جىل سايىن اقپان ايىنىڭ سوڭعى كۇنىندە سيرەك كەزدەسەتىن نەمەسە ورفاندىق اۋرۋلار پروبلەماسىنا الەم نازارى اۋدارىلىپ, قۇرساقتاعى شارانانىڭ دامۋ بارىسىندا گەنەتيكالىق اۋىتقۋعا ۇشىراۋدان پايدا بولعان دەرتكە قاتىستى ماسەلەلەر كوتەرىلەدى. بۇل جولعى كونفەرەنتسيا تاقىرىبى–گوشە اۋرۋىنا ارنالدى.
ۇلتتىق انا مەن بالا ورتالىعى دەپارتامەنتىنىڭ باسشىسى ەرناس تولەۋتاەۆ: «قازاقستاندا سيرەك كەزدەسەتىن اۋرۋلاردىڭ قارماعىنا ىلىككەن پاتسيەنتتەردىڭ جالپى سانى 1000 ادامعا جۋىق. مۇنداي پاتسيەنتتەردىڭ فەرمەنت تولىقتىرۋشى تەراپيانى الۋى اسا ماڭىزدى, سەبەبى, دياگنوز ۋاقىتىندا قويىلىپ, دۇرىس ەم تاعايىندالاتىن بولسا, پاتسيەنتتەر ۇزاق ءارى تولىققاندى ءومىر سۇرە الادى» دەگەن. ال «گوشە اۋرۋىنا شالدىققان مۇگەدەك بالالار» قب ديرەكتورى يرينا سيم: «بۇگىنگى تاڭدا قازاقستاندا گوشە اۋرۋىنا شالدىققان 23 پاتسيەنت بولسا, ولاردىڭ كوبى بالالار. ۋاقىتىلى دياگنوزى قويىلىپ, ءتيىستى فەرمەنتتىك تەراپيانى العاندا ولار بالاباقشالارعا بارادى, مەكتەپتەردە, كوللەدجدەر مەن ينستيتۋتتاردا وقيدى, جۇمىس ىستەيدى, وتباسىن قۇرادى. الايدا اۋرۋدىڭ سيرەك كەزدەسەتىنىنە بايلانىستى بۇل دەرت جايىندا قوعام تۇگىل دارىگەرلەردىڭ دە بىلىگى ازداۋ. وسى رەتتە سيرەك كەزدەسەتىن اۋرۋلاردى دياگنوستيكالاۋدىڭ جانە ەمدەۋدىڭ جاڭا ستاندارتتارىن ەنگىزۋ بويىنشا جاڭا جول كارتاسىنىڭ جۇزەگە اسۋىنا ۇلكەن ءۇمىت ارتامىز. مەملەكەت ءبىزدىڭ باسىمىزداعى اۋىرمالىقتى بىرگە كوتەرىسىپ, الەمدىك تەراپيادا ءتيىمدى قولدانىلاتىن زاماناۋي پرەپاراتتارمەن يننوۆاتسيالىق ەمدى تەگىن الۋعا مۇمكىندىك جاسادى», دەيدى.
ايتا كەتۋ كەرەك, مۇنداي سيرەك كەسەلدى ەمدەۋ قوماقتى سومانى قاجەت ەتەدى, سوندىقتان ورفاندىق اۋرۋلاردى قاجەتتى تەراپيامەن قامتاماسىز ەتۋدەگى شىعىنداردى مەملەكەت تەگىن مەديتسينالىق كومەكتىڭ كەپىلدىك بەرىلگەن كولەم اياسىندا تولىق وزىنە العان. ءبىر بالانىڭ جىلدىق ەمدەلۋىنە رەسپۋبليكالىق بيۋدجەتتەن 40 ملن باستاپ 80 ملن تەڭگەگە دەيىن بولىنەدى, سەبەبى ءبىر امپۋلانىڭ باعاسى 300 مىڭنان باستاپ, 600 مىڭ تەڭگە مولشەرىندە.
انار تولەۋحانقىزى,
«ەگەمەن قازاقستان»
