شاراينا
بەيسەنبى, 26 قاڭتار 2012 7:29
توڭكەرىستىڭ ءبىر جىلدىعى اتالىپ ءوتتى
ەگيپەتتە حوسني مۋباراكتى بيلىكتەن تايدىرعان رەۆوليۋتسيانىڭ ءبىر جىلدىعى تويلانۋدا.
جاڭا وكىمەت بۇل كۇندى بارىنشا كەڭ كولەمدە اتاپ وتپەك نيەتتە. ەگيپەتتە 30 جىلعا سوزىلعان توتەنشە جاعداي رەجىمى ءوز كۇشىن جويدى. وسى كۇننەن باستاپ بۇل ەلدە ۇلتتىق رەۆوليۋتسياعا بايلانىستى ەكى مەملەكەتتىك مەرەكە اتالىپ وتپەكشى. ولاردىڭ ءبىرىنشىسى, انتيمونارحيالىق توڭكەرىستى بىلدىرەتىن 23 شىلدەدە اتالسا, ەكىنشىسى 25 قاڭتار كۇنىنە بەلگىلەنىپ وتىر. سونىمەن بىرگە, توڭكەرىستەن كەيىن ءبىر جىل وتكەندە وزگەرىستەردى تالاپ ەتكەن حالىق تاعى دا تاحرير الاڭىنا جينالۋدا.
بەيسەنبى, 26 قاڭتار 2012 7:29
توڭكەرىستىڭ ءبىر جىلدىعى اتالىپ ءوتتى
ەگيپەتتە حوسني مۋباراكتى بيلىكتەن تايدىرعان رەۆوليۋتسيانىڭ ءبىر جىلدىعى تويلانۋدا.
جاڭا وكىمەت بۇل كۇندى بارىنشا كەڭ كولەمدە اتاپ وتپەك نيەتتە. ەگيپەتتە 30 جىلعا سوزىلعان توتەنشە جاعداي رەجىمى ءوز كۇشىن جويدى. وسى كۇننەن باستاپ بۇل ەلدە ۇلتتىق رەۆوليۋتسياعا بايلانىستى ەكى مەملەكەتتىك مەرەكە اتالىپ وتپەكشى. ولاردىڭ ءبىرىنشىسى, انتيمونارحيالىق توڭكەرىستى بىلدىرەتىن 23 شىلدەدە اتالسا, ەكىنشىسى 25 قاڭتار كۇنىنە بەلگىلەنىپ وتىر. سونىمەن بىرگە, توڭكەرىستەن كەيىن ءبىر جىل وتكەندە وزگەرىستەردى تالاپ ەتكەن حالىق تاعى دا تاحرير الاڭىنا جينالۋدا.
بايلار سالىقتى كوبىرەك تولەمەك
اقش پرەزيدەنتى باراك وباما كونگرەستە ەلدەگى جاعداي تۋرالى جىل سايىنعى ءداستۇرلى جولداۋىن جاسادى.
ول اقش بۇگىندە بۇرىنعىدان دا كۇشتى, امەريكا تۋى الەمدە اسقاق بيىككە كوتەرىلدى دەي وتىرىپ, سونىمەن بىرگە ەل ەكونوميكاسىنىڭ داعدارىستان ءالى تۇپكىلىكتى وڭالىپ كەتە الماعانىن دا مويىندادى. وبامانىڭ ويىنشا, جاعدايدى بايلارعا سالىناتىن سالىقتىق ستاۆكانى كوبەيتەتىن سالىق رەفورماسى عانا تۇزەي الادى. ساراپشىلار ب.وبامانىڭ كونگرەستەگى ءسوزىن پرەزيدەنتتىڭ سايلاۋالدى باعدارلاماسى دەپ باعالاپ وتىر.
فرانتسيا اسكەرىن شىعارۋعا اسىقپايدى
فرانتسيا ءوزىنىڭ اۋعانستانداعى اسكەري كونتينگەنتىن وسى ەلدەن شىعارۋعا اسىعار ەمەس.
بۇل تۋرالى ەلدىڭ سىرتقى ىستەر ءمينيسترى الەن جيۋپپەنىڭ مالىمدەمەسىنە سىلتەمە جاساي وتىرىپ, جەرگىلىكتى باق حابارلاعان. فرانتسۋز پارلامەنتى دەپۋتاتتارىنىڭ سۇراقتارىنا جاۋاپ قايتارعان جيۋپپە پاريج ءوز اسكەرىن شۇعىل تۇردە شىعارۋدى قاراستىرىپ وتىرعان جوق, ءبارى جايباراقات جانە ۇيىمداسقان تۇردە جۇزەگە اسۋى كەرەك دەپ اتاپ كورسەتكەن. مينيستر مالىمدەمەسىنىڭ پاريجگە اۋعانستان پرەزيدەنتى حاميت كارزايدىڭ ساپارى قارساڭىندا جاسالىپ وتىرعانىن دا ايتا كەتۋ قاجەت.
جاپونياداعى ساۋدا بالانسى تاپشىلىعى
جاپونيادا سوڭعى 30 جىلدا ساۋدا بالانسىنىڭ تاپشىلىعى تىركەلدى, دەپ حابارلاعان فرانتس-پرەسس اگەنتتىگى.
جاپونيا قارجى مينيسترلىگى حابارلاعان مالىمەتتەر بويىنشا 2011 جىلدىڭ قورىتىندىسىندا ساۋدا بالانسىنىڭ تاپشىلىعى 2,49 تريلليون يەندى (شامامەن 32 ملرد. اقش دوللارى) قۇراعان. ەسەپتى مەرزىم ىشىندە يمپورت كولەمى 12 پايىزعا ءوسىپ, ەكسپورت 2,7 پايىزعا تومەندەگەن. قارجى مينيسترلىگى ساۋدا بالانسى تاپشىلىعىنىڭ نەگىزگى سەبەبى رەتىندە وتكەن جىلدىڭ ناۋرىزىنداعى ءزىلزالا مەن تسۋنامي زارداپتارىن جانە ۇلتتىق ۆاليۋتا باعامىنىڭ جوعارىلىعىن كەلتىرىپ وتىر.
كاددافي جاقتاستارىنىڭ شابۋىلى
ليۆيانىڭ بۇرىنعى پرەزيدەنتى مۋاممار كاددافيگە ادالدىعىن ساقتاپ قالعان كۇشتەر بەني-ۆاليد قالاسىن باسىپ الدى, دەپ حابارلادى اسسوشەيتەد پرەسس اگەنتتىگى.
جۇرگىزىلگەن وپەراتسيا ناتيجەسىندە 4 ادام قازا تاۋىپ, 20 ادام دەنە جاراقاتتارىن العان. بەني-ۆاليد قالاسىنىڭ الىنۋى ليۆيانىڭ بيلىكتەن تايدىرىلعان ۇكىمەتىنە ادالدىعىن ساقتاپ قالعان كۇشتەردىڭ العاشقى ۇيىمداسقان اسكەري وپەراتسياسى. وتپەلى ۇلتتىق كەڭەس جاساقتارىنىڭ بريگاداسى قالا سىرتىنا تىقسىرىلىپ شىعارىلعان. ءسويتىپ, قۇلاعان رەجىمنىڭ تۋى قالا ۇستىندە قايتادان جەلبىرەي باستادى.
كاپيتاليزمنىڭ بولاشاعى تالقىلانباق
شۆەيتساريانىڭ داۆوس قالاسىندا 42-ءشى دۇنيەجۇزىلىك ەكونوميكالىق فورۋم ءوز جۇمىسىن باستادى.
فورۋمدا العاشقىلاردىڭ ءبىرى بولىپ كاپيتاليزمنىڭ بولاشاعى تالقىلانباقشى. « ۇلى ترانسفورماتسيا: جاڭا مودەلدەردى قالىپتاستىرۋ» بيىلعى فورۋمنىڭ باستى تاقىرىبى بولماق. سونىمەن بىرگە فورۋمدا قارالاتىن ماسەلەلەردىڭ قاتارىندا ەۋروايماقتاعى داعدارىس ماسەلەسى دە بار. ۇيىمداستىرۋشىلار بيىلعى جيىنعا ەكى جارىم مىڭنان استام ادام قاتىسادى دەپ بولجاپ وتىر.
مۋزىكانت ساياسي ويىننان باس تارتتى
روللينگ ستوۋنز توبىنىڭ ليدەرى ميك دجاگگەر داۆوستاعى حالىقارالىق ەكونوميكالىق فورۋم بارىسىندا ۇلىبريتانيا پرەمەر-ءمينيسترى دەۆيد كەمەرون وتكىزەتىن شاي ءىشۋ راسىمىنە قاتىسۋدان باس تارتتى.
مۋزىكانتتىڭ اتالمىش ءىس-شاراعا قاتىسۋ ارقىلى كونسەرۆاتيۆتىك پارتياعا ءوزىنىڭ قولداۋىن بىلدىرەتىندىگى تۋرالى بىرقاتار بريتاندىق گازەتتەر جازعان بولاتىن. دجاگگەر بولسا ول حابارلاردى جوققا شىعارا وتىرىپ, ءوزىنىڭ ساياسي پارتيالار قىزمەتىنە ارالاسۋدى ۇناتپايتىنىن جانە ءوزىن «ساياسي فۋتبول» ويىنىنا تارتۋدى قالامايتىنىن ايتىپ, شاقىرۋدان باس تارتقانىن مالىمدەگەن.
امەريكالىق سەرجانت ءۇش ايعا سوتتالدى
2005 جىلى يراكتىڭ 25 تۇرعىنىن ءولتىردى دەپ ايىپتالعان اقش-تىڭ اسكەري قىزمەتشىسى تۇرمەگە قامالمايتىن بولدى.
سەرجانت فرەنك ءۆۋتريچتىڭ ىسىنە قاتىستى ۇكىم تاياۋ ۋاقىتتاردا شىعارىلماق. بىراق اسكەري سوتتىڭ شەشىمى قازىردىڭ وزىندە بەلگىلى. يراكتىڭ 24 بەيبىت ازاماتىن ولتىرگەن اقش تەڭىز جاياۋ اسكەرىنىڭ سەرجانتى ف.ۆۋتريچكە 3 اي تۇرمەدە وتىرۋ جازاسى كەسىلىپ, سونىمەن بىرگە ول ايلىق جالاقىسىنىڭ 75 پايىزى مولشەرىندە ايىپپۇل تولەيتىن بولدى.
اپاتقا كومپانيا مەنەدجەرى كىنالى
«كوستا كونكورديا» كاپيتانى فرانچەسكو سكەتتينو لاينەردىڭ اپاتقا ۇشىراۋىنا Carnival كومپانياسىنىڭ مەنەدجەرى كىنالى دەپ مالىمدەدى.
كاپيتاننىڭ ايتۋىنشا, ءدال وسى مەنەدجەر ونى جاعالاۋعا تىم جاقىن كەلۋگە ماجبۇرلەگەن. بۇل تۋرالى ول تەلەفون ارقىلى سويلەسكەن كەزدە ايتقان كورىنەدى. وربەتەللو قالاسىنداعى پوليتسيا ۋچاسكەسىندە قاماۋدا وتىرعان كەزدە ايتقان كاپيتاننىڭ ءسوزىن پوليتسيا قۇپيا تۇردە جازىپ العان. ازىرگە كاپيتانعا قىسىم كورسەتكەن ادامنىڭ كەمە بورتىندا نەمەسە جاعالاۋدا بولعانى بەلگىسىز كۇيىندە قالىپ وتىر.
ينتەرنەت ماتەريالدارى نەگىزىندە ازىرلەندى.
