ەڭ الدىمەن ايرىقشا اتاپ ايتاتىن ءبىر ماسەلە – تۇڭعىش پرەزيدەنتىمىز نۇرسۇلتان نازارباەۆتىڭ كەشەگى ماڭىزدى مالىمدەمەسى ەگەمەن ەلىمىزدەگى ءداستۇرلى دەموكراتيانىڭ جارقىن كورىنىسىن ايقىن كورسەتىپ بەردى. مەن ەلباسىمىزدى كوپ جىلداردان بەرى جانىما جاقىن جان رەتىندە جاقسى بىلەمىن. العاش رەت قاراعاندى وبلىسىندا قىزمەت اتقارىپ جۇرگەندە كەزدەسكەن تانىستىعىمىز بۇگىنگە دەيىن ۇلكەن سىيلاستىققا ۇلاستى دەۋگە بولادى. ءوزىنىڭ شەتەلدەرگە بارعان بىرقاتار ساپارىنا سەرىك ەتكەن تۇستا ول كىسىنىڭ تاريح الدىنداعى, حالىق الدىنداعى ەڭبەگىنىڭ وتە ۇلكەن ەكەنىنە كوزىم انىق جەتكەن كەزدەر كوپ.
كەشەگى مالىمدەمەنى تىڭداپ وتىرعاندا كوكىرەگىمىزدە قيماستىق سەزىمى ورناعانىن جاسىرا المايمىز. مەنىڭ جەكە شىعارماشىلىعىمدى باعالاپ بىرنەشە رەت قابىلداعان مەملەكەت باسشىسى قازاق ادەبيەتى مەن مادەنيەتىنە وتە قامقور بولدى. قيراعان كەڭەس وكىمەتىنىڭ ءۇيىندىسىنىڭ ۇستىنە تاۋەلسىز مەملەكەت ورناتۋ – الماعايىپ الاساپىران كەزەڭدە وڭاي سوقپاعانى انىق. سول تار كەزەڭدە ءار اقىن-جازۋشىنىڭ, قالامداستاردىڭ قامىن ويلاپ پرەزيدەنت ستيپەندياسىن تاعايىندادى. مۇنداي قامقورلىق بىزبەن وداقتاس, كورشىلەس ەلدەردىڭ ەشقايسىسىندا بولعان جوق. قىسىلتاياڭ كەزەڭنىڭ وزىندە ۇلتتىڭ رۋحانياتىنا ۇستىن بولارلىق «بابالار ءسوزىنىڭ» 100 تومىن جارىققا شىعارىپ, «مادەني مۇرا» اتتى مازمۇنى باي ءبىرتۇتاس باعدارلاما قابىلدادى. ول شاراپاتتى شارۋانى ءبىز ەشقاشان ۇمىتپاۋىمىز كەرەك. ەلباسىنىڭ ەڭ ءبىرىنشى ەرلىگى – ەل جالاقى الا الماي جانتالاسىپ جاتقان ءولىارا شاقتا حالىقتى جىلى كەڭسەدە وتىرىپ باسقارماي, شاحتاعا ءوزى ءتۇسىپ, شارۋانى تىكەلەي شەشۋگە تىرىسقاندىعى بولاتىن. ەلىنە ەتەنە جاقىن پرەزيدەنتىمىز قيىندىقتى ءاردايىم بىرلىك كۇشى ارقىلى جەڭەمىز دەگەن سوزىندە تۇرىپ, قازاق ەلىن قانشالىق بيىككە كوتەرىپ شىعارعانىن ۋاقىت تارازىسى ءالى دە ءادىل تالعامدايتىن بولادى. مەن نۇرسۇلتان نازارباەۆتىڭ كەمەڭگەر كوشباسشى ەكەندىگىن ءار كەزدە ارداقتاپ ايتىپ كەلە جاتقان ازامات رەتىندە ول كىسى جايلى جازىلعان ءۇش كىتابىمدى ايتا الامىن. العاش قالام تەربەگەن «كەمەڭگەرلىك قۇپياسى» ەڭبەگىم بولسا, ودان كەيىن تاعى ەكى كىتاپ «قاس-قاعىم جانە ماڭگىلىك», «ينەمەن قازىلعان قۇدىق» اتتى ەڭبەكتەرىم ەلباسىنىڭ تۇتاس كەلبەتىن جان-جاقتى اشۋعا ارنالعان ەڭبەكتەر بولدى.
ءبىر سوزبەن ايتقاندا, ەلباسىمىزدىڭ كەشەگى مالىمدەمەسى – ازاماتتىق ەرىك-جىگەردىڭ كۇشى, ساياسي-تۇلعالىق ەرلىكتىڭ كورىنىسى. ارينە قيمايمىز, كوشباسشىڭ تۇگىلى كوشىپ بارا جاتقان كورشىڭدى قيمايتىن ەت جۇرەگىڭە ەرەكشە جاقىن ەتەنە سەزىمدەر بولادى. سول سەزىمدەر – ەل ەرتەڭىنىڭ ءۇمىتتى بولاشاعىنا دەگەن سەنىممەن ۇشتاسا بەرمەك.
ءسابيت دوسانوۆ,
جازۋشى, مەملەكەتتىك سىيلىقتىڭ لاۋرەاتى
