«نۇر وتان» پارتياسىنىڭ سەزىندە ەلباسى از قامتىلعان جانە كوپ بالالى وتباسىلار توبىنا اتاۋلى الەۋمەتتىك كومەك كورسەتۋدىڭ جاڭا ءتارتىبى جايىندا ەلەۋلى مەملەكەتتىك باستامالار ۇسىندى. ولار حالىقتىڭ ءال-اۋقاتىن جاقسارتۋعا ءتيىمدى ىقپال ەتەدى. بىرىنشىدەن, كۇنكورىسى تومەن, ونىڭ ىشىندە كوپ بالالى وتباسىلاردى قولداۋ شارالارىن قامتۋ مەن كۇشەيتۋدى كەڭەيتۋ قولعا الىنباق. 1 شىلدەگە دەيىن كۇنكورىس دەڭگەيى 14 830 تەڭگە بولادى, ال 1 شىلدەدەن باستاپ 20 789 تەڭگەگە كوبەيەدى. بۇل - 18 جاسقا دەيىن تولەنەدى. ەگەر بالالار وقيتىن بولسا, وندا 23 جاسقا دەيىن تولەنەدى. بۇعان قوسا, اتا-اناسىنىڭ تابىستارى كۇنكورىس دەڭگەيىنەن كەم بولسا, قوسىمشا جاردەماقى تولەنەدى. ەگەر بۇل كومەكتى وسى ۋاقىتقا دەيىن 570 مىڭ ادام الىپ كەلسە, ەندى 260 مىڭعا كوبەيىپ, ياعني 830 مىڭ قازاقستاندىقتىڭ الەۋمەتتىك كومەكتى الۋ مۇمكىندىگى بولادى. ءبىر وتباسىن مىسالعا كەلتىرسەك, 4 بالالى جالعىزباستى وتباسى دەلىك. ەگەر 1 شىلدەگە دەيىن تابىسى جوق بولعان سوڭ وتباسى 63 مىڭ تەڭگە اتاۋلى الەۋمەتتىك كومەك الاتىن بولسا, 1 شىلدەدەن باستاپ بۇل 40 مىڭ تەڭگەگە كوبەيەدى. ياعني, 103 945 تەڭگە بولادى. ال قوسىمشا تولەمدەردى ەسەپتەگەندە وتباسىنىڭ جالپى ءبىر ايلىق تابىسى 114 448 تەڭگەنى قۇرايدى.
بالالارعا بەرىلەتىن 21 مىڭ تەڭگەدەن بولەك, اتا-اناسىنا دا قوسىمشا اقى تولەنەدى. وسى ۋاقىتقا دەيىن اتاۋلى كومەكتى ءبىر ادامعا شاققاندا كۇنكورىس دەڭگەيىنىڭ 50 پايىزىنان, ياعني 14 849 تەڭگەدەن اسپايتىن وتباسىلار السا, ەندى پرەزيدەنت تاپسىرماسى بويىنشا اتالعان كورسەتكىش 70 پايىزعا, ياعني 20 789 تەڭگەگە دەيىن كوتەرىلىپ وتىر. دەمەك, كوپ بالالى وتباسىنىڭ جالپى تابىسىن ءاربىر ادامعا بولگەندە اقشانىڭ سوماسى كۇنكورىس دەڭگەيىنىڭ 70 پايىزىنا, ياعني 20 789 تەڭگەگە جەتپەسە, ءار بالاعا 21 مىڭ تەڭگەنىڭ جاردەماقىسى بەرىلەدى. ەگەر وتباسىنىڭ ءار مۇشەسىنە شاققاندا تابىس كۇنكورىس دەڭگەيىنەن (70 پايىزدان) تومەن بولسا, ايىرماشىلىق 10 مىڭ تەڭگە بولا ما, 7 مىڭ تەڭگە بولا ما, اتا-اناسىنا قوسىمشا تولەنەدى. ودان كەيىنگى ەڭ ۇلكەن جەڭىلدىك, بۇرىن تابىستى ەسەپتەگەندە «التىن القا», «كۇمىس القا», كوپ بالاعا بەرىلەتىن جاردەماقى, مۇگەدەكتەردىڭ جاردەماقىسى مەن ستيپەندياسى سانالاتىن. ەندى ونىڭ ءبارى ەسەپكە الىنبايدى. بارلىق زاڭدار مەن قاۋلىلارعا وزگەرىس ەنگىزۋىمىز كەرەك. ءسويتىپ, ونىڭ بارلىعىن پارلامەنتكە وتكىزەمىز. جاردەماقى 1 شىلدەدەن باستاپ تولەنە باستايدى.
بەردىبەك ساپارباەۆ,
ەڭبەك جانە حالىقتى الەۋمەتتىك قورعاۋ ءمينيسترى
