وتىرىستى اشقان م.اشىمباەۆ الدىمەن قاتىسۋشىلاردى «نۇر وتاننىڭ» 20 جىلدىعىمەن قۇتتىقتادى. وسى مەرەيلى داتاعا ورايلاستىرىلعان پارتيانىڭ كەزەكتى XVIII سەزىنىڭ ماڭىزىنا توقتالعان ول اتالعان جيىندا «نۇر وتاننىڭ» جاڭا باعىت-باعدارى ايقىندالىپ, ماڭىزدى ماسەلەلەر تالقىلاناتىنىن ءسوز ەتتى.
ساياسي كەڭەستىڭ وتىرىسىندا قارالعان نەگىزگى ماسەلەلەردىڭ ءبىرى «نۇر وتان» پارتياسىنىڭ 2030 جىلعا دەيىنگى «باقۋاتتى قوعام: ونجىلدىقتىڭ 10 ماقساتى» اتتى جاڭا باعدارلاما جوباسىن تالقىلاۋ بولدى. پارتيا توراعاسىنىڭ ءبىرىنشى ورىنباسارى باعدارلامانىڭ نەگىزىنەن الەۋمەتتىك سيپاتقا يە ەكەنىنە نازار اۋداردى.
– پارتيا توراعاسىنىڭ تاپسىرماسىنا سايكەس, پارتيانىڭ 2030 جىلعا دەيىنگى جاڭا باعدارلاماسى دايىندالدى. بۇل قۇجاتتا ەلباسىنىڭ ەلىمىزدى جان-جاقتى جاڭعىرتۋ باعدارلاماسىن جۇزەگە اسىرۋعا پارتيانىڭ قوساتىن ناقتى ۇلەسى مەن جۇمىسى كورسەتىلگەن. باعدارلاما جوباسى باستاۋىش پارتيا ۇيىمدارىنىڭ جينالىستارى مەن پارتيانىڭ اۋماقتىق جانە ايماقتىق فيليالدارىنىڭ كونفەرەنتسيالارىندا كەڭىنەن تالقىلاندى. ناتيجەسىندە قۇجات الەۋمەتتىك سيپاتقا يە بولىپ, ازاماتتاردىڭ تۇرمىس ساپاسىن جاقسارتۋعا باعىتتالدى, – دەدى م.اشىمباەۆ.
وتىرىس بارىسىندا باعدارلامانىڭ نەگىزگى باعىتتارى بويىنشا پارتيا حاتشىسى يليا تەرەنچەنكو بايانداپ بەردى. ودان بولەك, ساياسي كەڭەستىڭ مۇشەلەرى: م.ح.دۋلاتي اتىنداعى تاراز مەملەكەتتىك ۋنيۆەرسيتەتىنىڭ رەكتورى م.سارىبەكوۆ, پاۆلودار وبلىستىق پەريناتالدى ورتالىعىنىڭ باس دارىگەرى ا.وسپانوۆا جانە «اگروفيرما «رودينا» جشس-نىڭ ديرەكتورى ي.ساۋەر جاڭا باعدارلامانىڭ باسىمدىقتارى جايىندا ايتتى.
تالقىلاۋ ناتيجەسىندە ساياسي كەڭەس مۇشەلەرى باعدارلاما جوباسىن ماقۇلداپ, ونى «نۇر وتان» پارتياسىنىڭ كەزەكتى XVIII سەزىنىڭ قاراۋىنا ۇسىنۋ تۋرالى شەشىم قابىلدادى. سونىمەن قاتار سەزدە پارتيا جارعىسىنا وزگەرتۋلەر مەن تولىقتىرۋلار ەنگىزۋ جانە ساياسي كەڭەس پەن ورتالىق باقىلاۋ-تەكسەرۋ كوميسسياسىنىڭ ەسەپتىك كەزەڭدەگى جۇمىسىن قورىتىندىلاۋ سياقتى ماسەلەلەر دە تالقىلانادى دەپ كۇتىلۋدە. سوعان بايلانىستى ساياسي كەڭەستىڭ وتىرىسىندا اتالعان ماسەلەلەر دە نازارعا الىنىپ, تالقىعا سالىندى.
سونداي-اق سەزدە وكىلەتتىك مەرزىمىنىڭ اياقتالۋىنا بايلانىستى ساياسي كەڭەس پەن ورتالىق باقىلاۋ-تەكسەرۋ كوميسسياسىنىڭ مۇشەلەرىن سايلاۋ ماسەلەسى دە قارالماق. وتىرىستا ساياسي كەڭەس مۇشەلەرى بۇل ماسەلەگە دە كوڭىل ءبولدى. ودان بولەك, وتىرىستا كەزەكتى XVIII سەزدىڭ جۇمىس ورگاندارى – مانداتتىق, ەسەپتىك, رەداكتسيالىق كوميسسيالاردىڭ جانە سەزد حاتشىلىعىنىڭ جەكە قۇرامدارى قارالىپ, ۇسىنىلدى. جيىن سوڭىندا پارتيا توراعاسىنىڭ ءبىرىنشى ورىنباسارى اتالعان سەزدىڭ پارتيا ءۇشىن ماڭىزى زور ەكەنىنە تاعى ءبىر نازار اۋداردى.
– سەزدىڭ قاراۋىنا پارتيامىزدىڭ ءارى قاراي دامۋىنا ۇلكەن اسەر ەتەتىن ماڭىزدى ماسەلەلەر ۇسىنىلىپ وتىر. سەزد جۇمىسىنا ەلباسى, پارتيا توراعاسىنىڭ قاتىسۋى دا بىزگە ۇلكەن جاۋاپكەرشىلىك جۇكتەيدى. سوندىقتان سەزدىڭ ەل دامۋىنا دا تيگىزەر اسەرى مول دەۋگە تولىق نەگىز بار, – دەدى م.اشىمباەۆ.
ايتا كەتەيىك, ساياسي كەڭەس پارتيانىڭ جوعارى وكىلدىك ورگانى. ونىڭ وكىلەتتىگىنە پارتيا سەزىنىڭ شەشىمدەرىن ورىنداۋ بويىنشا پارتيا ورگاندارى قىزمەتىنىڭ نەگىزگى باعىتتارىن انىقتاۋ, پارتيانىڭ قاتىسۋىمەن بولاتىن سايلاۋ كامپانيالارىنا قاتىستى ماسەلەلەردى قاراۋ, پارتيا اتىنان ساياسي مالىمدەمەلەر مەن ۇندەۋلەردى قاراۋ جانە ەنگىزۋ, پارتيا توراعاسىنىڭ ۇسىنىسى بويىنشا ءوز قۇرامىنان پارتيا ساياسي كەڭەسىنىڭ بيۋرو مۇشەلەرىن سايلاۋ, پارتيا سەزىن شاقىرۋ, ولاردىڭ كۇن ءتارتىبىن قالىپتاستىرۋ جانە باسقا دا ماسەلەلەردى شەشۋ كىرەدى. پارتيا ساياسي كەڭەسىنىڭ وكىلەتتىك مەرزىمى – 4 جىل.
جولدىباي بازار,
«Egemen Qazaqstan»
