كەشە ساعات كەشكى 22:18-دە «101» ءورت ءسوندىرۋ بايلانىسىنىڭ ورتالىق پۋلتىنە بۇحار جىراۋ كوشەسىندە ورنالاسقان تۇرعىن ۇيدە ەلەكتروقالقاننىڭ جانۋى تۋرالى حابار ءتۇستى. وقيعا ورنىنا تەز ارادا مامانداندىرىلعان ءورت ءسوندىرۋ ءبولىمىنىڭ كەزەكشى قاراۋىلى جونەلتىلدى. شاقىرۋ ورنىنا جەتكەن كەزدە قۇتقارۋشىلار 8 قاباتتى «كامال-4» تۇرعىن ءۇي كەشەنىندەگى پاتەردىڭ بالكونى مەن جاتىن بولمەسىندە جيھاز, ورگتەحنيكا, كيىم-كەشەك سياقتى زاتتاردىڭ جانىپ جاتقانىن انىقتاعان بولاتىن. ءورت 15 شارشى مەتردى شارپىعان.
ء«تۇتىن كىرەبەرىستىڭ بارلىق قاباتتارىنا تارالىپ, تۇرعىنداردىڭ سىرتقا شىعۋ جولدارىنا كەدەرگى كەلتىرىپ, ادامداردىڭ ومىرىنە قاۋىپ توندىرگەن. ءورت ورنىنا كەلگەن ءورت ءسوندىرۋ بولىمشەلەرى ءورت ءسوندىرۋ كەزەكشى قىزمەتىنىڭ جالپى باسشىلىعىمەن ادامداردى قۇتقارۋعا كىرىستى. قۇتقارۋ جۇمىستارىنا اۆتوساتىلار جانە گاز-تۇتىنەن قورعاۋ قىزمەتىنىڭ بۋىندارى جۇمىلدىرىلدى», – دەلىنگەن استانا قالاسى تجد ءباسپاسوز قىزمەتى تاراتقان حابارلامادا.
جەكە قۇرام جوعارعى قاباتتارداعى پاتەرلەردىڭ تەرەزەلەرىنەن باسپالداقتىڭ كومەگىمەن 25 ادامدى قۇتقارىپ الدى. قۇتقارىلعانداردىڭ 10-ى – بالالار. جالىن ساعات 22:46-تا اۋىزدىقتالىپ, 22:58-دە تولىقتاي ءوشىرىلدى. الدىن الا بولجامدارعا سايكەس ءورت ەلەكتر سىمدارىنىڭ قىسقا تۇيىقتالۋىنىڭ سالدارىنان شىققان. ءورت سالدارىنان ەكى ەر ادام, ءبىر ايەل جانە ەكى بالا ءيىستى گازدان ورتاشا دەڭگەيدە ۋلانىپ, اۋرۋحاناعا جەتكىزىلدى. ءورتتى سوندىرۋگە استانا قالاسى تجد 5 ءورت ءسوندىرۋ تەحنيكاسى مەن جەكە قۇرامنىڭ 23 ادامى جۇمىلدىرىلدى.
