رۋحاني قۇندىلىقتىڭ تۇپكى ءمانى – ۇلتتىق ونەر. ءار حالىقتىڭ رۋحاني الەمى ەڭ الدىمەن ونىڭ ءداستۇرلى ونەرىنەن كورىنىس تابادى. قازاق ەلىنىڭ مادەنيەتىن, رۋحاني بايلىعىن الەمگە تانىتۋدا ۇلتتىق ءداستۇرلى ونەردىڭ الار ورنى, اتقارار قىزمەتى ەرەكشە ەكەنى ءسوزسىز. بۇگىندە ء«داستۇرلى مۋزىكا ونەرى» مەن «ساندىك-قولدانبالى ونەر» كافەدرالارىنىڭ تۇلەكتەرى, ەل مادەنيەتىن الەمگە ايگىلەپ, حالىقارالىق, رەسپۋبليكالىق ونەر دودالارىندا توپ جارىپ ءجۇر. ستۋدەنتتەرگە رەسپۋبليكانىڭ ماقتانىشىنا اينالعان ر.ستامعازيەۆ, پ.مومىنوۆ, ن.جانپەيىسوۆ, م.ابۋعازى, ت.مۇقىشەۆ, س.باپانوۆا, ر.بازارباەۆا, ە.داۋباەۆ سىندى كاسىبي ماماندار باستاعان, تاجىريبەلى وقىتۋشىلار ءبىلىم بەرەدى.
قازۇوا رەكتورى, قازاقستاننىڭ ەڭبەك سىڭىرگەن قايراتكەرى اسحات ماەميروۆتىڭ ايتۋىنشا, فاكۋلتەتتى اشۋداعى ماقسات – جوعارى ءبىلىم ساپاسىن قامتاماسىز ەتۋ, ستۋدەنتتەردىڭ عىلىمي-تەوريالىق دايىندىعى مەن ورىنداۋشىلىق شەبەرلىگىن ارتتىرۋ, سونداي-اق, وقۋ-تاربيە ۇدەرىسىن ءتيىمدى ءادىس-تاسىلدەرمەن باسقارۋ, ۇلتتىق ونەردى وقىتۋدىڭ زاماناۋي ۇلگىلەرىن پايدالانۋ. قازاقستاننىڭ مادەنيەت مەكەمەلەرى مەن ءبىلىم بەرۋ ۇيىمدارىن حالىقارالىق باسەكەگە قابىلەتتى, جوعارى بىلىكتى ماماندارمەن قامتاماسىز ەتۋ.
ۇلتتىق ونەردىڭ بۇگىنگى جانە كەلەر ۇرپاققا تۇپنۇسقاسى بۇرمالانباي, تابيعي تۇرعىدا بىزگە جەتكەن مۇرالاردىڭ ساقتالۋىنا جانە ناسيحاتتالۋىنا ىقپال ەتۋ بارىسىندا فاكۋلتەت ۇجىمى ۇلكەن جۇمىستاردى جوسپارلاپ, ىسكە اسىرماق نيەتتە.
«ۇلتتىق ونەر» فاكۋلتەتىنىڭ دەكانى بولىپ ولجاس قانات ۇلى يبراەۆ تاعايىندالدى.
ايگۇل احانبايقىزى
«Egemen Qazaqstan»
الماتى
