«ارايدىڭ داۋسىن ەستىگەن بويدا ۇيگە كىرىپ باردىم. قويۋ ءتۇتىن ارالاس ءورت ىشىندە ءبىر بۇرىشتا كورشىمنىڭ 6 جاسار قىزى مەن 3 جاسار ۇلى قاتتى قورقىپ جۇرە الماي وتىر ەكەن. جاراقات العان قولىما قاراماستان دەرەۋ بىرەۋىن كوتەرىپ, ەكىنشىسىن جەتەكتەپ قاۋىپسىز ايماققا الىپ شىقتىم. سۋ بەرىپ, قۇتقارۋ شارالارىن جاسادىم. قايعىلى جاعدايدىڭ الدىن الۋىما مەكتەپ قابىرعاسىندا ءورت قاۋىپسىزدىگى تۋرالى وقىپ-ۇيرەنگەندىگىمنىڭ پايداسى ءتيدى», دەيدى باقىتجان قۇدايقۇل ۇلى.
باتىر بالا اناسىنا 101 جەلىسىنە حابارلاسۋىن ەسكەرتكەن. الايدا, ءورت ءسوندىرۋ قىزمەتكەرلەرى جەتكەنشە ءۇيدى لاۋلاعان ءورت قۇشاعىنا الىپ ۇلگەرگەن.
16 اقپاندا اباي اۋدانىنىڭ قۇرساي شاعىن اۋدانىنداعى ۇيلەردىڭ بىرىندە ءورت شىققانى تۋرالى حابارلاما ساعات 16.39-دا كەلىپ ءتۇستى. ءورت ءسوندىرۋ قىزمەتىنىڭ 14 ادامنان قۇرالعان توبى جاڭاقۇرىلىس كوشەسىندەگى ۋاقىتشا سالىنعان ۇيدەگى (ۆرەميانكا) 60 شارشى مەتردى شارپىعان ءورتتى 2 ساعاتتا ءسوندىردى.
توتەنشە جاعداي قىزمەتى تاراتقان اقپارات بويىنشا ءورت سالدارىنان ادام شىعىنى ورىن العان جوق. بۇعان باستى سەبەپكەر – قۇتقارۋشى بالا», دەيدى ماماندار.
وسىلايشا ايدىڭ-كۇننىڭ امانىندا كورشى بالانىڭ ەرجۇرەكتىگىنىڭ ارقاسىندا ەكى ءبۇلدىرشىن اتا-اناسىمەن قايتا قاۋىشتى. «بالالاردىڭ قاتتى قورىققانى بولماسا, جاعدايلارى جاقسى. ءورت بولعان كەزدە ۇيدە اتا-اناسى بولعان جوق. ماماندار ءورتتىڭ سەبەبىن انىقتاۋدا», دەيدى توتەنشە جاعدايلار دەپارتامەنتىنىڭ وكىلى ماديار ەلەۋسىز ۇلى.
باقىتجاننىڭ سىنىپ جەتەكشىسى باقىتگۇل لەكەروۆانىڭ ايتۋىنشا, باتىر بالا ءتورت اعايىندى بالانىڭ كەنجەسى ەكەن. سىنىپتا تەك بەلسەندىلىگىمەن كوزگە ءتۇسىپ جۇرەتىندىگىن جەتكىزدى.
«وقۋشىمىزدىڭ بۇل ارەكەتى ءوز قاتارلاستارىنا ۇلكەن ونەگە بولارى انىق. سەبەبى, جانىپ تۇرعان وتقا جاس بالا تۇگىل ۇلكەندەردىڭ وزدەرى تىكسىنبەي كىرۋى مۇمكىن ەمەس. سىنىپتا اينالاسىنا مەيىرىم شۋاعىن شاشىپ جۇرەتىن باقىتجاننىڭ تاربيە ساعاتتارىنا قاتىسۋى دا بەلسەندى. ءبىلىم ۇياسى وسىنداي باتىر پەرزەنتتەرمەن ماقتانا الادى», دەيدى سىنىپ جەتەكشىسى.
قالالىق تجد باسشىسى نۇربولات دەربىسوۆ باتىر ۇلدى ارنايى العىس xاتپەن ماراپاتتادى, سونداي-اق «ەرلىگى ءۇشىن» مەدالىمەن ماراپاتتاۋ ءۇشىن ەلىمىزدىڭ ءىىم اتىنا جانە ارنايى العىس xاتپەن ماراپاتتاۋ ءۇشىن قالالىق اكىمدىككە ۇسىنىس جولدادى.
دەپارتامەنت باسشىسى ەرجۇرەك بالانىڭ بۇل ارەكەتى بىزگە ۇلكەن كومەك بولدى دەيدى. «بولاشاقتا دايىن قۇتقارۋشى بولۋعا سۇرانىپ تۇر. سالالىق جوعارى وقۋ ورىندارىنا تۇسۋىنە كەڭەس بەرەمىز ءارى قولدايمىز», دەيدى ن.دەربىسوۆ.
ءورتتىڭ نەدەن تۋىنداعانى دا كەيىننەن انىقتالدى. نەگىزىندە ۇيدەگى التى جاسار قىز بەن ءۇش جاسار ۇل وتتىقپەن ويناپ وتىرىپ, ارتىنشا ورتكە ۇلاسقان. وزدەرى وشىرمەك بولعان ءورت ۇلعايا تۇسكەن.
توتەنشە جاعدايلار دەپارتامەنتىنىڭ قىزمەتكەرلەرى كۇرساي شاعىن اۋدانىندا بىرنەشە رەت رەيدتىك ءىس-شارالار وتكىزگەن. شاھاردىڭ شاعىن اۋداندارىندا ءورت اپاتتارىنىڭ ءجيى ورىن الاتىنىنىڭ سەبەبى, كوپتەگەن ءۇيدى جىلىتۋ ءۇشىن قاتتى وتىن پايدالانىلادى.
نۇرشات توكەن,
«Egemen Qazaqstan»
شىمكەنت
