كومەگى كول-كوسىر
سارسەنبى, 23 مامىر 2012 7:34
حالىق ساۋلىعى – ۇلت بولاشاعىنىڭ كەپىلى. سوندىقتان مەملەكەتتىڭ باستى بايلىعى بولىپ سانالاتىن ادام دەنساۋلىعى باستى نازاردا بولاتىنى بەسەنەدەن بەلگىلى ءجايت. بۇل باعىتتا ەلىمىزدە «سالاماتتى قازاقستان» سەكىلدى ىرگەلى باعدارلامالار قولعا الىنىپ, جۇزەگە اسىپ جاتىر. ونىڭ سىرتىندا دا قىرۋار شارۋا اتقارىلعانىن كوز كوردى. سوڭعى جىلدارى رەسپۋبليكا بويىنشا سانيتارلىق اۆياتسياعا باسىمدىق بەرىلگەنىن بىلەمىز. سونىمەن قاتار, كۇرەجولدىڭ بويىندا مەديتسينالىق بەكەتتەر اشىپ, جولاۋشىلاردىڭ دەنساۋلىق قاۋىپسىزدىگىن ساقتاۋ دا ويدا بار دۇنيە.
سارسەنبى, 23 مامىر 2012 7:34
حالىق ساۋلىعى – ۇلت بولاشاعىنىڭ كەپىلى. سوندىقتان مەملەكەتتىڭ باستى بايلىعى بولىپ سانالاتىن ادام دەنساۋلىعى باستى نازاردا بولاتىنى بەسەنەدەن بەلگىلى ءجايت. بۇل باعىتتا ەلىمىزدە «سالاماتتى قازاقستان» سەكىلدى ىرگەلى باعدارلامالار قولعا الىنىپ, جۇزەگە اسىپ جاتىر. ونىڭ سىرتىندا دا قىرۋار شارۋا اتقارىلعانىن كوز كوردى. سوڭعى جىلدارى رەسپۋبليكا بويىنشا سانيتارلىق اۆياتسياعا باسىمدىق بەرىلگەنىن بىلەمىز. سونىمەن قاتار, كۇرەجولدىڭ بويىندا مەديتسينالىق بەكەتتەر اشىپ, جولاۋشىلاردىڭ دەنساۋلىق قاۋىپسىزدىگىن ساقتاۋ دا ويدا بار دۇنيە. وسى تۇرعىدان العاندا قىزىلوردا وبلىسىندا دا ءبىرشاما شارۋا اتقارىلدى. ماسەلەن, بىلتىردىڭ وزىندە سانيتارلىق اۆياتسيا بويىنشا وبلىستا 7285 شاقىرتۋ بولىپ, حالىققا قىزمەت كورسەتىلگەن. ەندى وسىنى تاراتىپ ايتايىق.
سانيتارلىق اۆياتسيا دەگەندە ويعا بىردەن ۇشاق پەن تىكۇشاقتىڭ ورالاتىنى جاسىرىن ەمەس. دەگەنمەن, اتالمىش باعىتتا تەك اۋە ارقىلى قىزمەت كورسەتىلەدى دەسەك, اعات ايتقاندىق بولار ەدى. بۇل باعىتتا كولىكپەن دە, تەلەفون ارقىلى دا قىزمەت كورسەتىلە بەرەدى. سونداي-اق پويىزبەن, تەلەمەديتسينا ارقىلى دا اۋرۋىنا شيپا تاۋىپ جاتقاندار بار. مىسالى, بىلتىر 431 ادامعا كولىك ارقىلى ەم جاسالىپ, ورتالىققا جەتكىزىلگەن ەكەن. ال ان-2 ۇشاعىمەن 27 كىسىگە كومەك بەرىلگەن. مي-8 تىكۇشاعى ارقىلى 38 ەمدەلۋشىنىڭ جاعدايى جاسالعان. شويىنجولمەن كەلگەن ادامداردىڭ سانى 38-ءدى قۇراعان. 195 ادام تەلەمەديتسينانىڭ كومەگىنە جۇگىنگەن. تەلەفون ارقىلى 150 ادامعا اقىل-كەڭەس بەرىلگەن. شالعايدا جاتقان, كولىكتىڭ قاتىناۋى قيىن ەلدى مەكەندەردەگى تۇرعىندارعا دارىگەرلەر ارىپتەستەرى جەتكەنشە تەلەفون ارقىلى اقىل-كەڭەسىن بەرىپ, تالاي ادامنىڭ ومىرىنە اراشا ءتۇسىپ جاتىر. بىلاي قاراعاندا, قاراپايىم عانا دۇنيە سياقتى. ال استارىنا ۇڭىلسەڭىز, تالاي تاعدىردىڭ تەلەفون تۇتقاسىمەن امان قالىپ جاتقانىن سەزىنەسىز.
تاعى دا سانداردى سويلەتىپ كورەيىك. بۇل جولى سانيتارلىق اۆياتسيا ارقىلى ءبىرىنشى توقساننىڭ عانا كورسەتكىشىن ايتساق تا جەتكىلىكتى. اتالعان قىزمەت وكىلدەرى 185 رەت اۋداندارعا بارعان. ءۇش ايدا. اۆتوكولىكپەن 130, ۇشاقپەن 37, پويىزبەن 10, تەلەمەديتسينا ارقىلى 74, تەلەفونمەن 8 ادامعا كومەك كورسەتىلگەن. تىكۇشاقتىڭ 20 قاڭتارعا دەيىن عانا وبلىستا قىزمەت كورسەتكەنىن ايتتىق. سول جيىرما كۇننىڭ ىشىندە تىكۇشاق 8 رەت اۋەگە كوتەرىلىپتى. بۇل دا از ەمەس. ول كەتكەننەن كەيىن ان-2 ۇشاعىنىڭ جۇمىسى ارتقانىن كورىپ وتىرمىز.
اقمەشىت اتىرابىنداعى اق حالاتتىلاردىڭ شاماسى كەلمەيتىن دە ناۋقاستار بولادى. ماسەلەن ەكىقابات ايەلدەردە كەزدەسەتىن كەيبىر كەسەلدەر مەن ءبىر جاسقا دەيىنگى بالالارعا جەدەل نەوناتالدى كومەك كورسەتۋ ازىرگە ءبىزدىڭ دارىگەرلەر ءۇشىن قيىندىق تۋعىزادى. ونىڭ ءتۇرلى سەبەپتەرى بار. وسىنداي ساتتەردە وبلىس دارىگەرلەرى كورشى وڭتۇستىك قازاقستان وبلىسىنىڭ نەمەسە استانا مەن الماتىداعى ارىپتەستەرىنىڭ كومەگىنە جۇگىنەدى. اتالعان قالالاردا ارنايى عىلىمي-زەرتتەۋ ينستيتۋتتارى مەن كلينيكالار بار. ناۋقاستار سوندا جەتكىزىلەدى. جىل باسىنان بەرى 7 ادام سانيتارلىق اۆياتسيا ارقىلى جوعارىدا ايتىلعان ءۇش قالاعا جەتكىزىلگەن.
جاقىندا عانا وبلىستىق مەديتسينالىق ورتالىقتىڭ قىزمەتكەرلەرى ارال اۋدانىنا بارىپ, سوندا وتە كۇردەلى وتا جاساپ قايتتى. وبلىستاعى بەلدى نەيروحيرۋرگ-دارىگەر شىنجىرباي ورازماحان ۇلى ناۋقاستىڭ جۇرۋگە جاعدايى كەلمەگەننەن كەيىن اۋدانعا ارنايى بارىپ, ونىڭ باسىنا وتا جاسادى.
– ءبىز ارال اۋدانىندا س.نيازوۆ دەگەن ازاماتتىڭ باسىنا وتا جاسادىق. جاعدايى تۇراقتالىپ, ومىرىنە قاۋىپ تونبەيتىن بولعاندىقتان, وبلىستىق مەديتسينالىق ورتالىققا جەتكىزدىك. سونىمەن قاتار, قازالى اۋدانىندا دا ءبىر ەكىقابات ايەلدىڭ جاعدايى تىم اۋىرلاپ, قۇرساعىنداعى بالا مەن ءوزىنىڭ ومىرىنە قاۋىپ ءتوندى. ءبىزدىڭ اكۋشەر-گينەكولوگتار ونىڭ ومىرىنە اراشا ءتۇسىپ, امان الىپ قالدى. ول كىسى دە ورتالىققا جەتكىزىلدى. قازىرگى ۋاقىتتا ەكى ناۋقاستىڭ دا جاعدايى جاقسى. شۇكىر, – دەيدى دارىگەر.
سانيتارلىق اۆياتسيا تالاي تاعدىردىڭ دەنساۋلىعىن تۇزەپ بەرىپ, اجالدان اراشالاپ قالىپ جاتىر. سول سەبەپتى وسى باعىتتاعى جۇمىستارعا الداعى ۋاقىتتا دا تيىسىنشە قولداۋ كورسەتىلە بەرسە دەگەن تىلەك بار.
ەرجان بايتىلەس,
«ەگەمەن قازاقستان».
قىزىلوردا وبلىسى.
