سپورتشىلار جاپونياداعى الەم كۋبوگى كەزەڭى اياقتالعان سوڭ, الماتىنى بەتكە العان. كوماندالار ءبىزدىڭ ەلگە جەتۋ ءۇشىن جولعا 13 ساعات ۋاقىتىن جۇمسادى.
موگۋلدان الەم ۇزدىكتەرىنىڭ باسىم بولىگى قازاقستانعا كەلىپ جەتتى. ولاردىڭ كوپشىلىگى ءۇشىن ءبىزدىڭ ەلىمىز ءبىرىنشى كەزەكتە تاۋمەن ەستە قالعان. ال وليمپيادا چەمپيونى كينگسبەري دميتري رەيحەردپەن دوس ەكەنىن ايتادى.
«ۇشاقتا ۇيىقتاماۋعا تىرىستىم. ويتكەنى, بۇگىن تۇندە جاقسىلاپ ۇيقىمدى قاندىرسام دەيمىن. بۇل قازاقستانعا ءبىرىنشى رەت كەلۋىم. وتە قۋانىشتىمىن. سوڭعى جىلدارى قازاقستاننان شىققان موگۋلشىلاردى كوپ كەزىكتىرەمىن. سىزدەردىڭ تاۋلارىڭىز دا ادەمى ەكەنىن بىلەمىن. رەيحەرد ەكەۋمىز جاقسى دوستارمىز. سىزدەردىڭ ەلدەرىڭىز تۋرالى تەك جاقسى جاڭالىقتار ەستىدىم», - دەيدى كينگسبەري.
ال پەررين لاففون ءبىزدىڭ مادەنيەتىمىزبەن جاقىنىراق تانىسۋدى ءجون كورىپتى.
«ۇشۋعا كوپ ۋاقىت جۇمسادىق. مەنىڭ قازاقستانعا العاشقى ساپارىم بولعاندىقتان, مۇنداعى جارىس جولىندا دا ءبىرىنشى رەت باق سىنايمىن. سوندىقتان, قازىرگى كوڭىل-كۇيىم تاماشا. قازاقستاندى ادەمى ەل دەپ ەستىدىم. بىراق ءسىزدىڭ ەلدەگى مادەنيەت پەن ءداستۇرلى تاعامداردان بەيحابارمىن. وسى ولقىلىقتىڭ ورنىن تولتىرىپ, قازاقستانمەن جاقىنىراق تانىسامىن», - دەيدى لاففون.
«شىنى كەرەك, ۇشۋ ۋاقىتى ۇزاققا سوزىلدى. بەس ساعات بويى توكيودا, سەگىز ساعات سەۋلدە ايالدادىق. ءبىزدىڭ ەلگە العاش كەلە جاتقان سپورتشىلار نۇرسۇلتان نازارباەۆ تۋرالى ءفيلمدى تاماشالادى. ولارعا تابيعاتىمىز بەن تاۋلارىمىز ۇناعان. قالا تۋرالى مالىمەت از بولعاندىقتان, قوناقتارىمىز الماتىنى ارالاعىسى كەلەدى. ال جارىسقا كەلەر بولسام, ۇزدىك ۇشتىككە ەنۋگە تىرىسامىز», - دەيدى گالىشەۆا.
فريستايل-موگۋلدان الەم كۋبوگىنىڭ فينالدىق كەزەڭى 2-3 ناۋرىز كۇندەرى الماتىدا وتەدى.
