– قازىرگى تاڭدا ءۇندىستاندا ەلىمىزگە قايتا الماي جۇرگەن وتانداستارىمىز تۋرالى ايتىپ بەرسەڭىز؟
– ءۇندىستان مەن پاكىستان اراسىندا اسكەري-ساياسي جاعدايدىڭ شيەلەنىسۋىنە بايلانىستى 27 اقپاندا اۋە كەڭىستىگى جابىلعان بولاتىن. ناتيجەسىندە AirAstana كومپانياسىنىڭ 4 اۋە رەيسى كەيىنگە شەگەرىلدى. سونداي-اق قازاقستاندىق اۋە كومپانياسىنىڭ پايدالانعان ءوز ازاماتتارىمىز بەن باسقا جولاۋشىلارعا قيىندىق كەلتىرىپ وتىر.
AirAstana كومپانياسى 27 اقپان كۇنى ۇشۋى ءتيىس 168 جولاۋشىنى ءوز كۇشىمەن قوناق ۇيگە ورنالاستىرىپ, تاماق ۇلەستىردى. ال 28 اقپاندا ولار باسقا جول ارقىلى قازاقستانعا قايتتى.
– ەلىمىزدىڭ ديپلوماتتارى قازاقستاندىقتارعا قانداي كومەك كورسەتتى؟
– ەلشىلىكتە جەدەل جۇمىس توبى قۇرىلىپ, 120 جولاۋشىعا كەيىنگى ۋاقىتقا نە باسقا اۋە كومپانيالارىنا بيلەت اپەرىلدى. ال 18 ازاماتىمىزدى ەلشىلىكتىڭ عيماراتىنا ۋاقىتشا ورنالاستىردىق. ولاردىڭ تۋىستارىمەن بايلانىسىپ, تاماق بەرىلدى. ەرتەڭىنە قوناق ۇيگە ورنالاستىردىق.
قازىرگى تاڭدا 304 جولاۋشىنىڭ ماسەلەسى ءالى كۇن تارتىبىندە تۇر. اتاپ ايتار بولساق, AirAstana كومپانياسىنىڭ 1 ناۋرىزدا دەلي-الماتى باعىتىنا بيلەت العان 170 ادام بار.
سونداي-اق ەلشىلىك تاۋلىك بويى ازاماتتارىمىزعا قولداۋ كورسەتۋگە ءازىر. ول ءۇشىن +91 11 455 55 110 جانە +91 99 109 27 641 نومىرلەرىنە حابارلاسۋعا بولادى.
– قالعان جولاۋشىلاردى ەلگە اكەلۋ بويىنشا قانداي شارالار جاسالىپ جاتىر؟
– AirAstana كومپانياسىنىڭ دەرەكتەرىنە سۇيەنسەك, اۋە كەڭىستىگى اشىلعان جاعدايدا قالعان جولاۋشىلاردى اكەلۋ ءۇشىن قوسىمشا ۇشاق اكەلۋ قاراستىرىلعان. وسى ورايدا مىنانى ەسكەرە كەتكەن ءجون. باسقا بيلەت ساتىپ الۋ دا قيىندىق تۋعىزادى. ويتكەنى كوپتەگەن حالىقارالىق اۆياكومپانيا رەيستەرىن كەيىنگە شەگەرىپ جاتىر.
ءبىز وقيعانىڭ قالاي ءوربيتىنىن باقىلايمىز جانە ازاماتتارىمىزعا كومەك قولىن سوزامىز. AirAstana كومپانياسى ءوزىنىڭ ءيميدجىن ساقتاپ قالۋ ءۇشىن كليەنتتەرىنە وسىنداي قىسىلتاياڭ شاقتا تاماقپەن جانە جاتىن ورىنمەن قامتاماسىز ەتەدى دەپ ويلايمىن.
– ءۇندىستاندا قانشا قازاقستان ازاماتى بار؟ كاشميردە شە؟
– قازىرگى تاڭدا ءۇندىستاننىڭ كونسۋلدىق ەسەبىندە قازاقستاننىڭ 15 ازاماتى تىركەلگەن. ايتا كەتەرلىگى, دجاممۋ مەن كاشمير ايماعىندا قازاقستاندىق جوق. كونسۋلدىق ءبولىم ەسەپتە تۇرعان وتانداستارىمىزدىڭ بارىمەن ءاردايىم حابار الىپ وتىر. سونداي-اق دجاممۋ مەن كاشمير ايماعىنا بارۋ ءۇشىن ءۇندىستان ىشكى ىستەر مينيسترلىگىنەن ارنايى رۇقسات الۋ قاجەت.
– ۇندىستانعا بارۋدى جوسپارلاعان ازاماتتارىمىز نەنى ەسكەرۋى كەرەك؟
– ۇندىستانعا ساپارىن جوسپارلاعان قازاقستاندىقتارعا اۋە كەڭىستىگىنىڭ جابىلعانىن ەسكەرۋىنە كەڭەس بەرەمىز. مۇنداي جاعداي اۋە رەيستەرىنىڭ كەيىنگە شەگەرىلۋىنە اكەلىپ سوعۋى مۇمكىن.
قاۋىپسىزدىكتى قامتاماسىز ەتۋ ءۇشىن دەليدەگى قازاقستان ەلشىلىگىمەن بايلانىس ورناتىپ, جاعدايدىڭ وزگەرۋىنە قاتىستى اقپارات الىپ وتىرۋعا كەڭەس بەرەمىز.
– سۇحباتىڭىزعا راحمەت!
