- جاقىندا الەم چەمپيوناتىنان ورالعانىمىزدى بىلەسىزدەر. وكىنىشكە قاراي, الەمدىك دودا مەن ءۇشىن دە, كوماندا ءۇشىن دە ايتارلىقتاي ءساتتى بولعان جوق. چەمپيونات الدىنداعى وقۋ-جاتتىعۋ جيىنىندا جاراقاتىم مازالادى. مۇنىڭ دا تيگىزگەن اسەرى بار. 500 مەتردە پەنالتي الىپ, جارىستان شەتتەتىلدىم. ال 1500 مەتردە كوڭىل كونشىتەرلىكتەي ناتيجە بولعان جوق. جالپى العاندا, ماۋسىم تارتىسقا تولى بولدى. الەم كۋبوگى كەزەڭدەرىنىڭ ءوزى ۇلكەن ساباق. ەندى, مىنە, استاناعا جينالىپ, ەل بىرىنشىلىگىن وتكىزۋدەمىز. قازاقستان چەمپيوناتى اياقتالعان سوڭ 20 كۇندەي دەمالىس الامىز. وتباسىم جانە بالالارىممەن قاۋىشاتىن كۇندى ساعىنىپ ءجۇرمىن, - دەيدى سپورتشى.
جۇماعازيەۆتىڭ ايتۋىنشا, شورت-ترەكشىلەر ءۇشىن دەمالىس ۇزاققا سوزىلمايدى. ساناۋلى كۇننەن سوڭ كوماندا قايتا جينالىپ, وقۋ-جاتتىعۋ جيىندارىنا كىرىسەدى.
- دەمالىس اياقتالعان سوڭ رەسەي قۇراماسىمەن بىرلەسكەن وقۋ-جاتتىعۋ جيىندارى باستالادى. ءداستۇر بويىنشا الەم كۋبوگى كەزەڭدەرى مەن الەم چەمپيوناتىنا دايىندالامىز. ءبىزدىڭ سپورتتا وليمپيادا ويىندارىنا ىرىكتەۋ سىنى الدەقايدا ەرتە باستالادى. سول سەبەپتى, تەزىرەك جينالىپ, جولداما يەلەنۋگە تىرىسۋ كەرەك. 1500 مەتردە ۇزدىك 32 سپورتشىعا, 500 مەتردە 28 سپورتشىعا ليتسەنزيا بەرىلەدى. ەڭ قيىنى – ەستافەتادان جولداما الۋ. مۇندا 8 كوماندا عانا وليمپياداعا قاتىسا الادى. ءبىر-بىرىمەن يىق تىرەستىرگەن ۇزدىكتەر ىشىنەن سۋىرىلىپ شىعۋ قيىن. دەگەنمەن, بىزگە وسى قيىندىقتى ارتقا تاستاۋ قاجەت. وسىنداي تارتىسقا دايىن بولۋ ءۇشىن ماۋسىمدى ەرتەرەك باستايمىز, - دەيدى شورت-ترەكشى.
كوماندا ۇزدىكتەرىنىڭ ءبىرى قۇرامانىڭ جاس سپورتشىلارىمەن تولىققانىنا قۋانىشتى. تالانتتى جاستارمەن بىرگە ەستافەتادان وليمپيادا ويىندارىنا جولداما الۋ مۇمكىندىگى ارتا تۇسپەك.
- ءبىزدىڭ كوماندا ەستافەتادان جاقسى ناتيجە كورسەتە الادى. مۇنى ءوزىمىز دە بىلەمىز, شەتەلدىكتەر دە ءبىزدىڭ مىقتى ەكەنىمىزدى ايتادى. بىراق ۇنەمى بىردەڭە جەتىسپەي تۇراتىنداي كورىنەدى. كەيدە قۇلاپ قالامىز, كەيدە جارىستان شەتتەتەدى. ەستافەتادان الەم چەمپيوناتىنا قاتىسا الماي قالدىق. ەندى وسى ولقىلىقتىڭ ورنىن تولتىرۋعا مىندەتتىمىز. شورت-ترەكتەگى ەستافەتا باسەكەسى تارتىسقا جانە كۇتپەگەن ناتيجەلەرگە تولى. ماسەلەن, 2018 جىلعى وليمپيادا ويىندارىنا ىرىكتەۋ كەزەڭىندە ۆەنگريالىقتار 8-ءشى ورىنعا تابان تىرەپ, جولداماعا اۋپىرىمدەپ ءجۇرىپ قول جەتكىزدى. الايدا, وليمپيادا چەمپيونى اتاعىن تاپ سولار يەلەنىپ كەتتى. سول سەكىلدى, بيىلعى ماۋسىمدا وڭتۇستىك كورەيا سپورتشىلارى ءدال وسىنداي ناتيجە كورسەتتى. دەمەك, بىزگە دە ءوز الەۋەتىمىزدى كورسەتەتىن كەز جەتتى. باپكەرلەرمەن اقىلداسىپ, جاقسى كورسەتكىشمەن قۋانتۋعا تىرىسامىز, - دەدى نۇربەرگەن جۇماعازيەۆ.
