بىلگەن باسشى بار حالىقتىڭ قامىن جەر
جۇما, 14 جەلتوقسان 2012 7:04
الەم جۇرتشىلىعىنىڭ مىسىر ەلىنە كوز تىككەنىنە ءبىراز بولدى. استاناسىندا الاساپىران. بىرىنە ءبىرى قارسى تۇرعان حالىق. ەرتەڭ قالاي بولارى بەلگىسىز. جۇرت 15 جەلتوقساندى كۇتىپ وتىر. وسى كۇنى ءبىراز نارسە ايقىندالماق.
جۇما, 14 جەلتوقسان 2012 7:04
الەم جۇرتشىلىعىنىڭ مىسىر ەلىنە كوز تىككەنىنە ءبىراز بولدى. استاناسىندا الاساپىران. بىرىنە ءبىرى قارسى تۇرعان حالىق. ەرتەڭ قالاي بولارى بەلگىسىز. جۇرت 15 جەلتوقساندى كۇتىپ وتىر. وسى كۇنى ءبىراز نارسە ايقىندالماق.
ايقىندالعاندا, وسى كۇنى وتەدى دەپ وتىرعان ەگيپەتتىڭ جاڭا كونستيتۋتسياسىنىڭ جوباسىنا بايلانىستى رەفەرەندۋمنان كەيىن جاعداي ءتىپتى شيەلەنىسىپ كەتۋى ءابدەن ىقتيمال. قازىردىڭ وزىندە ول شارىقتاۋ شەگىنە جەتكەندەي. كوشە قارسىلاستارعا تولى. ساراپشىلار, ساياساتشىلار ونى بۇرىنعى پرەزيدەنت حۋسني مۇباراكتى تاعىنان تايدىرعان «اراب كوكتەمى» رەۆوليۋتسياسىمەن سالىستىرادى.
بۇل ەلدە قالىپتاسقان جاعداي تۋرالى بۇعان دەيىن دە ءبىراز جازدىق. پرەزيدەنت سايلاۋىندا «مۇسىلمان باۋىرلار» قوزعالىسىنىڭ وكىلى مۇحاممەد مۋرسي ازعانداي عانا باسىمدىقپەن (51 پايىز) جەڭىسكە جەتكەن بولاتىن. سودان كەيىن ول ءوزىن قولداعان قاۋىمنىڭ عانا مۇددەسىن ويلاپ, قالعان 49 پايىز حالىقتىڭ مۇددەسىن ەسكەرمەي ارەكەت ەتتى. ول ەل باسشىسى بارشا حالىقتىڭ قامىن جەۋى پارىزدى ءىس ەكەنىن ۇمىتتى دەگەن ايىپپەن جۇرتشىلىقتىڭ نارازىلىعىن تۋدىردى.
بۇل قارسىلىق, اسىرەسە, پرەزيدەنتتىڭ 22 قاراشاداعى ءوزىنىڭ وكىلەتتىگىن كەڭەيتىپ, سوت بيلىگىن شەكتەگەن جارلىعىنان كەيىن ءتىپتى كۇشەيگەن. سونى ەسكەرىپ, مۋرسي بۇل ۋاقىتشا عانا شارا دەپ اقتالعانىمەن, ونىڭ اسىعىس تۇردە رەفەرەندۋم وتكىزۋ جونىندەگى شەشىمىنە وپپوزيتسيا مۇلدە قارسى.
جالپى, رەفەرەندۋمعا ۇسىنىلىپ وتىرعان كونستيتۋتسيا جوباسى, پارلامەنتتە (وندا يسلاميستەر باسىم) قابىلدانعانمەن, وپپوزيتسيا پىكىرىنشە, ول اسىعىس جاسالعان, جالپى حالىقتىق مۇددەگە قايشى. وندا ساياسي جانە ءدىني ەركىندىككە, سونداي-اق ايەلدەر بوستاندىعىنا كەپىلدىك بەرىلمەگەن. سىناۋشىلار كونستيتۋتسيانى ءمۋرسيدى قولدايتىن يسلاميستەر ازىرلەگەنىنە نازار اۋدارىپ وتىر.
نارازىلىقتىڭ كۇشەيگەنىن ەسكەرىپ, پرەزيدەنت مۋرسي حالىققا تەلەكانال ارقىلى ۇندەۋ ارنادى. ول وپپوزيتسيانى قالىپتاسقان جاعدايدى رەتتەۋ ءۇشىن ءۇن قاتىسۋعا شاقىردى. وپپوزيتسيا ونى قابىلدامادى. قارسىلاردىڭ باستى تالابى رەفەرەندۋمدى كەيىنگە شەگەرىپ, 22 قاراشادا قابىلدانعان كونستيتۋتسيالىق دەكلاراتسيانى توقتاتۋ بولىپ وتىر.
بيلىك پەن وپپوزيتسيانىڭ ءبىرىن-ءبىرى ۇعاتىن, كەلىسىمگە كەلەتىن ءتۇرى جوق. اسكەريلەردىڭ ولاردى مامىلەگە شاقىرعانى جاۋاپسىز قالدى. ال اسكەريلەر قارسىلاستىڭ ءبىرىن جاقتاپ, سوزدەن ارەكەتكە كوشەر بولسا, ونىڭ اياعى ناسىرعا شابارى انىق.
رەفەرەندۋم قارساڭىندا مۇحاممەد مۋرسيگە قارسىلار سانى ايتارلىقتاي وسكەنى جايىندا پىكىرلەر ايتىلۋدا. سوعان قاراعاندا, رەفەرەندۋم ءناتيجەسىنەن كەيىن, ءتىپتى وندا پرەزيدەنت جاقتاستارى كوپشىلىك داۋىس العانىمەن, جاعداي وڭعا قاراي وزگەرە قويمايتىنداي. ءتىپتى ول قارسىلاستار اراسىنداعى قايشىلىقتى بۇرىنعىدان دا كۇشەيتىپ جىبەرۋى مۇمكىن.
كەيبىر اقپارات قۇرالدارى ەگيپەت بيلىگى وپپوزيتسياعا قارسى قۋعىنداۋدى كۇشەيتپەك, ونىڭ باسشىلارىن قاماۋعا الماق دەگەن ءسوز دە تاراتىپ وتىر. ال بۇل شىندىققا اينالار بولسا, ول بيلىككە قارسىلىقتى كۇشەيتە ءتۇسىپ, جاعدايدى ۋشىقتىراتىن جول.
ماماديار جاقىپ, «ەگەمەن قازاقستان».
