بۇل جۇيە ازاماتتارعا بىردەن ءتورت ءتۇرلى تولەم تولەۋ مۇمكىندىگىن بەردى. اتاپ ايتار بولساق, بجت ارقىلى سالىق تولەۋشىلەر مەملەكەتتىك كىرىستەر ورگانىنا تولەنەتىن جەكە تابىس سالىعىن, بجزق-عا تولەنەتىن مىندەتتى زەينەتاقى جارنالارىن, مەملەكەتتىك الەۋمەتتىك ساقتاندىرۋ قورىنا تولەنەتىن الەۋمەتتىك اۋدارىمدى سونداي-اق مىندەتتى الەۋمەتتىك مەديتسينالىق ساقتاندىرۋ قورىنىڭ الەۋمەتتىك جارنالارىن اۋدارا الادى.
بجزق استانا قالالىق بولىمشەسىنىڭ ديرەكتورى -باسقارۋشى ديرەكتور مۇرات شاريپوۆ زەينەتاقى جۇيەسىن جاڭعىرتۋداعى باستى ماقسات – زەينەتاقى تولەمدەرىنىڭ تيىمدىلىگىن ارتتىرۋعا باسىمدىق بەرگەنىن ايتتى.
«ازاماتتىق-قۇقىقتىق سيپاتتاعى شارتتاردىڭ ءبىر تارابى سالىق اگەنتى بولسا, ولار جەكە تۇلعالارعا, ونىڭ ىشىندە فريلانسەرلەرگە بەرىلەتىن تابىستان مىندەتتى زەينەتاقى جارناسىن تولەيدى. ەگەر ازاماتتىق-قۇقىقتىق سيپاتتاعى شارت جەكە تۇلعامەن جاسالعان بولسا, مىندەتتى زەينەتاقى جارناسىن تولەۋ – فريلانسەردىڭ مىندەتى ەمەس, قۇقىعى بولىپ سانالادى. بۇل رەتتە جارنالاردى ەسەپتەۋ ءۇشىن الىناتىن ەڭ جوعارى جيىنتىق جىلدىق تابىس رەسپۋبليكالىق بيۋدجەت تۋرالى زاڭمەن ءتيىستى قارجى جىلىنا بەلگىلەنگەن ەڭ تومەنگى جالاقىنىڭ 50 ەسەلەنگەن مولشەرىنىڭ 12 ەسەلەنگەن سوماسىنان اسپاۋعا ءتيىس», – دەدى مۇرات شاريپوۆ.
2019 جىلدىڭ 8 قاڭتارىنان باستاپ جەكە تۇلعاعا مىندەتتى زەينەتاقى جارناسى بويىنشا شوت اشۋ ءۇشىن قورعا جۇگىنۋدىڭ قاجەتى جوق. جەكە تۇلعانىڭ قوردا مىندەتتى زەينەتاقى جارناسى بويىنشا اشىلعان شوتى جوق بولسا, وندا العاشقى جارنا تۇسكەن كەزدە شوت وزدىگىنەن راسىمدەلەدى ەكەن.
2019 جىلدىڭ 25 قاڭتارىنان باستاپ جەكە زەينەتاقى شوتىنىڭ جاي-كۇيى تۋرالى اقپارات ەلەكتروندى ۇكىمەت پورتالى ارقىلى الۋ ءتارتىبى جەڭىلدەتىلىپتى.
سالىمشىلار (الۋشى) جەكە زەينەتاقى شوتىنان ءۇزىندى كوشىرمەنى تەك ەلەكتروندىق تسيفرلىق قولتاڭبامەن عانا ەمەس, ءبىر رەتتىك sms-ءپارولدىڭ كومەگىمەن دە الىپ ءجۇر. بۇل ءۇشىن سالىمشى (الۋشى) ەلەكتروندىق ۇكىمەت پورتالىنىڭ جەكە كابينەتىندە تىركەلىپ, ءۇزىندى كوشىرمە الۋعا ساۋال جولداپ, mGov موبيلدىك ازاماتتار بازاسىندا تىركەلگەن سالىمشىنىڭ (الۋشىنىڭ) ۇيالى تەلەفونىنا ءبىر رەتتىك sms-پارول جىبەرىلەدى.
«ماسەلە وسىلايشا وڭاي ءارى جىلدام شەشىلەدى», – دەدى مۇرات شاريپوۆ.
گۇلبارشىن ساباەۆا,
«ەگەمەن قازاقستان»
الماتى
