىڭ جۇمىسىن توقتاتۋىنا سوقتىردى.
ينتەرنەت ماتەريالدارى نەگىزىندە ازىرلەندى.
