ومبى وبلىسىنىڭ دەلەگاتسياسىنىڭ قۇرامىندا مەملەكەتتىك ورگاندار مەن بيزنەس-قۇرىلىمداردىڭ وكىلدەرى بار. قوناقتار پاۆلودار وبلىسىنىڭ اۋىل شارۋاشىلىق جانە ونەركاسىپتىك كاسىپورىندارىن, ونىڭ ىشىندە «پاحار» شق, «نەفتەحيم LTD جشس-ءى, «پاۆلودار» ارنايى ەكونوميكالىق ايماعىنداعى زاۋىتتاردى جانە باسقا دا نىسانداردى ارالايدى. دەلەگاتسيانىڭ رەسمي باعدارلاماسى بويىنشا «Open Pavlodar» فرونت-كەڭسەسىنە, نازارباەۆ زياتكەرلىك مەكتەبىنە جانە قۇقىق قورعاۋ قىزمەتتەرى ورتالىعىنا بارۋ كوزدەلىپ وتىر.
ەكى ايماقتىڭ باسشىلارىنىڭ رەسمي كەزدەسۋى «قازاقستان ەلەكتروليز زاۋىتى» اق-ىڭ الاڭىندا وتەدى. كەزدەسۋدىڭ قورىتىندىسى بويىنشا بولات باقاۋوۆ پەن الەكساندر بۋركوۆ پاۆلودار مەن ومبى اراسىنداعى ارىپتەستىكتى دامىتۋعا باعىتتالعان قۇجاتقا قول قويادى.
سونىمەن قاتار وسى كۇنى ەكى وبلىستىڭ كاسىپكەرلەرىنىڭ كەزدەسۋلەرى وتەدى. پاۆلودار مەن ومبى ايماقتارى كاسىپورىندارىنىڭ وكىلدەرى اقپاراتتىق تەحنولوگيالار, ەلەكتر قۇرالدارىن جاساپ شىعارۋ, ساۋدا جانە تۋريزم سالاسىندا ءوزارا مەموراندۋمدار مەن كەلىسىمدەرگە قول قويادى.
