جالپى, العىس ايتۋدا جاي عانا سوزبەن شەكتەلىپ قالماي, ونى ىسىمىزبەن كورسەتە ءبىلۋىمىز كەرەك. ياعني, ءاربىر جاسالعان جاقسىلىققا جاندى جىلىتاتىن ءىلتيپات سوزدەرمەن العىسىمىزدى ءبىلدىرىپ, ارەكەت ەتىپ وتىرعان ابزال.
قازىرگى تاڭدا ءار ادام ءوزىنىڭ حال-قادەرىنشە شىنايى ىقىلاسپەن يگىلىكتى ءىس جاساپ ءجۇر. مەنىڭ باعىتىم عىلىم مەن ءبىلىم سالاسى بولعان سوڭ, كوبىنە وسى باعىتتا ءبىلىمىمدى شەت مەملەكەتتەردە شىڭداپ, تەرەڭدەتۋدەمىن. العان ءبىلىمىمدى ەلىمىزدە شاقىرىلعان اۋديتوريالاردا ءدارىس وقىپ, تاجىريبەممەن بولىسەمىن. سونىمەن قاتار ءوزىمنىڭ كىتاپقۇمارلىعىمنىڭ ارقاسىندا قازاقستاندا جارىققا شىعىپ جاتقان عىلىمي ەڭبەكتەرگە, كىتاپتارعا جانە مونوگرافيالارعا ءوز ۇلەسىمدى قوسىپ كەلەمىن. بيىل جىلدار بويى قولعا الىپ جۇرگەن بىرنەشە ەڭبەگىمنىڭ باسىن قوسىپ, جاقسى ءبىر تۋىندىنى وقىرماننىڭ نازارىنا ۇسىنباقشىمىن.
مەنىڭ شەتەلدەن وقىپ كەلىپ, جامبىل وبلىسى, تالاس اۋدانىنىڭ سالىق كوميتەتىندە زاڭگەر بولىپ جۇمىسقا ورنالاسقان كەزىم – ومىرىمدەگى اسەرلى ءسات. سول جەردەگى جەرگىلىكتى حالىقتىڭ مەنى وتە جىلى قابىلداعانى سونشالىق, قاراتاۋلىق دوستارىم پاتەردە جالعىز قالدىرماي, ءوز ۇيلەرىنە الىپ كەتكەن بولاتىن. ءسويتىپ مەن دوسىمنىڭ شاڭىراعىندا سول ءۇيدىڭ بالاسىنا اينالىپ, ءبىر-بىرىمىزبەن جاقىن باۋىر بولىپ كەتكەن ەدىك. مۇنىمەن مەنىڭ ايتپاعىم, قازاق حالقىنىڭ كەڭ پەيىلدى, دارحان مىنەزدى قاسيەتتەرى مەنىڭ جۇرەگىمدى باۋراپ العان-دى.
وسى كۇندە قازاقستانعا جەر اۋدارىلىپ كەلگەن ەتنوستار وزدەرىن قۇشاق جايا قارسى العان قازاق حالقىنا شەكسىز العىستارىن كوز جاستارىمەن جەتكىزۋدە. تاريحتا باستان كەشكەندەرىن, ۇلت رەتىندە قازاق جەرىندە تۇراقتاپ, ۇرپاق جالعاستىرعاندارى تۋرالى كەيىنگى ۇرپاققا ونەگە, وسيەت ەتىپ قالدىرىپ كەلەدى.
ەلباسى ن.ءا. نازارباەۆ: «قازاقستان حالقى اسسامبلەياسى قۇرىلعان كۇن – 1 ناۋرىزدى جىل سايىن بارلىق ەتنوستار ءبىر-بىرىنە العىس ايتىپ, مەيىرباندىق تانىتىپ, ول ادامداردى ءوز تۋعانىنداي قابىلداعان قازاقتارعا العىس ايتۋ كۇنى رەتىندە اتاپ ءوتۋ ادىلەتتى بولار ەدى. ول كۇن ءبىزدى بۇرىنعىدان دا جاقىنداستىرا تۇسپەك. بۇل كۇن مەيىرىمدىلىكتىڭ, بۇكىل قازاقستاندىقتاردىڭ ءبىر-بىرىنە دەگەن دوستىعى مەن ماحابباتىنىڭ جارقىن مەرەكەسى بولا الار ەدى», – دەگەن بولاتىن.
ءبىزدىڭ بىرلەستىكتە حالىق اراسىنداعى بىرلىك پەن جاراسىمدىققا جانە جاس ۇرپاققا ۇلگى بەرەتىن تاربيەلى ءىس-شارالارعا كوپتەپ ءمان بەرەمىز. بۇل ەلباسىنىڭ ساياساتىن قولداۋىمىزدى بىلدىرەدى. سونىمەن قاتار قاريالارىمىز بەن ارداگەرلەرىمىزدى قۇرمەتتەپ, ولارعا شەكسىز العىسىمىزدى ءىس-ارەكەتىمىزبەن بىلدىرەمىز.
ءسوزىمدى ءتامامداي كەلە, باۋىرمال قازاق حالقىنىڭ قۇشاق اشقان كەڭ جۇرەگىنە بارشا ەتنوستارمەن بىرگە ءوزىمنىڭ ريزاشىلىعىمدى جەتكىزەمىن. العىس ايتۋ كۇنىن مەرەكەلەي وتىرىپ, ءاربىر كۇنىمىزدەگى العىستى ارەكەتىمىز ارقىلى جەتكىزىپ وتىرساق, ءبىر عانيبەت بولار ەدى.
قازاق ەلىنە مىڭ العىس!
شەرزود پۋلاتوۆ,
قازاقستان حالقى اسسامبلەياسى عىلىمي-ساراپشىلىق كەڭەسىنىڭ مۇشەسى, «نۇر وتان» پارتياسىنىڭ مۇشەسى, استانا قالاسى وزبەك ەتنومادەني بىرلەستىگىنىڭ توراعاسى
