ەۋروايماققا كىرگەنگە اسىقپاعان ءجون
جۇما, 7 قىركۇيەك 2012 7:27
پولشا ۇكىمەتى سونداي پىكىردە. سىرتقى ىستەر ءمينيسترى رادوسلوۆ سيكورسكي ءوز ەلىنىڭ ەۋروايماققا بۇل ەكونوميكالىق قاۋىمداستىق وزدەرىنىڭ قارىزدىق پروبلەمالارىن تولىق شەشىپ بولعان سوڭ عانا كىرەتىنىن رەسمي مالىمدەدى. مۇنداي مالىمدەمەنىڭ ايتارلىقتاي ساياسي استارى بار.
جۇما, 7 قىركۇيەك 2012 7:27
پولشا ۇكىمەتى سونداي پىكىردە. سىرتقى ىستەر ءمينيسترى رادوسلوۆ سيكورسكي ءوز ەلىنىڭ ەۋروايماققا بۇل ەكونوميكالىق قاۋىمداستىق وزدەرىنىڭ قارىزدىق پروبلەمالارىن تولىق شەشىپ بولعان سوڭ عانا كىرەتىنىن رەسمي مالىمدەدى. مۇنداي مالىمدەمەنىڭ ايتارلىقتاي ساياسي استارى بار.
پولشانىڭ كىرۋ-كىرمەۋىنەن بۇل ەكونوميكالىق قۇرىلىمنىڭ كۇشى ارتىپ نەمەسە كەمي قويمايدى. بىراق كىرمەيمىن دەپ, وعان كوڭىلى تولماعانداي مالىمدەمە جاساۋى ايماق بەدەلىنە ايتارلىقتاي نۇقسان كەلتىرەدى. سول ەكونوميكالىق ايماقتاعى جەتەكشى ەلدەر, ەڭ الدىمەن گەرمانيا مەن فرانتسيا, ەكونوميكاسى ابدەن قوجىراعان گرەكيانىڭ ءوزىن بۇل قۇرىلىمنان شىعارماۋ ءۇشىن نەگە بارمادى دەيسىڭ! قايتا-قايتا قوماقتى مولشەردە نەسيەلەر ۇسىندى, قارىزدارىن كەشىرىپ جاتتى. سونداعى ماقسات – بۇل ايماقتىڭ بەدەلىن تۇسىرمەۋ, ونىڭ ومىرشەڭدىگىن دالەلدەۋ.
سيكورسكيدىڭ: «ءبىز ءوز حالقىمىزعا ەۋروايماققا كىرۋ قاۋىپسىز دەپ ايتا الاتىن كەزدە عانا كىرە الامىز», دەگەن ءسوزى ايتارلىقتاي اۋىر سيپاتتاما. دەمەك, قازىرگى كەزدە وعان كىرۋ قاۋىپتى بولعانى. سونىمەن بىرگە, مينيستر ەۋروپالىقتار وزدەرىن ءدال قازىرگى الاساپىرانداۋ كەزدە كىرمەدىڭدەر دەپ وكپەلەمەۋگە ءتيىس دەپ وداقتاستارىنا دا سالماق سالدى.
ال بىلە-بىلسە, ەۋروايماق ءوزىنە پولشانىڭ قازىر كىرگەنىنە سونشالىقتى قۇشتار دا بولىپ وتىرعان جوق. ويتكەنى, مااستريحت شارتىنىڭ تالاپتارىنا قاراعاندا, پولشا ەكونوميكاسى بۇل قۇرىلىمعا كىرۋگە تەك 2015 جىلى عانا سايكەس كەلەدى ەكەن.
كوپشىلىك ادەتتە ەۋرووداق پەن ەۋروايماقتى ءبىر ۇعىمداي قارايتىنى بار. شىن مانىندە مۇلدە بولەك قۇرىلىمدار. جالپى, ەۋرووداق ەلدەرىنىڭ ەكونوميكالىق ساياساتى ءبىر باعىتتا بولعانىمەن, قارجىلىق قۇرىلىمىنداعى ەرەكشەلىك ايتارلىقتاي. وداققا كىرەتىن 27 ەلدىڭ تەك 17-ءسى عانا ەۋرو ۆاليۋتاسىنىڭ ايماعىنا كىرەدى. ءبىراز ەلدەر ورتاق ۆاليۋتانى قابىلداماي, وزدەرىنىڭ ءتول اقشالارىن ساقتاپ قالعان. بىراق كوپ ەل, اسىرەسە, ەۋرووداققا جاڭا كىرگەن ەلدەر كۇننىڭ كۇنىندە ەۋرو ۆاليۋتاسىن قابىلداۋدى ماقسات تۇتادى, مۇنى وزدەرىنىڭ ورتاق ەكونوميكاعا كىرىگۋىنىڭ باستى شارتى سانايدى.
بۇعان دەيىن ەۋرووداققا زار ەڭىرەپ ءجۇرىپ كىرگەن ەلدەردىڭ ىشىندە ەۋروايماققا كىرۋدى كەيىنگە قالدىرۋ جونىندە مالىمدەمە جاساعان بولگاريا بولدى. بۇل ەلدىڭ قارجى ءمينيسترى سيمەون ديانكوۆ قازىرگى كەزدە ەۋروايماققا كىرۋدەن ەشقانداي پايدا كورىپ وتىرماعاندىعىن ايتتى. مۇنى ول كۇماندى ءىس سانايدى. ءتىپتى ول وزدەرىنىڭ «كەيبىرەۋلەردى دەفولتتان قۇتقارۋعا قاتىسۋ» مۇمكىندىگىن العا توستى. ارينە, بولگارياعا قاراپ قالعان دۇنيە جوق. بۇل ەلدىڭ ەۋرووداققا, سونداي-اق ەۋروايماققا بارى مەن جوعى بىردەي. مۇنداي مالىمدەمە جاساپ, بولگارلار ازىن-اۋلاق بەدەل جيناعىسى كەلەدى.
سوڭعى كەزدە ەۋرووداقتىڭ بولاشاعى تۋرالى اڭگىمە كوپ. بىرەۋلەر ونىڭ كۇيرەيتىنى تۋرالى ايتۋعا قۇمار. راس, گرەكيا, يرلانديا, پورتۋگاليا سياقتى ەلدەر ۇلتتىق بانكروتقا ۇشىراۋعا شاق قالدى. ولاردى ەۋرو ايماعىنداعى الەۋەتتى ەلدەر قۇتقارىپ قالدى. مۇنى ەۋروايماقتىڭ ءالسىزدىگىنە ەمەس, كەرىسىنشە, اكتيۆىنە قوسۋعا بولماس پا ەدى؟ بۇل ايماقتا بولماعاندا, ولار كۇيرەر ەدى عوي.
كەيبىر ساراپشىلار الداعى ۋاقىتتا ءبىراز ەلدەر, ەڭ الدىمەن قارجىلىق كۇيرەۋ شەگىندە تۇرعان ەلدەر ەۋروايماقتان كەتۋى مۇمكىن دەيدى. سولاي بولعاندا, ول ەۋروايماقتىڭ كۇيرەۋىنە ەمەس, قايتا ءالسىز ەلدەردەن ارىلىپ, نىعايۋىنا اپارسا كەرەك.
ماماديار جاقىپ, «ەگەمەن قازاقستان».
