كەشە قازاق ەلى تاعى ءبىر بيىككە كوتەرىلدى. ەلدىكتىڭ ەسەيۋىنىڭ كەزەكتى سالتاناتىنا كۋا بولدىق. ەلباسى تۋرالى ءسوز ەلباسىنىڭ وزىنەن بۇرىن ەلدىڭ وزىنە كوبىرەك كەرەك ەدى. سول ءسوز ايتىلدى. كوپتىڭ كوڭىلى ورنىنا ءتۇستى. العا ۇمتىلاتىنىمىز ۇتىمدى ءتۇسىندىرىلدى.
قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ پارلامەنت پالاتالارىنىڭ بىرىككەن وتىرىسىنداعى سوزىندە ايتىلعان باعالاردان كەيىن ەلباسى ەڭبەگىنە بايلانىستى پىكىر قوسۋ قيىنداپ تا قالدى. دەگەنمەن, جاقسىنىڭ جاقسىلىعىن ايتىپ, نۇرىن تاسىتۋ – پاراسات پارىزى.
قيراندىدان, قۇلاندىدان مەملەكەت قۇرۋ, قوعامدى ءبىر فورماتسيادان ەكىنشى فورماتسياعا اۋىستىرۋ, قيلى كەزەڭدەگى قيىنشىلىقتاردان ەسەڭگىرەي جازداعان حالىقتى تار جول, تايعاق كەشۋدەن امان-ەسەن الىپ ءوتۋ, ەلدى اياعىنان تىك تۇرعىزۋ, بىرنەشە الەمدىك قارجى داعدارىسىنان بۇرىنعىدان دا شيراتىپ, شىنىقتىرىپ شىعارۋ, باتىس تا, شىعىس تا مويىندايتىن, ساناساتىن, قۇرمەتتەيتىن ەلگە اينالدىرۋ, سان ءتۇرلى سەبەپتەرمەن بىرنەشە عاسىر بويىندا دۇنيەجۇزىلىك وركەنيەتتەن شەتتەتىلىپ قالعان ەلدى جەر جاھانعا تانىتۋ, ءتىپتى ەقىۇ تاريحىندا العاش رەت ازيالىق مەملەكەتتى, العاش رەت تمد مەملەكەتىن, العاش رەت حالقىنىڭ نەگىزگى بولىگى مۇسىلمان ءدىنىن ۇستاناتىن تۇركىتىلدەس ۇلت ۇيىسىپ وتىرعان مەملەكەتتى ەۋروپاعا توبە بي بولاتىنداي بيىككە كوتەرۋ, 56 ەلدىڭ باسىن بىرىكتىرەتىن بەدەلدى ۇيىمعا تاماشا توراعالىق جاساۋ جانە سول ۇيىمنىڭ ون ءبىر جىلدان بەرى شاقىرىلماي جۇرگەن ءسامميتىن ۇيىمداستىرۋ, استانا دەكلاراتسياسىن قابىلدانۋىنا قول جەتكىزۋ, ەكسپو سىندى الەمدىك كورمەنى ۇيىمداستىرۋ قۇقىن ازۋى التى قارىس ەلدەرمەن جانتالاستى باسەكەدە جۇلىپ الىپ شىعۋ, ءدۇيىم دۇنيە كوز تىككەن سول سىناقتان ابىرويمەن ءوتۋ, دۇنيەنى دەندەپ تۇرعان داعدارىستار داۋىلىندا, ءوز ەلىن ناعىز تۇراقتىلىق ارالىنا اينالدىرۋ, وسىنشا جىل بويى حالقىنىڭ تاڭىن تىنىش اتىرىپ, كەشىن تىنىش باتىرۋ, وعان قوسا الەمنىڭ قيىر-قيىرىنداعى داۋ-دامايدى رەتتەۋگە ارالاسۋ, مەملەكەتارالىق مامىلەگەر بيىگىنە كوتەرۋ, ەلىمىزدىڭ الەمنىڭ ەڭ بەدەلدى ۇيىمىنىڭ ەڭ قۋاتتى قۇرىلىمىنا – بۇۇ-نىڭ قاۋىپسىزدىك كەڭەسىنە تۇراقتى ەمەس مۇشەلىككە ورتالىق ازيا وڭىرىنەن ءبىرىنشى بولىپ سايلانۋىنا, ءوزىنىڭ بەيبىتشىل, جاڭاشىل ۇسىنىستارى بۇۇ اياسىندا قابىلدانۋىنا قول جەتكىزۋ, باسقا دا قىرۋار شارۋانى شىپ-شىرعاسىن شىعارماي شەشۋ, ەڭ باستىسى – ەلدىڭ ەكونوميكالىق قۋاتىن سان ەسەلەپ ارتتىرۋ, ەڭ ەڭسەلى ەلۋلىككە ەنۋ مىندەتىن مەرزىمىنەن بۇرىن اتقارعان سوڭ ەڭ وزىق وتىزدىققا ۇمتىلۋ, سول جولدا ناقتى قادامدار جاساۋ, حالىقتىڭ رۋحىن جاڭعىرتۋ, ادامداردىڭ جانىن جاڭالاۋ تەك ۇلتتىڭ ۇلى پەرزەنتىنىڭ عانا قولىنان كەلەدى. مۇنى اشىپ ايتۋ ءبىزدىڭ اقيقات الدىنداعى پارىزىمىز. وسىنىڭ ءبارىن سىعىمداپ جەتكىزگەنى ءۇشىن ەل پرەزيدەنتىنە بولەكشە رازىلىعىمىزدى ايتقىمىز كەلەدى.
وسىدان توعىز جىل بۇرىن ءبىز ەل گازەتى Egemen Qazaqstan-نىڭ ماتەريالدارىنان قۇراستىرعان «ەلباسى» اتتى قوماقتى كىتاپقا جازعان العىسوزىمىزدە «ەلباسى» ءسوزىن «پرەزيدەنت» ءسوزىنىڭ قازاقى بالاماسىنداي عانا قاراۋ ۇعىمنىڭ ماعىناسىن تارىلتاتىنىن ايتا كەلىپ: «ەل باسشىسىنىڭ ءبارىن ەلباسى دەۋگە بولمايدى. ەلباسى – ەلدىڭ باسى. ەلدىكتىڭ باسى. ەلدىڭ, ەلدىكتىڭ باسىندا, باستاۋىندا تۇرعان ادام. ەل بولۋدى باستاپ بەرگەن, ەلدى ورناتىپ بەرگەن ادام. ەلباسى – مەملەكەتقۇرۋشى» دەپ جازعان ەدىك. قاسىم-جومارت توقاەۆ ەلباسى ۇعىمىنا بايلانىستى دا بيىك بايلامىن ءبىلدىردى. مۇنىڭ ءوزى ساياساتتاعى ساباقتاستىقتىڭ ساقتالاتىنىن عانا ەمەس, ەلدىڭ كەلەر كۇنگە ۇكىلەگەن ءۇمىتىنىڭ اقتالاتىنىن دا كورسەتەدى.
ساۋىتبەك ابدراحمانوۆ,
ءماجىلىس دەپۋتاتى
