قالا تۇرعىندارىنىڭ ءبىرى اكىمگە وسكەمەن كوشەلەرىندە شەتەلدىك سپورتشىلاردىڭ ءجيى ۇشىراساتىنىن ايتىپ, ولاردىڭ قانداي ماقساتپەن قونىستانىپ جاتقانىن سۇرادى. شقو اكىمى ول سپورتشىلار ەلىمىزدىڭ اتىنان بايراقتى باسەكەلەردە سىنعا ءتۇسىپ قانا قويماي, جەرگىلىكتى سپورتشىلاردىڭ دايىندىق دەڭگەيىنىڭ كوتەرىلۋىنە ىقپال ەتەتىنىن اتادى.
ء«وزىم بىرنەشە رەت كۋا بولدىم. تاڭەرتەڭ ەرتە جۇگىرۋگە شىقساڭىز, جاتتىعىپ جۇرگەن كەنيالىق قىزداردى كورەسىز. ولار ءار كۇننىڭ 7 ساعاتىن جاتتىعۋعا ارنايدى. جەرگىلىكتى اتلەتتەر اراسىندا ولگا رىپاكوۆا عانا وسىلاي تىنىمسىز ەڭبەك ەتەدى. كەنيالىق قىزدار وسى ىسىمەن وزگە جاس سپورتشىلارعا ۇلگى بولىپ ءجۇر», - دەدى دانيال احمەتوۆ.
4 كەنيالىق سپورتشى سوڭعى ءبىر جىل كولەمىندە جەرگىلىكتى «التاي اتلەتيكس» كلۋبىنىڭ اتىنان سىنعا ءتۇسىپ, حالىقارالىق بايراقتى باسەكەلەردە بىرنەشە رەت توپ جاردى. تورتەۋى دە قازاقستان رەسپۋبليكاسىنىڭ ازاماتتىعىن العان, حالىقارالىق جەڭىل اتلەتيكا فەدەراتسياسى قاۋىمداستىعىنىڭ ۇزدىكتەر رەيتينگىنە كىرەدى.
«جۋىردا مەن حالىقارالىق جەڭىل اتلەتيكا فەدەراتسياسىنىڭ (IAAF) پرەزيدەنتى سەباستيان كوەمەن كەزدەستىم. جۇزدەسۋ بارىسىندا وعان قازاقستاندا IAAF ايماقتىق دامۋ ورتالىعىن اشۋدى ۇسىندىم. قازىر الەمدە وسىنداي توعىز ورتالىق بار. ەگەر ول ورتالىق اشىلعان جاعدايدا ەلىمىزدىڭ عانا ەمەس, وزگە مەملەكەتتەردىڭ دە ماماندارى الەمدىك دەڭگەيدەگى ءبىلىم الۋ ءۇشىن بىزگە كەلەتىن بولادى», - دەدى ەسەپتى كەزدەسۋ بارىسىندا وبلىس باسشىسى دانيال احمەتوۆ.
