«قازاقستان رەسپۋبليكاسى مەن وزبەكستان رەسپۋبليكاسى پرەزيدەنتتەرىنىڭ 2017 جىلعى 16 قىركۇيەكتەگى كەزدەسۋىندە 2019 جىلى وزبەكستاندا قازاقستان جىلىن اتاپ ءوتۋ تۋرالى شەشىم قابىلدانعان بولاتىن. وزبەكستان رەسپۋبليكاسىنىڭ پرەزيدەنتى شاۆكات ميرزياەۆ پەن قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ ەكى ەل اراسىندا مادەني-گۋمانيتارلىق بايلانىستاردى دامىتۋدىڭ ماڭىزدىلىعىن, تاريحىمىزدىڭ ورتاقتىعىن, رۋحاني جاڭعىرۋىمىزدى نازارعا الىپ, مادەني بايلانىستى دامىتۋدىڭ ماڭىزدىلىعىنا توقتالعانى بەلگىلى. ەلباسىمىز نۇرسۇلتان ءابىش ۇلى نازارباەۆ: ء«بىزدىڭ تىعىز مادەني-گۋمانيتارلىق بايلانىستارىمىز دوستىق قارىم-قاتىناستارىمىزدىڭ ماڭىزدى فاكتورى بولىپ سانالادى. وسى باستامالار اياسىندا وتكىزىلەتىن ءتۇرلى ءىس-شارالار ەكى باۋىرلاس حالىقتىڭ جاقىنداستىعىن ودان ءارى تەرەڭدەتۋگە سەپتىگىن تيگىزبەك» - دەپ اتاپ ءوتتى. مادەنيەت جانە سپورت مينيسترلىگىنىڭ قولداۋىمەن ەڭ العاشقى ءىس-شارانى باستاپ تاشكەنت قالاسىنا كەلدىك.قورىندا 25 مىڭنان استام جادىگەرى بار «ازىرەت سۇلتان» مەملەكەتتىك تاريحي-مادەني قورىق-مۋزەيىنىڭ وزبەكستان رەسپۋبليكاسىندا كورمەنى وتكىزۋدەگى ماقساتى — ەكى ەل اراسىنداعى مادەني-گۋمانيتارلىق قارىم-قاتىناستاردى نىعايتۋ, تۇركى الەمىنىڭ قارا شاڭىراعى تۇركىستاننىڭ تاريحي ورنىن, ونىڭ مادەني-رۋحاني كەلبەتىن اشىپ كورسەتۋ, تاريحي جادىگەرلەردى ناسيحاتتاۋ, مادەني بايلانىستى كەڭەيتۋ, مۋزەيلەر اراسىنداعى كوممۋنيكاتسيانى نىعايتۋ. رۋحاني بايلانىس, مادەني قارىم-قاتىناسى ەگىز قوس ەلدىڭ ىنتىماعى ارتا بەرسىن!», دەدى قورىق-مۋزەي باسشىسى نۇربولات قادىر ۇلى.
كورمە ەكسپوزيتسياسىنا 50-دەن اسا فوتو كارتينالار مەن قورىق-مۋزەيدىڭ شىعارعان باسپا ونىمدەرى قويىلدى.
1871-1872 جىلدارى جيھانكەز ا.كۋننىڭ «تۇركىستان البومىندا» جارىق كورگەن تۇركىستان قالاسى, قوجا احمەت ياساۋي كەسەنەسى, ونداعى ءامىر تەمىردىڭ بۇيرىعىمەن جاسالعان ءحىV عاسىردىڭ قۇندى جادىگەرلەرى - تايقازان, لاۋھا (تۋدىڭ ۇشى), شىراعداندار, ەسىكتەر مەن قورىق-مۋزەي قورىنداعى ەتنوگرافيالىق, ارحەولوگيالىق ماتەريالدار, تۇركىستان وڭىرىندەگى تاريحي-رۋحاني ورىنداردىڭ فوتوسۋرەتتەرى كوپشىلىك نازارىنا ۇسىنىلدى.
شارا بارىسىندا وزبەكستاندىق كورمە تاماشالاۋشىلار «تۇركىستان ءافساناسى» دەرەكتى ءفيلمىن دە تاماشالادى. سونداي-اق, قورىق-مۋزەي مەملەكەت باسشىسى ن.ءا.نازارباەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا كورسەتىلگەن «جاھانداعى زاماناۋي قازاقستاندىق مادەنيەت» جوباسىن نەگىزگە الا وتىرىپ, ۇلى دالانىڭ رۋحاني مۇرالارىن شەتەلدەردە تانىتۋ, ناسيحاتتاۋ ارقىلى ەلىمىزدەگى تاريحي ورىندارعا شەتەلدىكتەردىڭ قىزىعۋشىلىعىن تۋدىرۋدى كوزدەيدى.
قازاقستان رەسپۋبليكاسى مادەنيەت جانە سپورت مينيسترلىگى «ازىرەت سۇلتان» مەملەكەتتىك تاريحي-مادەني قورىق-مۋزەيى» رمقك 2018 جىلى تۇركيا رەسپۋبليكاسىنىڭ كاستامونۋ, انكارا, بۋرسا قالالارىندا «قوجا احمەت ياساۋي مۇرالارى جانە تۇركىستان» تاقىرىبىندا, گرەكيانىڭ سالونيكي, رەسەيدىڭ سوچي قالالارىندا حالىقارالىق كورمەلەرگە قاتىستى.
كورمە ءبىر اي كەلۋشىلەرگە قىزمەت كورسەتەدى.
