سەمەيگە ارنايى جۇمىس ساپارىمەن كەلگەن «ەگەمەن قازاقستان» گازەتىنىڭ باسقارما توراعاسى دارحان قىدىرالى قالاداعى شاكارىم اتىنداعى مەملەكەتتىك ۋنيۆەرسيتەتتە بولىپ, «اكمە» حالىقارالىق كلۋبىنىڭ اياسىندا كەزدەسۋ وتكىزدى.
جيىندى العى سوزبەن اشقان شاكارىم ۋنيۆەرسيتەتىنىڭ رەكتورى, پروفەسسور مەيىر ەسكەندىروۆ ەلىمىزدىڭ باس باسىلىمىن مەرەيتويىمەن قۇتتىقتاي كەلە, الداعى ۋاقىتتا ەلباسى نۇرسۇلتان نازارباەۆتىڭ « ۇلى دالانىڭ جەتى قىرى» تاريحي ماقالاسى مەن «رۋحاني جاڭعىرۋ» باعدارلاماسىنا وراي بىرلەسە جۇمىس ىستەۋدى ءوتىندى.
ال «ەگەمەن قازاقستان» گازەتىنىڭ باسشىسى وسى حالىقارالىق كلۋب اياسىندا قازىرگى زامانعى جۋرناليستيكاداعى وزگەرىستەر جانە سوعان وراي ەل گازەتى «ەگەمەن قازاقستاننىڭ» زاماناۋي بەتالىسى, سوڭعى تەحنولوگيالىق وزگەرىستەر جايلى كەڭىنەن اڭگىمەلەپ بەردى.
كەلەلى اڭگىمەگە شاكارىم ۋنيۆەرسيتەتىنىڭ پروفەسسورى اراپ ەسپەنبەتوۆ, ابايتانۋشى عالىم عاريفوللا ەسىم, «ەگەمەن قازاقستان» گازەتىنىڭ ارداگەرلەرى, قۇرمەتتى جۋرناليستەر داۋلەت سەيسەن ۇلى, وڭداسىن ەلۋبايلار دا قوسىلدى. جيىن ونلاين رەجيمى تۇرىندە جۇرگەندىكتەن ءىس-شاراعا تىكەلەي قوسىلعانداردىڭ ءبارى تاماشالادى. د.قىدىرالى «رۋحاني جاڭعىرۋ» وڭىرلىك ءوفيسىنىڭ جۇمىسىمەن تانىسىپ, اقىندار مەكتەبىنىڭ شاكىرتتەرىمەن جۇزدەستى. ولاردىڭ جۋرناليستيكا, تاريح, تۇركولوگيا سالاسىنا بايلانىستى قويعان سۇراقتارىنا جاۋاپ بەردى.
راۋشان نۇعمانبەكوۆا,
«ەگەمەن قازاقستان»
سەمەي
