ەمحاناسى – جاڭا, دارىگەرى – دارا ايماقتا دەنساۋلىق ساقتاۋ سالاسىندا ىلگەرىلەۋشىلىك بايقالادى
سەيسەنبى, 10 شىلدە 2012 7:28
«دەرتىن بەرگەن قۇداي, شيپاسىن دا بەرەدى» دەيدى حالىق دانالىعى. ءاسىلى, شيپا كوپ جاعدايدا دارىگەرلەردىڭ قولىمەن بەرىلەدى. سوندىقتان ادامزات بالاسى وسىناۋ ءبىر ماماندىق يەلەرىنىڭ الدىندا ءاردايىم ءوزىن قارىزدار ەكەنىن سەزىنىپ جۇرەتىن بولسا كەرەك. اقمەشىتتە اشىلعان №3 قالالىق ەمحانادا دا وسىنداي ابزال جاندار از ەمەس.
سەيسەنبى, 10 شىلدە 2012 7:28
«دەرتىن بەرگەن قۇداي, شيپاسىن دا بەرەدى» دەيدى حالىق دانالىعى. ءاسىلى, شيپا كوپ جاعدايدا دارىگەرلەردىڭ قولىمەن بەرىلەدى. سوندىقتان ادامزات بالاسى وسىناۋ ءبىر ماماندىق يەلەرىنىڭ الدىندا ءاردايىم ءوزىن قارىزدار ەكەنىن سەزىنىپ جۇرەتىن بولسا كەرەك. اقمەشىتتە اشىلعان №3 قالالىق ەمحانادا دا وسىنداي ابزال جاندار از ەمەس.
بۇل – ەلباسى نۇرسۇلتان نازارباەۆتىڭ تىكەلەي مۇرىندىق بولۋىمەن ومىرگە كەلگەن «100 مەكتەپ, 100 اۋرۋحانا» باعدارلاماسى اياسىندا سالىنعان ەمحانا ەكەنىن ايتقان ابزال. بۇگىندە قىزىلوردادا حالىق سانى جىل ساناپ ارتىپ كەلەدى. ەلدىڭ سانى ارتقان سايىن, حالىققا قىزمەت كورسەتەتىن ورىنداردىڭ دا تاپشىلىعى بايقالا تۇسەتىنى بەلگىلى. اسىرەسە, دەنساۋلىق ساقتاۋ سالاسىندا انىق بايقالىپ قالىپ جاتادى. اتالمىش ەمحانا ءبىر اۋىسىمدا 500-گە تارتا ادامدى قابىلداي الادى. قالاداعى №1 جانە №6 ەمحانالار قاشان بارساڭ ىعى-جىعى ادامعا تولى بولاتىن. جانىن ءشۇبەرەككە ءتۇيىپ بارعان ادامنىڭ ۇباق-شۇباق كەزەككە تۇرىپ قاجيتىنىن قالا تۇرعىندارى ءاردايىم ايتاتىن ەدى. ەندى مىنا №3 ەمحانانىڭ ارقاسىندا جوعارىدا اتالعان ەكى ەمدەۋ ورتالىعىنداعى جۇمىس ازاياتىن بولدى.
ەمحانادا ەكى ءبولىم بار. ءبىرىنشى بولىكتە ەرەسەكتەر ەمدەلەدى. ال بالالاردى قارايتىن ءبولىم ودان بولەك. ادەتتە بالالالار مەن ەرەسەكتەر ەمدەلەتىن ءبىر بولىپ كەلەدى. ال جاڭادان سالىنعان ەمحانادا ول ەكىگە ءبولىنگەن. بۇل جۇمىستى جۇيەلى جاساۋعا, ءبىرى-بىرىنە كەدەرگى كەلتىرمەۋگە وتە ىڭعايلى ەكەنىن ەكىنىڭ ءبىرى بىلەدى. ەمحانانىڭ ءىشى تولىقتاي جاڭا قۇرال-جابدىقتارمەن جاراقتالعان. بەس قارۋى ساي دەسە بولادى. اشىلعانىنا اپتادان جاڭا اسسا دا كەلىپ ەمدەلۋشىلەر وتە كوپ. جالپى ەمحانا بويىنشا 383 ادام جۇمىس ىستەيدى. ونىڭ 106-سى دارىگەرلەر. كۇندىزگى ستاتسيونارى دا ادامداردى قابىلداۋعا دايىن. كۇنىنە 50-گە تارتا ادام وسى ستاتسيوناردان دەرتىنە شيپا تابا الادى.
بۇل ەمحانا استانا, اراي, ساۋلەت سەكىلدى شاعىن اۋدانداردا ورنالاسقان 60 مىڭ ادامعا قىزمەت كورسەتەدى. مۇنىڭ ءوزى ۇلكەن قۋانىش.
جاقىندا رەسپۋبليكا بويىنشا 100 كلينيكانىڭ اراسىنان ۇزدىكتەر انىقتالدى. وبلىستىق ورتالىق اۋرۋحانانىڭ ەڭ ۇزدىك مەكەمەسىنىڭ اراسىنان كورىنۋى دە ءبىز ءۇشىن زور ءسۇيىنىش. ال وسى اۋرۋحانانىڭ باس دارىگەرى ناريمان تابىنباەۆ «ەڭ ۇزدىك مەنەدجەر» اتاعىن يەلەندى.
اقجولتاي اقپارات ءبىر بۇل عانا ەمەس. حيرۋرگ دارىگەرلەردىڭ كاسىبي شەبەرلىگى سىنعا تۇسكەن حالىقارالىق سايىس ءوتتى. وسى سايىستا وبلىستىق ورتالىق اۋرۋحانانىڭ حيرۋرگيا ءبولىمىنىڭ مەڭگەرۋشىسى ابدۋللا شۇلەنباەۆ ءىى ورىندى يەلەندى. 39 جىلدان بەرى 11 مىڭنان استام وتانى ءساتتى جاساپ, ءار كۇن سايىن ادام جانىن اجالدان اراشالاپ جۇرگەن دارىگەردىڭ ەڭبەگىنىڭ ەلەنگەنى بۇل. اتالمىش سىيلىق جۋىردا فرانتسيادا تابىس ەتىلمەك.
نەگىزى, قىزىلوردا وبلىسىندا دەنساۋلىق ساقتاۋ سالاسى بويىنشا ءبىرتالاي ىرگەلى ىستەر قولعا الىنىپ جاتىر. ءسوز اراسىندا سولاردى دا ايتا كەتەيىك. الداعى ۋاقىتتا پەريناتالدى ورتالىق قولدانىسقا بەرىلمەك. سونداي-اق بيزنەستىڭ الەۋمەتتىك جاۋاپكەرشىلىگىن ارتتىرۋ اياسىندا بولىنگەن قارجىعا قالالىق پەرزەنتحانا سالىنادى. سونىمەن بىرگە, 200 ورىندىق بالالار جانە 300 ورىندىق قالالىق اۋرۋحانانىڭ دا قۇرىلىسى جاقىن كۇندەرى باستالماق.
ەرجان بايتىلەس,
«ەگەمەن قازاقستان».
قىزىلوردا.
