ەلىمىزدىڭ 43 جوعارى وقۋ ورنىنان 200 ادام «جوعارى وقۋ ورنىنىڭ ۇزدىك وقىتۋشىسى» اتاعىنىڭ يەگەرى بولدى. ولاردىڭ قاتارىندا 36 عىلىم دوكتورى, 133 عىلىم كانديداتى, 29 PhD دوكتورى, 2 ماگيسترانت بار.
«بولاشاق كىلتى وسكەلەڭ ۇرپاقتىڭ قولىندا. ولاردىڭ بويىنا ءبىلىم ءنارىن ءسىڭىرىپ, ىزگىلىك نۇرىن تاراتۋشى – سىزدەر. مۇراتى بيىك مۇعالىمدەر قاۋىمىنا قاجىرلى ەڭبەگى ءۇشىن شىن جۇرەكتەن العىسىمدى ايتامىن. بارىڭىزگە زور دەنساۋلىق, شىعارماشىلىق تابىس تىلەيمىن», دەدى ءبىلىم جانە عىلىم ۆيتسە-ءمينيسترى تالعات ەشەنقۇلوۆ.
بايقاۋعا قاتىسقان وقىتۋشىلاردىڭ عىلىمي-پەداگوگيكالىق قىزمەتى ساپالىق جانە ساندىق كورسەتكىشتەرى بويىنشا باعالاندى. ونىڭ ىشىندە, وقۋلىقتاردى, مونوگرافيالاردى, وقۋ قۇرالدارىن اعىلشىن تىلىندە ازىرلەۋ, قاتىسۋ جانە باسىپ شىعارۋ, كاسىبي قىزمەتى بويىنشا شەت تىلىندەگى جاپپاي اشىق ونلاين كۋرستاردىڭ پلاتفورماسى بازاسىندا كۋرستان تابىستى وتكەنى تۋرالى سەرتيفيكاتتىڭ بولۋى ەسكەرىلدى.
اتالعان گرانت جوعارى وقۋ ورىندارىنىڭ وقىتۋشىلارىنا عىلىمي-زەرتتەۋ جۇمىستارىن جۇرگىزۋ ءۇشىن جانە بىلىكتىلىكتەرىن ارتتىرۋعا الەمنىڭ جەتەكشى ۋنيۆەرسيتەتتەرىندە تاعىلىمدامادان وتۋگە مۇمكىندىك بەرەدى.
راۋان قايدار,
«Egemen Qazaqstan»
