بەس بالانىڭ اناسى اينۇر, اسىرەسە ۇلى شاحمۇراتتىڭ ەرتەڭىنە الاڭداۋلى. ونىڭ وزگە ۇل-قىزدارىنداي ەمەس, مۇمكىندىگى شەكتەۋلى ەكەنىنە كوڭىلى جابىرقاعانىمەن, قاتارىنان قالدىرماس ءۇشىن بار جاعدايىن جاساۋدا. ۇل-قىزدارىنىڭ الدى 9-سىنىپتا وقىسا, كەنجەسى 2 جاستان ەندى اسقان اينۇر جولدىباەۆا – «نۇر وتان» پارتياسى سەزىندە ايتىلعان ەلباسى باستامالارىنا ەرەكشە قۋانىپ, ەرتەڭگە دەگەن سەنىمى نىعايا تۇسكەن انالاردىڭ ءبىرى.
– ء«ار بالانىڭ ءوز نەسىبەسى بار». دەگەنمەن, مەملەكەت تاراپىنان جاسالىپ جاتقان كومەكتەردىڭ ورنى بولەك. ءوزىم بالالارمەن وتىرمىن. ال كۇيەۋىم ۇزاق ۋاقىت جۇمىسسىز ءجۇردى. جۋىردا كوپ بالالى وتباسىلاردى قولداۋ اياسىندا بەرىلگەن 563 مىڭ تەڭگە كولەمىندەگى اتاۋلى الەۋمەتتىك كومەك كۇيەۋىمنىڭ جەكە كاسىبىن اشۋعا ىقپال ەتىپ وتىر. وتكەن جىلى كوپ بالالى وتباسى رەتىندە ءۇش بولمەلى پاتەرگە قول جەتكىزدىك. بالالارعا بەرىلەتىن اي سايىنعى جاردەماقى از, جاسىراتىنى جوق جەتكىزۋ قيىن. كوڭىلدى جابىرقاتاتىنى دا سول – جەتپەيتىنى. مۇگەدەك بالامدى قاتارعا قوسۋدان ءۇمىتىمدى ۇزگەن ەمەسپىن. بارلىق مۇمكىندىكتى جاساۋعا تىرىسۋدامىز. وعان ارينە, كوپ قارجى كەتەدى. ەندى ەرتەڭگى بالالارعا بەرىلەتىن كومەكتىڭ كوبەيە تۇسەتىنى قۋانتىپ وتىر. مەملەكەت باسشىسىنا وسىنداي قولداۋى ءۇشىن ايتار العىسىمىز شەكسىز. ەلباسى اسىرەسە كوپ بالالى وتباسىلاردى قولداۋ شارالارىن كۇشەيتۋ قاجەتتىگىن ايتتى. ۇكىمەتكە اتاۋلى كومەك كورسەتۋ ولشەمدەرىن ارتتىرۋدى, سونداي-اق مۇگەدەك بالا تاربيەلەپ وتىرعان اتا-انالارعا, قامقورشىلار مەن وتباسىلارعا جاردەماقىنى 30 پايىزعا كوتەرۋدى تاپسىردى. بۇل بىزگە ۇلكەن دەمەۋ. ۇيدەگى بالالار دا كەشە ەستىپ, وتباسىمىزبەن قۋانىپ جاتىرمىز, – دەيدى اينۇر.
مۇگەدەك بالا تاربيەلەپ وتىرعان انا كوبەيەتىن جاردەماقى ۇلدىڭ دەنساۋلىعىن جاقسارتۋعا سەپتىگىن تيگىزەتىنىن ايتىپ وتىر. بۇگىندە وعان قاجەتتى زاتتار الىپ, قوسىمشا ەمدەۋ جولدارىن قاراستىرۋعا قاراجات جەتپەيدى. مەملەكەت تاراپىنان جەڭىلدىك جاسالاتىن ەمدىك كومەكتەرمەن شەكتەلۋگە ءماجبۇر. قوسىمشا ەم قابىلداسا, قاتارىنا ەرتەرەك قوسىلا ما دەگەن ءۇمىتى ەندى سەنىمگە اينالا باستاعانداي. جالپى, بۇل ماسەلە مەملەكەت باسشىسىنىڭ نازارىنان تىس قالعان ەمەس. مىسالى, ەلباسى «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى جولداۋىندا مۇمكىندىگى شەكتەۋلى ازاماتتارعا كوبىرەك كوڭىل ءبولۋ كەرەكتىگىن, ولار ءۇشىن قازاقستان كەدەرگىسىز ايماققا اينالۋى تيىستىگىن ايتقان بولاتىن. بۇگىندە مۇگەدەكتەردىڭ ءومىرى مەن دەنساۋلىعىن جاقسارتۋدى ماقسات تۇتاتىن مەملەكەتتىك باعدارلامالار جۇمىس ىستەۋدە. ونىڭ ىشىندە «نۇر وتان» پارتياسى «كەدەرگىسىز كەلەشەك» باعدارلاماسى اياسىندا مۇگەدەكتەرگە كومەكتەسىپ كەلەدى. كۇنى كەشەگى سەزدە ايتىلعان, وسىنداي يگى ىستەردى جانداندىرا, جەتىلدىرە تۇسەتىن ەلباسىنىڭ ۇكىمەتكە بەرگەن تاپسىرمالارى بۇگىندە حالىق تاراپىنان قولداۋ تابۋدا. اينۇر جولدىباەۆا عانا ەمەس, تۇركىستان وبلىسى, تولەبي اۋدانىنداعى از قامتاماسىز ەتىلگەن مىڭعا جۋىق, ونىڭ ىشىندە 502 كوپ بالالى وتباسى ءاربىر بالاعا تولەنەتىن ەڭ تومەنگى تولەم 20 789 تەڭگە كولەمىندە بەلگىلەنەتىنىنە قۋانىپ, ريزاشىلىقتارىن بىلدىرۋدە.
عالىمجان ەلشىباي,
«Egemen Qazaqstan»
تۇركىستان وبلىسى
