ەڭ باستىسى بيلىكتىڭ جوعارعى ساتىسىنداعى اۋقىمدى وزگەرىس تىكەلەي كونستيتۋتسياعا سايكەس جۇزەگە اسىرىلعاندىقتان, ىڭ-شىڭسىز, ءوتىپ, سارسەنبىنىڭ ساتىندە قازاقستاننىڭ جاڭا پرەزيدەنتى قاسىم-جومارت توقاەۆتىڭ پارلامەنت پالاتالارىنىڭ بىرلەسكەن وتىرىسىندا انت قابىلداۋ راسىمىنە جالعاستى.
قوس پالاتا – سەنات پەن ءماجىلىستىڭ دەپۋتاتتارى, ۇكىمەت مۇشەلەرى, شەتەلدىك ديپلوماتيالىق وكىلدىكتەر مەن قوعام وكىلدەرى جانە جۋرناليستەر قاتىسقان بىرلەسكەن وتىرىستى ءماجىلىس توراعاسى نۇرلان نىعماتۋلين اشىپ, ءزاۋلىم زالعا الدىمەن سالتاناتتى جاعدايدا قازاقستاننىڭ مەملەكەتتىك تۋى مەن كونستيتۋتسياسى اكەلىندى.
مۇنان سوڭ بىرلەسكەن وتىرىس وتەتىن زالعا قازاقستاننىڭ تۇڭعىش پرەزيدەنتى, ەلباسى نۇرسۇلتان ءابىش ۇلى نازارباەۆ كىرگەن ساتتە كوپشىلىك ورىندارىنان تۇرىپ, ۇزدىكسىز قول شاپالاقتارىمەن قوشەمەت كورسەتتى.
تاۋەلسىز قازاقستاننىڭ ەكىنشى پرەزيدەنتى رەتىندە انت قابىلداۋعا قاسىم-جومارت توقاەۆ كەلگەن ساتتە دە پرەزيدەنتكە لايىق قۇرمەت كورسەتىلدى.
وتىرىس ءتارتىبى بويىنشا ءسوز العان كونستيتۋتسيالىق كەڭەس توراعاسى قايرات ءمامي: «تاۋەلسىز قازاقستاننىڭ نەگىزىن قالاۋشى, قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان ءابىش ۇلى نازارباەۆ ءوزىنىڭ كونستيتۋتسيالىق قۇقىعىن جانە دە تاريحي ميسسياسىن تولىقتاي ىسكە اسىرىپ, قازاقستان رەسپۋبليكاسىنىڭ پرەزيدەنتى وكىلەتتىگىن ءوز ەركىمەن توقتاتتى. مۇنداي جاعدايدا قازاقستان رەسپۋبليكاسى كونستيتۋتسياسى 48-بابىنىڭ 1-تارماعىنا سايكەس قازاقستان رەسپۋبليكاسى پرەزيدەنتىنىڭ وكىلەتتىگى قالعان مەرزىمگە پارلامەنت سەناتىنىڭ توراعاسى قاسىم-جومارت كەمەل ۇلى توقاەۆقا كوشەدى. قازاقستان رەسپۋبليكاسى كونستيتۋتسياسىنىڭ 42-بابىنا سايكەس قازاقستان رەسپۋبليكاسىنىڭ پرەزيدەنتى قازاقستان حالقىنا انت بەرگەن ساتىنەن باستاپ قىزمەتىنە كىرىسەدى», دەدى.
نەگىزگى كونستيتۋتسيالىق تالاپ جەتكىزىلگەن سوڭ, وڭ قولىن اتا زاڭعا قويعان قاسىم-جومارت توقاەۆ: «قازاقستان حالقىنا ادال قىزمەت ەتۋگە, قازاقستان رەسپۋبليكاسىنىڭ كونستيتۋتسياسى مەن زاڭدارىن قاتاڭ ساقتاۋعا, ازاماتتاردىڭ قۇقىقتارى مەن بوستاندىقتارىنا كەپىلدىك بەرۋگە, قازاقستان رەسپۋبليكاسى پرەزيدەنتىنىڭ وزىمە جۇكتەلگەن مارتەبەلى مىندەتىن ادال اتقارۋعا سالتاناتتى تۇردە انت ەتەمىن», دەدى.
بۇدان سوڭ ەلىمىزدىڭ كوك بايراعىنا ەرىن تيگىزىپ, قۇرمەتىن كورسەتتى. بۇل سالتاناتتى ءراسىم ەلىمىزدىڭ ءانۇرانىنىڭ ورىندالۋىنا ۇلاستى.
اسا قادىرلى ەلباسى! قۇرمەتتى پارلامەنت دەپۋتاتتارى, ۇكىمەت مۇشەلەرى! قىمباتتى وتانداستار! 19 ناۋرىزدا, بۇكىل الەم جۇرتشىلىعى اسا ماڭىزدى تاريحي وقيعاعا كۋا بولدى. قازاق مەملەكەتتىلىگىنىڭ نەگىزىن قالاعان ۇلى تۇلعا, قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان ءابىش ۇلى نازارباەۆ ءوز ەركىمەن مەملەكەت باسشىسى وكىلەتتىگىن توقتاتتى. ەلباسىنىڭ بۇل ماڭىزدى شەشىمى ونىڭ جاھاندىق دەڭگەيدە جانە تاريحي اۋقىمدا تانىلعان ساياسي قايراتكەر رەتىندەگى ۇلىلىعىن كورسەتتى. بۇل شەشىم مەملەكەتىمىزدىڭ بولاشاعىنا دەگەن ەڭ جوعارعى شىنايى قامقورلىقتان تۋىنداپ وتىر, دەپ باستادى ءسوزىن ق.توقاەۆ.
ء«بىز بارلىق جەتىستىكتەرىمىزگە, ەڭ الدىمەن قازاقستان رەسپۋبليكاسىنىڭ قاستەرلى تاۋەلسىزدىگىنە تۇڭعىش پرەزيدەنتىمىز نۇرسۇلتان ءابىش ۇلى نازارباەۆتىڭ قاجىرلى ەڭبەگىنىڭ ارقاسىندا قول جەتكىزدىك. ەلباسى كەڭەس وداعى كۇيرەگەن تۇستاعى اسا كۇردەلى گەوساياسي جاعدايدا جاڭا مەملەكەتتىڭ نەگىزىن قالاپ, ونىڭ كوشىن باستادى. كوپتەگەن تەرىس بولجامعا قاراماستان, نۇرسۇلتان ءابىش ۇلى ەلىمىزدى بارشا الەمگە مويىنداتا ءبىلدى. دۇنيە ءجۇزى كارتاسىندا دامۋ مەن دەموكراتيانىڭ, بەيبىتشىلىك پەن كەلىسىمنىڭ شىنايى سيمۆولىنا اينالعان مەملەكەت پايدا بولدى. ەلباسىمىز قازاقستان تاريحىندا تۇڭعىش رەت جاڭا مەملەكەتتىك ينستيتۋتتاردى قالىپتاستىردى.
ولاردىڭ قاتارىندا پرەزيدەنتتىك ينستيتۋت, قوس پالاتالى پارلامەنت, مەملەكەتتىك قىزمەت, قارۋلى كۇشتەر, ديپلوماتيالىق قىزمەت, سونداي-اق ازاماتتىق قوعام ينستيتۋتتارى بار, دەدى ءارى قاراي مەملەكەت باسشىسى.
پرەزيدەنت ءسوزىن 1995 جىلى اتا زاڭىمىز قابىلداندى, دەپ جالعاستىردى. كونستيتۋتسياعا ەنگىزىلگەن مازمۇندى وزگەرتۋلەر باس قۇجاتىمىزعا, شىن مانىندە, دەموكراتيالىق سيپات بەردى. ەلباسىنىڭ باسشىلىعىمەن قازاقستاندا ەكونوميكانى جاڭعىرتۋعا باعىتتالعان رەفورمالار جوسپارلى تۇردە جۇزەگە اسىرىلدى.
سونىمەن قاتار مەملەكەتتىڭ ساياسي جۇيەسىندە ەلەۋلى وزگەرىستەر بولدى.
قۇرىلىمدىق رەفورمالار مەملەكەت دامۋىنىڭ باستى قوزعاۋشى كۇشىنە اينالدى. ەلباسىنىڭ جانىندا ۇزاق جىلدار بويى قىزمەت ەتكەن ادام رەتىندە نىق سەنىممەن ايتارىم: پرەزيدەنت ءوزىنىڭ ەڭبەك جولىن بيىك ماقساتقا – حالقىمىزدىڭ ءال-اۋقاتىن ارتتىرۋعا ارناعان بىردەن-ءبىر تۇلعا بولىپ سانالادى.
ق.توقاەۆ نۇرسۇلتان ءابىش ۇلى نازارباەۆتىڭ قازىردىڭ وزىندە الەم تاريحىنا اسا كورنەكتى رەفورماتور رەتىندە ەنگەنىنە نازار اۋداردى. ول قازاقستاندى الەمنىڭ ەڭ باسەكەگە قابىلەتتى 50 ەلىنىڭ توبىنا ەنگەن زاماناۋي, الدىڭعى قاتارلى مەملەكەتكە ترانسفورماتسيالاي الدى. ونىڭ ەكونوميكالىق جانە ساياسي رەفورمالارى سارابدال مەملەكەتتىك ساياساتتىڭ سيمۆولىنا اينالدى. سوندىقتان شەتەلدىك ساراپشىلار ەلباسىنىڭ رەفورمالارىنا «قازاقستان جولى» نەمەسە «قازاقستان مودەلى» دەگەن اتاۋ بەردى. ەلباسىنىڭ رەفورمالارى قازاقستاندى ورنىقتى دامۋ تراەكتورياسىنا شىعاردى. قازاقستان رەسپۋبليكاسى بارلىق ەكونوميكالىق كورسەتكىشتەر بويىنشا ورتالىق ازيا ءوڭىرىنىڭ كوشباسشىسىنا اينالدى, بۇرىنعى كەڭەستىك كەڭىستىكتە الدىڭعى ورىندارعا جايعاستى, دەدى مەملەكەت باسشىسى.
قاسىم-جومارت كەمەل ۇلىنىڭ سوزىنشە, قازاقستان ۇلتتىق قوردا ءىرى قارجى رەسۋرستارىن شوعىرلاندىرا الدى, بۇل داعدارىستىق جاعدايلاردا الەۋمەتتىك-ەكونوميكالىق سيپاتتاعى ءبىرىنشى كەزەكتەگى مىندەتتەردى شەشۋگە مۇمكىندىك بەرەدى. ەلباسى ەكونوميكاعا ينۆەستيتسيا تارتۋدى باعدارعا الدى.
سونىڭ ارقاسىندا قازاقستان ورتالىق ەۋروپانى قوسا العاندا, بۇكىل پوستسوتسياليستىك كەڭىستىكتە جان باسىنا شاققانداعى تىكەلەي شەتەلدىك ينۆەستيتسيا كولەمى بويىنشا كوش باستادى. ءبىزدىڭ ەلىمىزگە 300 ميلليارد دوللاردان استام تىكەلەي شەتەلدىك ينۆەستيتسيا كەلدى. نۇرسۇلتان ءابىش ۇلى نازارباەۆ تاۋەلسىزدىكتىڭ العاشقى جىلدارىنان باستاپ حالىقتىڭ الەۋمەتتىك جاعدايىن جاقسارتۋ ءۇشىن نارىقتىق ەكونوميكاسى بار قۋاتتى مەملەكەت قۇرۋ ىسىنە بىلەك سىبانا كىرىستى. قيىندىققا تولى وسى جولدا ول تەڭدەسسىز تابىستارعا قول جەتكىزدى.
ەلباسىنىڭ ءار جولداۋىندا, اسىرەسە 2018 جىلدىڭ ناۋرىز جانە قازان ايلارىنداعى جولداۋلارىندا, سونداي-اق «Nur Otan» پارتياسىنىڭ حVIII سەزىندە سويلەگەن سوزىندە ەل مۇددەسىن كوزدەگەن شىنايى جاناشىرلىق كورىنىس تاپتى. ەل ازاماتتارىنا الەۋمەتتىك قولداۋ كورسەتۋگە ارنالعان بۇل قۇجاتتار باسقا ەلدەردە بالاماسى جوق بىرەگەي شارالاردى قامتيدى.
مەملەكەتىمىز بارلىق حالىقتار مەن ءدىني كونفەسسيالار اراسىنداعى ۇيلەسىمنىڭ, كەلىسىمنىڭ, تولەرانتتىلىقتىڭ اۋماعىنا اينالدى. تەرريتورياسى جونىنەن الەمدەگى توعىزىنشى ەلدەگى بەرىك بەيبىتشىلىك, ۇلتتىق بىرلىك حالىقارالىق تۇراقتىلىق پەن قاۋىپسىزدىكتى قامتاماسىز ەتۋدىڭ ماڭىزدى فاكتورى بولىپ سانالادى. تاۋەلسىزدىكتىڭ ارايلى اق تاڭىندا-اق بىرەگەي ينستيتۋت – قازاقستان حالقىنىڭ اسسامبلەياسى قۇرىلعان بولاتىن. الەمدىك دىندەردىڭ, تىلدەردىڭ, مادەنيەتتەر مەن داستۇرلەردىڭ تاريحي سينتەزىنىڭ ارقاسىندا قازاقستاندا بەيبىتشىلىك پەن كەلىسىم ساياسي مادەنيەتىمىزدىڭ اجىراماس بولشەگىنە اينالعان قوعام قالىپتاستى. ەلباسى جاساعان بەيبىتشىلىك پەن قوعامدىق كەلىسىم مودەلى قوعامدى ۇيلەسىمدى دامىتۋدىڭ ەتالونى رەتىندە الەمدىك تۇرعىدا مويىندالدى.
قازاقستان حالقىنىڭ ورتاق تاريحي تاعدىرى, سونداي-اق تاۋەلسىزدىكتىڭ ارقاسىندا قول جەتكىزگەن تابىستارىمىز «ماڭگىلىك ەل» تۇجىرىمداماسىندا باياندالدى, دەپ ساباقتادى ءسوزىن پرەزيدەنت. بۇل قۇجاتتا بارشاعا ورتاق ماقسات, ورتاق مۇددە, حالقىمىزدىڭ كەمەل كەلەشەگى ۇيلەسىم تاپقان. ەلباسىنىڭ ۇسىنىسىمەن ۇلت بىرلىگىن نىعايتۋ جولىندا قۋاتتى كۇشكە اينالعان «ماڭگىلىك ەل» پاتريوتتىق اكتىسى قابىلداندى. تاۋەلسىزدىك جىلدارىندا ۇلتتىق ۇستانىمعا ادال, شىنايى سۇيىسپەنشىلىك رۋحىندا تاربيەلەنگەن جاس ازاماتتاردىڭ تۇتاس ءبىر بۋىنى قالىپتاستى. بۇعان ەلباسى جۇزەگە اسىرعان جاستار ساياساتىنىڭ, مازمۇنى بىرەگەي «رۋحاني جاڭعىرۋ» جانە « ۇلى دالانىڭ جەتى قىرى» اتتى ماقالالارىنىڭ ىقپالى بولدى. ەلباسىنىڭ قاجىرلى ەڭبەگىنىڭ ارقاسىندا حالقىمىز ءتول تاريحىندا تۇڭعىش رەت ءوزىن تۋعان جەردىڭ زاڭدى يەسى سەزىندى, بارشامىزدىڭ جۇرەگىمىزدى وتان ءۇشىن ماقتانىش سەزىمى كەرنەدى.
پرەزيدەنت «قازاقستان-2050» ستراتەگياسى, «نۇرلى جول» جاڭا ەكونوميكالىق ساياساتى, «100 ناقتى قادام» ۇلت جوسپارى ەلىمىزدى جاڭعىرتۋعا, قازاقستاننىڭ ەكونوميكالىق الەۋەتىن ودان ءارى نىعايتۋعا باعىتتالعانىنا توقتالىپ ءوتىپ, مۇنىڭ حالىقارالىق ارەناداعى تۇراقسىزدىق پەن داعدارىستار جاعدايىندا اسا ماڭىزدى بولىپ وتىرعانىن كولدەنەڭ تارتتى. قازىرگى قازاقستان – نارىقتىق ەكونوميكاسى قالىپتاسقان, دەموكراتيالىق ءارى زايىرلى مەملەكەت. ەلىمىزدە جەكەمەنشىك ينستيتۋتى ورنىعىپ, ورتا تاپتىڭ جاعدايى جاقساردى جانە كاسىپكەرلىك قارقىندى دامي ءتۇستى. بارلىق وزەكتى الەۋمەتتىك-ەكونوميكالىق ماسەلەلەر ۋاقتىلى شەشىمىن تاۋىپ كەلەدى. حالىقارالىق نارىقتارداعى قارجى-ەكونوميكالىق داعدارىستارعا قاراماستان, قازاقستاندا ەكونوميكانى رەفورمالاۋ مەن جاڭعىرتۋ ۇردىستەرى تابىستى جالعاسۋدا. يندۋستريالىق قۋات نىعايىپ كەلەدى. عىلىمي ازىرلەنىمدەر وندىرىسكە ەنگىزىلۋدە, ەكونوميكانى جانە قوعامدىق ءومىردى تسيفرلاندىرۋ جۇرگىزىلۋدە.
ەلىمىزدە «بيزنەستىڭ جول كارتاسى», «اگروبيزنەس», «جۇمىسپەن قامتۋ» سياقتى باعدارلامالار جۇزەگە اسىرىلۋدا. كەزەكتە ستراتەگيالىق ماڭىزدى ينفراقۇرىلىمدىق جوبالاردى اياقتاۋ جۇمىسى تۇر. بۇلار – «نۇرلى جول» باعدارلاماسى, باتىس قىتاي – باتىس ەۋروپا, ترانسكاسپيلىك حالىقارالىق كولىك باعىتى. قازاقستان ءىس جۇزىندە جاھاندىق ماندەگى كولىك-لوگيستيكالىق حابقا اينالىپ كەلەدى, بۇل ونىڭ ەكونوميكالىق الەۋەتىن ايتارلىقتاي كۇشەيتەتىن بولادى. قازاقستان الەمدىك ءبىلىم بەرۋ كەڭىستىگىندە دە لايىقتى ورىندى يەلەندى. ءبىزدىڭ ەل ەرەسەكتەردىڭ ساۋاتتىلىق دەڭگەيى بويىنشا ادام دامۋىنىڭ يندەكسى ءتىزىمىنىڭ ءبىرىنشى شيرەگىندە تۇر. قازاقستان ادام دامۋىنىڭ دەڭگەيى جوعارى مەملەكەتتەر توبىنا كىردى, دەدى ق.توقاەۆ.
قازاقستان رەسپۋبليكاسىنىڭ تۇڭعىش پرەزيدەنتىنىڭ ارقاسىندا «بولاشاق» باعدارلاماسى جۇزەگە اسىرىلۋدا, دەگەن مەملەكەت باسشىسى الەۋەتى ايرىقشا «نازارباەۆ ۋنيۆەرسيتەت» قۇرىلىپ, بارلىق وبلىس ورتالىقتارىندا زياتكەرلىك مەكتەپتەر اشىلعانىن اتاپ كورسەتتى.
ەلىمىزدىڭ ءار وڭىرىندە قازىرگى كەزەڭنىڭ تالاپتارىنا ساي زاماناۋي مەكتەپتەر سالىندى. مىڭداعان ازاماتتارىمىز شەتەلدە جانە ەل ىشىندە ساپالى جوعارى ءبىلىم الۋ مۇمكىندىگىنە يە بولدى. ۇلت دەنساۋلىعى, دەنساۋلىق ساقتاۋ سالاسىن دامىتۋ جانە سالاماتتى ءومىر سالتىن قالىپتاستىرۋ قازاقستاننىڭ ەكونوميكالىق جانە الەۋمەتتىك ىلگەرىلەۋىنىڭ ماڭىزدى فاكتورلارىنا اينالدى. حالىقتىڭ دەنساۋلىعىنا, ادامداردىڭ ءومىر ءسۇرۋ جاسىن ۇزارتۋعا, بالا تۋ دەڭگەيىنە قاتىستى وڭ كورسەتكىشتەرگە قول جەتكىزىلدى. وسى جەتىستىكتىڭ ءبارى دۇنيەجۇزىلىك دەنساۋلىق ساقتاۋ ۇيىمى تاراپىنان مويىندالدى, دەدى پرەزيدەنت.
نۇرسۇلتان ءابىش ۇلى نازارباەۆتىڭ باستاماسىمەن ىسكە اسىرىلعان «مادەني مۇرا» باعدارلاماسى ءتول مادەنيەتىمىزدىڭ دامۋىنا تىڭ سەرپىن بەردى.
قوجا احمەت ياساۋي كەسەنەسى, «تامعالى» ەسكەرتكىشتەرى جانە باسقا دا تاريحي نىسانداردىڭ يۋنەسكو-نىڭ دۇنيەجۇزىلىك مۇرالارىنىڭ تىزىمىنە ەنۋى حالقىمىز ءۇشىن ايرىقشا ماڭىزى بار وقيعا بولدى.
جاڭا ەلوردامىزدىڭ بوي كوتەرۋىنە تۇڭعىش پرەزيدەنتىمىزدىڭ سىڭىرگەن ەڭبەگى ەرەكشە. استانانىڭ قۇرىلىسى ەلباسىنىڭ تاريحي ەرلىگى سانالادى. باس قالامىز تاۋەلسىز ەلىمىزدىڭ شىنايى بەت-بەينەسىنە, حالقىمىزدىڭ ماقتانىشىنا اينالدى. ەلوردا جاڭا مەملەكەتتىڭ يدەولوگياسى رەتىندە كيەلى ۇعىمعا يە بولدى. استانامىز, شىن مانىندە, وتكەننىڭ قۇندىلىقتارىن دارىپتەي وتىرىپ, كۇللى الەمگە قازاقستاننىڭ جاڭا بەينەسىن پاش ەتتى. ەلوردامىز سامميتتەر جانە باسقا دا ماڭىزدى حالىقارالىق كەزدەسۋلەر وتەتىن ءىرى ورتالىق رەتىندە قالىپتاستى. 2017 جىلى استانادا «بولاشاق ەنەرگياسى» تاقىرىبىنا ارنالعان ەكسپو كورمەسى ءوتتى.
وسىلاي دەي كەلە ق.توقاەۆ قازاقستاننىڭ ءوز ۇلتتىق تاريحىندا العاش رەت حالىقارالىق كەلىسىمدەرمەن زاڭدىق نەگىزدە بەكىتىلگەن مەملەكەتتىك شەكاراسىنا يە بولۋى دا ەلباسىنىڭ تاريحي ەڭبەگى ەكەنىن ەرەكشە اتادى. قازىر ول تاتۋ كورشىلىك پەن ىنتىماقتاستىقتىڭ شەكاراسى, بۇل دا قازىرگى زامانعى گەوساياسي احۋالدا ايرىقشا ماڭىزدى. نۇرسۇلتان ءابىش ۇلى نازارباەۆ بۇكىل الەمگە ەۋرازيالىق ەكونوميكالىق وداقتى قۇرۋدىڭ باستاماشىسى, ەۋرازيالىق ينتەگراتسيانىڭ ءشۇباسىز جاقتاۋشىسى رەتىندە تانىلدى. ول تاۋەلسىز مەملەكەتتەر دوستاستىعى, شانحاي ىنتىماقتاستىق ۇيىمى, ازياداعى ءوزارا ءىس-قيمىل جانە سەنىم شارالارى جونىندەگى كەڭەس سياقتى بەدەلدى حالىقارالىق ۇيىمداردىڭ باستاۋىندا تۇردى. ەلباسىنىڭ ارقاسىندا استانادا ەقىۇ-نىڭ تاريحي ءسامميتى ءوتتى, الەمدىك جانە ءداستۇرلى دىندەر كوشباسشىلارىنىڭ سەزى, كوپتەگەن وزگە دە حالىقارالىق فورۋمدار تۇراقتى نەگىزدە ءوتىپ تۇرادى.
قازاقستان جاھاندىق بىتىمگەرلىك پروتسەستەردىڭ بەدەلدى, ىقپالدى قاتىسۋشىسىنا اينالدى, بۇۇ قاۋىپسىزدىك كەڭەسىنە سايلاندى, يادرولىق قارۋدى تاراتپاۋ جانە قارۋسىزدانۋ جونىندەگى جاھاندىق قوزعالىستىڭ ليدەرى, سونداي-اق دىنارالىق ۇنقاتىسۋدىڭ العاۋسىز دەلدالى رەتىندە الەمگە مويىندالدى. ءبىز, قازىرگى جانە كەلەشەك ۇرپاق وكىلدەرى, ەلباسىنىڭ ساياسي مۇراسىن جادىمىزدان شىعارماي, قادىر تۇتىپ, نۇرسۇلتان ءابىش ۇلى نازارباەۆتىڭ تاريحي ەڭبەگىنە لايىقتى قۇرمەت كورسەتۋىمىز قاجەت. ەلباسىنىڭ حالقىمىزعا جانە الەمدىك قوعامداستىققا سىڭىرگەن ەرەن ەڭبەگى مەن ۇلى ەسىمىن ماڭگى ەستە ساقتاۋىمىز كەرەك. بۇل حالقىمىزدى, اسىرەسە جاستاردى تاريحقا قۇرمەتپەن قاراۋعا تاربيەلەپ, ەلباسىنىڭ داڭقتى قىزمەتىن ءادىل باعالاۋ ءۇشىن ماڭىزدى.
ۇلى زامانداسىمىزدىڭ, قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان ءابىش ۇلى نازارباەۆتىڭ ەسىمىن كەلەسىدەي شارالار ارقىلى ماڭگىلىككە ۇلىقتاۋ قاجەت دەپ ەسەپتەيمىن, دەگەن پرەزيدەنت وسىعان قاتىستى ءوزىنىڭ بىرقاتار ۇسىنىسىن ورتاعا سالدى.
ءبىزدىڭ ەلوردامىز ونىڭ ەسىمىن يەلەنىپ, نۇرسۇلتان اتالۋى ءتيىس. مۇنداي ۇسىنىس پارلامەنتشىلەر تاراپىنان قازاقستان رەسپۋبليكاسىنىڭ تاۋەلسىزدىگىنە وراي 2016 جىلى 23 قاراشادا قابىلدانعان دەكلاراتسيادا ايتىلعان بولاتىن. مەملەكەتىمىزدىڭ ەلورداسىندا قازاقستان رەسپۋبليكاسىنىڭ تۇڭعىش پرەزيدەنتىنىڭ قۇرمەتىنە مونۋمەنت ورناتۋ. بارلىق وبلىستىق قالالاردىڭ ورتالىق كوشەلەرىن نۇرسۇلتان ءابىش ۇلى نازارباەۆتىڭ ەسىمىمەن اتاۋ. ەلباسى مەملەكەتىمىزدىڭ ەڭ جوعارعى حالىق قاھارمانى جانە ەڭبەك ەرى اتاقتارىمەن ماراپاتتالۋعا لايىق ەكەنىنە ءبارى كەلىسەدى دەپ ويلايمىن. ەلباسىنا سونداي-اق قۇرمەتتى سەناتور مارتەبەسىن دە بەرۋ كەرەك. تۇڭعىش پرەزيدەنت – ەلباسى بەينەلەنگەن بارلىق پورترەتتەر مەن فوتوسۋرەتتەر قوعامدىق ورىنداردىڭ, مەملەكەتتىك قىزمەتشىلەر كابينەتىنىڭ, وقۋ ورىندارى عيماراتتارىنىڭ اجىراماس اتريبۋتى رەتىندە قالادى. ەلباسىنىڭ بۇكىل ءومىر-تىرشىلىگى تۇڭعىش پرەزيدەنت – ەلباسى تۋرالى زاڭعا جانە باسقا دا زاڭنامالىق اكتىلەرگە سايكەس قامتاماسىز ەتىلەدى. ەلباسىنىڭ بارلىق قىزمەتتىك ينفراقۇرىلىمى ساقتالادى. بۇل رەتتە, پارلامەنت قابىلداعان زاڭدارعا سايكەس, نۇرسۇلتان ءابىش ۇلى نازارباەۆ ەلىمىزدەگى جالعىز ءارى ومىرلىك ەلباسى بولىپ قالاتىنىن قاپەرگە الۋ قاجەت, دەدى ق.توقاەۆ.
تۇڭعىش پرەزيدەنت – ەلباسىنىڭ سونداي-اق قاۋىپسىزدىك كەڭەسىنىڭ توراعاسى, «Nur Otan» پارتياسىنىڭ توراعاسى, قازاقستان حالقى اسسامبلەياسىنىڭ توراعاسى, كونستيتۋتسيالىق كەڭەستىڭ مۇشەسى بولىپ تابىلاتىنىنا نازار اۋدارىلدى. ەلباسىنىڭ بەدەلدى پىكىرى ستراتەگيالىق سيپاتتاعى شەشىم ازىرلەۋ مەن قابىلداۋ كەزىندە ايرىقشا, باسىمدىقتى مانگە يە بولادى. وسىلايشا ءبىز بيلىكتى تىنىش, قاقتىعىسسىز جاعدايدا وتكىزۋدى جۇزەگە اسىرامىز, بۇل ىشكى تۇراقتىلىقتى جانە قازاقستاننىڭ حالىقارالىق بەدەلىن نىعايتۋدى قامتاماسىز ەتۋدىڭ قۋاتتى فاكتورى بولادى. حالقىمىزدىڭ جوعارى ساياسي مادەنيەتى, ونىڭ ەرەكشە دانالىعىنىڭ تاعى ءبىر كورىنىسى وسىدان كورىنبەك. بۇل – بولاشاق ۇرپاق ءۇشىن دە جاقسى ونەگە.
بۇگىن, وسى جوعارى مىنبەردەن ءوزىمنىڭ ساياسي ۇستازىم نۇرسۇلتان ءابىش ۇلى نازارباەۆقا الەمدىك دامۋدىڭ كۇردەلى كەزەڭىندە ەل پرەزيدەنتى رەتىندە مەملەكەتتى باسقارۋىما زور سەنىم ارتقانى ءۇشىن شىن جۇرەكتەن العىس ايتامىن, دەدى ءسوزىنىڭ سوڭىندا ق.توقاەۆ. الداعى ميسسيامنىڭ جاۋاپكەرشىلىك اۋقىمىن تولىق سەزىنە وتىرىپ, ءوز ءبىلىمىم مەن تاجىريبەمدى ەلباسىنىڭ ستراتەگيالىق باعىتىنىڭ ساباقتاستىعىن جان-جاقتى قامتاماسىز ەتۋگە باعىتتاۋدى جوسپارلاپ وتىرمىن. بارشامىزعا ورتاق ماقسات – ەلباسىنىڭ باستى ساياسي جانە تاريحي مۇراسى – مەملەكەتىمىزدىڭ تاۋەلسىزدىگىن ساقتاۋ جانە نىعايتۋ.
پرەزيدەنتتىك وكىلەتتىگىنەن ءوز ەركىمەن باس تارتۋ ارقىلى نۇرسۇلتان ءابىش ۇلى نازارباەۆ دەموكراتيالىق قۇندىلىقتارعا ادال ۇلى ساياساتكەر رەتىندە بۇكىل الەمگە ءوزىنىڭ مەملەكەتتىك دانالىعىن تاعى دا كورسەتتى. ول ءدال وسى قاسيەتىمەن وتاندىق جانە الەمدىك تاريحقا ەنىپ وتىر. مەملەكەتىمىزدىڭ دامۋىنداعى وسى ءبىر ماڭىزدى ساتتە قوعام وركەندەۋشى, دەموكراتيالىق, ادىلەتتى قازاقستان قۇرىلىسىن ءارى قاراي جالعاستىرۋ يدەياسى توڭىرەگىندە تۇتاسۋى ءتيىس.
الدىمىزدا ەل بولاشاعى ءۇشىن اتقارىلاتىن اۋقىمدى ءارى كۇردەلى جۇمىستار تۇر. بارلىق كۇش-جىگەرىمدى, ءبىلىمىمدى قازاقستان يگىلىگىنە جۇمساۋدى, حالقىمىزعا ادال قىزمەت ەتۋدى باستى مىندەت سانايمىن. وسى زالداعى دەپۋتاتتارعا, ۇكىمەت مۇشەلەرىنە, مەملەكەتتىك قىزمەتشىلەرگە, جۇرتشىلىق پەن بۇقارالىق اقپارات قۇرالدارىنىڭ وكىلدەرىنە, ديپلوماتيالىق كورپۋسقا تۇسىنىستىك مەن قولداۋلارى ءۇشىن العىس ايتامىن.
مەملەكەت باسشىسى ءسوزىن: اسا قادىرلى ەلباسى! قۇرمەتتى قاۋىم! مەنىڭ قازاقستان رەسپۋبليكاسىنىڭ پرەزيدەنتى لاۋازىمىنداعى ءبىرىنشى شەشىمىم – «قازاقستان رەسپۋبليكاسىنىڭ تۇڭعىش پرەزيدەنتى – ەلباسى تۋرالى» كونستيتۋتسيالىق زاڭعا جانە «مەملەكەتتىك ناگرادالار تۋرالى» زاڭعا سايكەس تاۋەلسىز قازاقستاندى ورناتۋعا قوسقان تاريحي ۇلەسى, ەكونوميكالىق جانە الەۋمەتتىك-گۋمانيتارلىق دامۋعا, قازاقستان قوعامىن توپتاستىرۋعا سىڭىرگەن اسا زور ەڭبەگى ءۇشىن قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان ءابىش ۇلى نازارباەۆقا ايرىقشا ەرەكشەلىك بەلگىسى – «التىن جۇلدىز» وردەنىن تاپسىرا وتىرىپ, «حالىق قاھارمانى» اتاعىن بەرەمىن, دەپ قورىتتى.
ءراسىم بارىسىندا قازاقستان رەسپۋبليكاسىنىڭ تۇڭعىش پرەزيدەنتى – ەلباسىنا «حالىق قاھارمانى» اتاعى بەرىلىپ, «التىن جۇلدىز» ايرىقشا بەلگىسى تابىس ەتىلدى.
سەرىك ابدىبەك,
«Egemen Qazaqstan»
