ء«ار بالا ءوز نەسىبەسىمەن تۋادى» دەپ بىلەتىن حالىقپىز. باسىنان قانداي قيىن كەزەڭدەر وتسە دە, جەتىمىن جىلاتىپ, جەسىرىن قاڭعىرتپاعان ەلمىز. بابالاردىڭ سول سالتى جاڭا عاسىردا دا ماڭىزىن جويعان جوق. ءبىز بۇگىندە ەكى ەسە باقىتتىمىز دەر ەدىم: تاۋەلسىز ەلىمىز بار, جىل ساناپ نىعايىپ كەلە جاتقان مەملەكەتىمىز بار. ەلباسى ساياساتىنىڭ ارقاسىندا الىستاعى اۋىل حالقى دا زامانا كوشىنەن قالماي, جارقىن بولاشاققا سەنىم ارتىپ وتىر. «نۇر وتان» پارتياسىنىڭ كەزەكتى سەزىندە مەملەكەت باسشىسىنىڭ الەۋمەتتىك ماسەلەلەرگە ماڭىز بەرگەنى «التىن القا» يەگەرى رەتىندە مەنى دە تولقىتتى. قولدايتىن, قورعايتىن مەملەكەتىڭنىڭ بارى, بالالارىڭنىڭ كورىنگەن بوساعادا تەنتىرەمەي ءوز الدارىنا ءۇي بولىپ كەتۋلەرى ءۇشىن مۇمكىندىكتىڭ كوپتىگى ەرتەڭگە دەگەن سەنىمىڭدى نىقتاي تۇسەدى.
ەلباسىنىڭ از قامتىلعان كوپ بالالى وتباسىلارداعى ءار بالاعا بەرىلەتىن جاردەماقى مولشەرىن 21 مىڭ تەڭگەگە جەتكىزىپ, پاتەر ساتىپ الۋدىڭ قولجەتىمدىلىگى ارتۋىنا جاعداي جاساۋى – الەۋمەتتىك ساياساتتىڭ ۇتىمدى تۇسى دەپ ويلايمىن.
نۇرسۇلتان ءابىش ۇلى: «تابىسى تومەن كوپ بالالى جانە تولىق ەمەس وتباسىلارعا, مۇگەدەك بالالارى بار, از قامتىلعان وتباسىلارعا پاتەر ساتىپ الۋدىڭ قولجەتىمدىلىگىن ارتتىرۋ قاجەت», دەپ تاپسىردى. شىنى كەرەك, بالالارىمىز اۋىل مەكتەبىن بىتىرگەننەن كەيىن قالاعا وقۋعا كەتەدى, ال بەيتانىس ورتادا پاتەر جالداپ كۇنەلتۋدىڭ ءوزى وڭاي ەمەس. تۇرعىن ۇيگە بايلانىستى جاڭالىقتار سول ءۇشىن دە كوپشىلىكتى قۋانتىپ وتىر.
جاڭا الەۋمەتتىك ساياسات دەموگرافيالىق احۋالدىڭ جاقسارۋىنا دا ىقپال ەتەرى انىق. جەرگىلىكتى اتقارۋشى بيلىك تاراپىنان جاسالىپ جاتقان الەۋمەتتىك قولداۋ شارالارىنا دا كوڭىلىمىز تولادى. كۇنى كەشە وبلىس حالقى الدىندا ەسەپتىك كەزدەسۋ وتكىزگەن ءوڭىر باسشىسى نۇرلان نوعاەۆ «ىسكەر انا» جوباسىنىڭ باستاۋ العانىن مالىمدەدى. الەۋمەتتىك وسال توپتاعى جاستاردى قوعام ومىرىنە ارالاسۋعا بەيىمدەيتىن جوبالار دا دايىندالىپتى. جۇمىسسىزدىق ماسەلەسى شەشىمىن تاۋىپ كەلەدى. وسىنىڭ ءبارى مەن سەكىلدى كوپ بالالى انالار ءۇشىن ارينە قۋانىش. ەرتەڭگە دەگەن سەنىمىمىزگە سەلكەۋ تۇسىرمەي, قولداۋ كورسەتىپ وتىرعان ەلباسىمىزعا العىس ايتۋ كۇنىندە انالىق جۇرەگىممەن ريزاشىلىعىمدى بىلدىرسەم دەيمىن.
مايرا قۇراسوۆا,
«التىن القا» يەگەرى
اتىراۋ وبلىسى, يساتاي اۋدانى
