تەمەكى شەگەتىن ادامداردى ونىڭ زيانى تۋرالى اقپاراتتاندىرۋ شارانىڭ باستى ماقساتى ەتىپ الىندى. ۆولونتەرلەر كوشەگە شىعىپ, تەمەكى شەگەتىندەرگە ءبىر المانى ءبىر تال تەمەكىگە ايىرباستادى. ولار وسى ارقىلى رۋدنىيلىقتارعا پايدالى ىسكە كوشۋدىڭ دۇرىستىعىن كورسەتتى. المانىڭ وكپە اۋرۋىنا قارسى تۇراتىن قاسيەتى بار ەكەنىن ەكىنىڭ ءبىرى بىلە بەرمەۋى مۇمكىن. اپتاسىنا ەكى الما جەپ وتىرسا دا وكپە اۋرۋىنا كومەگى بولاتىنىن عالىمدار دالەلدەگەن. جەمىستىڭ بۇل ءتۇرى شىلىمشىلارعا زياندى ادەتتى تاستاۋعا دا كومەكتەسەدى ەكەن. بۇل قىزىقتى دا پايدالى اكتسيانىڭ باستاماشىسى رۋدنىي قالالىق پوليتسيا باسقارماسىنىڭ باستىعى, پوليتسيا پولكوۆنيگى ءالىم باجىقباەۆتىڭ ءوزى ەدى.
«اكتسياعا كوشەدە وتىز شاقتى ادام قاتىستى. كەزدەسكەننىڭ بارلىعى دا شىلىمشى بولىپ شىقتى. بىراق ولاردىڭ كوزقاراسى ءارتۇرلى بولدى. بىرەۋلەرى الماعا ءبىر تال شىلىمىن دا قيماي قالدى, ال كەيبىر كىسىلەر قالتاسىنداعى «ۋدى» قورابىمەن قولىمىزعا بەرە سالدى» دەيدى ۆولونتەر ماريا زيۋۆانوۆا.
ماماندار ستاتيستيكاسى بويىنشا, قازاقستاندا جىل سايىن شىلىمنان 25 مىڭ ءولىم تىركەلەدى ەكەن. شىلىم راك اۋرۋىنىڭ كوپتەگەن تۇرلەرىنىڭ سەبەبىنە اينالادى. رۋدنىيلىق جاستار جيناعان تەمەكىنىڭ كوزىن جويدى.
ء نازيرا جارىمبەت,
«ەگەمەن قازاقستان»
قوستاناي
