لەبىزدەر
جۇما, 8 ماۋسىم 2012 7:38
ماڭىزى زور شارا
سارا مۋرادوۆا,
ازەربايجان رەسپۋبليكاسى مادەنيەت جانە تۋريزم ءمينيسترىنىڭ كەڭەسشىسى:
جۇما, 8 ماۋسىم 2012 7:38
ماڭىزى زور شارا
سارا مۋرادوۆا,
ازەربايجان رەسپۋبليكاسى مادەنيەت جانە تۋريزم ءمينيسترىنىڭ كەڭەسشىسى:
– ءبىزدىڭ ەلدىڭ قازاقستانداعى مادەنيەت كۇندەرىنىڭ ءوتۋى – باۋىرلاس, تۋىستاس ەكى ەلدىڭ ومىرىندەگى ماڭىزدى وقيعالاردىڭ ءبىرى دەپ ويلايمىن.
ءبىزدىڭ جۇمىس نەگىزى بىرنەشە باعىتقا بولىنگەن. سونىڭ ىشىندە تۇركىتىلدەس ەلدەرمەن ىنتىماقتاستىقتى نىعايتۋ, بايلانىستى قالىپتاستىرۋ سياقتى ماڭىزدى جۇمىستارعا ەرەكشە كوڭىل بولىنگەن.
ازەربايجاننىڭ قازاقستانداعى مادەنيەت كۇندەرى 10 ماۋسىمعا دەيىن سوزىلادى. بۇگىن, ەرتەڭ ءبىز استانادا بولساق, 9 ماۋسىمدا الماتىدا كونتسەرت قويامىز. جالپى, قازاقستانعا ءبىز ەلىمىزگە عانا ەمەس, الىس, جاقىن شەتەلدەرگە تانىمال ءبىراز ونەر قايراتكەرلەرىمىزبەن كەلىپ وتىرمىز. ونىڭ ىشىندە اسلان گۋسەينوۆ دەگەن ەسترادا ءانشىسى بار. ول كىسى بۇرىن قازاقستاندا تۇرعان. وسى جەردە تۋىپ-ءوسكەن. كەيىن اتامەكەنى ازەربايجانعا كوشىپ كەلگەن. ول قازاقستاندى ءوزىنىڭ بەس ساۋساعىنداي جاقسى بىلەدى. وسى كىسىلەردى ءبىزدىڭ ەلدەردىڭ مادەنيەتىن جالعاپ, ءبىر-بىرىمىزگە دەگەن ىستىق ىقىلاستارىمىزبەن بولىسەتىن ادامدار دەپ سانايمىن.
نيەتىمىز ءبىر, تىلەگىمىز ءبىر
زاير گاسسىموۆ,
ازەربايجان مەملەكەتتىك بي انسامبلىنىڭ ديرەكتورى:
– بۇل ءبىزدىڭ قازاقستانعا العاش رەت كەلۋىمىز ەمەس. ءتاۋەلسىزدىكتىڭ 20 جىلى ىشىندە ازەربايجاننان قازاقستانعا, ءسىزدەردەن ءبىزدىڭ ەلگە كوپتەگەن ونەر ۇجىمدارى كەلىپ, ءوز ونەرلەرىن ورتاعا سالىپ قايتقان. ال بۇل جولعى ءبىزدىڭ ساپارىمىز ازەربايجاننىڭ قازاقستانداعى مادەنيەت كۇندەرىمەن ورايلاسىپ وتىر.
ءبىزدىڭ ەلدىڭ مادەنيەتىنىڭ تامىرى قازاق حالقىنىڭ سالت-ءداستۇرى, ونەرى, مادەنيەتى سياقتى تەرەڭدە جاتىر. وعان مىڭداعان عاسىرلار بولعان. سول مادەنيەتتى تارام-تارام ۇرپاق ارقىلى بۇگىنگى كۇنگە دەيىن جەتكىزۋ ۇلكەن ەڭبەك, ۇلكەن وتانسۇيگىشتىك سەزىمنەن پايدا بولعان دەيمىن. وسى جولى ءبىز استانا مەن الماتىدا ءانشى, بيشىلەرىمىزدىڭ عانا ەمەس, مۋگاماتيستەردىڭ شىعارماشىلىعىن دا كورسەتەمىز. سونداي-اق, اسلان گۋسەينوۆ دەگەن ەسترادا ءانشىمىز ءوز ونەرىن ورتاعا سالسا, ءبيشى قىز-جىگىتتەرىمىز قالىڭ قازاقتىڭ الدىندا بارىنشا جاقسى ونەر كورسەتەدى دەپ سەنەمىن.
ءبىزدىڭ انسامبل شەتەلگە ءجيى شىعىپ تۇرادى. جاقىندا ماسەلەن, كيەۆتە بولدىق. ۋكراينا استاناسى ءبىزدى جاقسى قارسى الدى. ال كونتسەرت كەزىندە ءبىز جەرگىلىكتى حالىقتى ءتانتى ەتتىك دەپ ويلايمىن. ولاردىڭ ءبىزدى كەتەرىمىزدە جاقسى شىعارىپ سالعانىنا قاراعاندا, سولاي دەۋگە نەگىز بار.
وسى انسامبلدە ديرەكتور بولعانىما ءبىراز ۋاقىت ءوتتى. شەتەلگە شىقساق, ءتاجىريبەمەن بولىسەمىز. ءوز ونەرىمىزدى كورسەتۋگە ايانبايمىز. ەندى قازاقستانعا باراسىزدار دەگەندە قاتتى قۋانىپ كەتتىم. ءبىز نيەتىمىز, تىلەگىمىز ءبىر تۋىس حالىقتارمىز عوي.
استانا ماعان ۇنادى
نازيم ناسيروۆ,
ازەربايجان مەملەكەتتىك بي ءانسامبلىنىڭ ءبيشىسى:
– ازەربايجاننىڭ قازاقستانداعى ءمادەنيەت كۇندەرىنىڭ باعدارلاماسىندا كوپتەگەن ءىس-شارالار جوسپارلانعان. وسىنىڭ ءوزى ءبىزدىڭ ەلدەر اراسىنداعى دوستىقتى, ىنتىماقتاستىقتى ءبىلدىرەدى. ءبىزدىڭ باعدارلاما بەيبىتشىلىك جانە كەلىسىم سارايىندا فوتوكورمەمەن باستالسا, ودان ءارى شىعارماشىلىق ۇجىمداردىڭ قاتىسۋىمەن وتەتىن كونتسەرتپەن جالعاسادى.
ءبىزدىڭ انسامبل ازەربايجاننىڭ ەجەلدەن كەلە جاتقان بيلەرى مەن حالىق اندەرىن ورىنداۋمەن ەرەكشەلەنەدى. سوندىقتان بولار, ءوزىم وسى ۇجىمنىڭ ءبىر مۇشەسى بولىپ, حالىقپەن ءوز ونەرىممەن ءبولىسىپ جۇرگەنىمە ريزامىن. مەن بيمەن 15 جىلدان بەرى اينالىسامىن. مەكتەپ بىتىرە سالىسىمەن باكۋ حورەوگرافيالىق ۋچيليششەسىنە وقۋعا تۇسكەنمىن. سونى ويداعىداي ءبىتىرىپ, ەندى, مىنە بىرنەشە جىلدان بەرى ءانسامبلدىڭ مۇشەسى بولىپ جۇرگەن جايىم بار.
ءبىزدىڭ ۇجىم شەتەلدەرگە ءجيى شىعادى. سوڭعى رەت ۋكراينادا گاسترولمەن بولدىق. قازاقستانعا بۇعان دەيىن ءبىزدىڭ انسامبل ءىس-ساپارمەن بولعان دا شىعار, بىراق بۇل مەنىڭ استاناعا العاش رەت كەلۋىم. استانا ماعان ۇنادى. ءبىزدىڭ باكۋ سياقتى سامال جەلدى قالا ەكەن. باكۋدى سامال جەلدى قالا دەيتىنىن بىلەتىن شىعارسىزدار. وسىنداي تىركەس استاناعا دا جاراسا ما دەيمىن.
التىن كوپىر
ۆۋگار گۋليەۆ,
ازەربايجان مەملەكەتتىك بي انسامبلىنىڭ ءبيشىسى:
– عاسىردان-عاسىرعا جالعاسىپ, تارام-تارام ۇرپاق ارقىلى جەتكەن مادەنيەتتى ناسيحاتتاۋ – اتا-بابامىزدىڭ الدىنداعى پارىزىمىز بولسا, وسكەلەڭ ۇرپاق الدىنداعى قاسيەتتى بورىشىمىز.
ءبىزدىڭ مەملەكەتتىك بي ءانسامبلى قۇرىلعان كەزدەن بەرى تەك حالقىمىزدىڭ باي مادەنيەتىن, ونەرىن ناسيحاتتاۋمەن كەلەدى. ءبىز كسرو كەزىندە دە حالقىمىزدىڭ ونەرىن وزگە ەلدەرگە ناسيحاتتاپ, دامىتۋ ءۇشىن كوپ جۇمىس ىستەگەنبىز. ال تاۋەلسىزدىك العان كەزدە بۇل جۇمىس ودان ءارى دامي باستادى. بۇگىندە ەۋروپا جانە ازيا ەلدەرىندە ءبىزدىڭ ءانسامبلدى بىلمەيتىن ەلدەر جوق دەسەم بولادى. انسامبلدىڭ قۇرامىندا 50 شاقتى ادام بار.
جاقىندا بىزگە مينيسترلىكتەگى باسشىلارىمىز قازاقستانعا بارامىز, ازەربايجاننىڭ مادەنيەت كۇندەرى وتەدى دەگەندە ءبارىمىز دە وسى ۇسىنىسقا قۋانا كەلىستىك. ويتكەنى, قازاقستاندا تۇركى حالىقتارىنىڭ مادەنيەتىنە, ونەرىنە ۇلكەن قۇرمەتپەن قارايتىنىن بىلەمىز. ماسەلەن, تۇركسوي ۇيىمى قازىر دۇنيە جۇزىندەگى تۇركى تەكتەس ەلدەردى بىرىكتىرەتىن ۇلكەن ۇيىمعا اينالىپ وتىر. سوندىقتان ءبىزدىڭ حالىقتار اراسىندا التىن كوپىر بولاتىن وسىنداي شارالار ءجيى وتكىزىلسە, مەملەكەت باسشىلارىمىزدىڭ اراسىندا دوستىق, ىنتىماقتاستىق قاتىناس نىعايسا, ءبىزدىڭ ەلدەر ءبىر-بىرىنە دەمەۋ بولىپ, قولداۋ كورسەتىپ, ءالى بيىك بەلەستەرگە جەتەتىنىنە سەنەمىن.
