قازاقستان • 18 اقپان، 2019

شىمكەنتتە ورتەنىپ جاتقان ۇيدەن سابيلەردى امان الىپ قالعان جاس باتىر ماراپاتتالدى

277 رەتكورسەتىلدى

شىمكەنتتە ورتەنىپ جاتقان ۇيدەن سابيلەردى امان الىپ قالعان 13 جاستاعى باقىتجان بەركىمباەۆتى تج دەپارتامەنتىنىڭ باستىعى ماراپاتتادى. بۇگىن دەپارتامەنتتىڭ داعدارىس ورتالىعىندا ءجاسوسپىرىمنىڭ ەرلىگى تۋرالى ءباسپاسوز كونفەرەنتسيادا ايتىلدى.

ەسكە سالا كەتەيىك. 2019 جىلعى 16 اقپاندا قۇرساي مولتەك اۋدانىنداعى جاڭاقۇرىلىس كوشەسىندە ۋاقىتشا سالىنعان ۇيدە ءورت ورىن العان. سەگىزىنشى سىنىپتا وقيتىن بالا وتقا ورانعان ۇيگە قورىقپاي كىرىپ، ءبىر شەتتە قورقىپ وتىرعان 6 جاسار قىزدى جانە 3 جاسار بالانى دالاعا الىپ شىعادى. ايتا كەتەتىن جاعداي، باقىتجان ءوزى جاقسى كورەتىن فۋتبول ويناپ جۇرگەن كەزدە قولىن شىعارىپ الىپتى. سوعان قاراماستان، جىگەرلى جاس باتىر ەر ازاماتتارعا ءتان ەرلىك جاساپ وتىر.

دەپارتامەنت باستىعى ازاماتتىق قورعاۋ پولكوۆنيگى نۇربولات دەربيسوۆ:   «باقىتجان كەلەشەكتە بىزگە قۇتقارۋشى بولىپ كەلەدى دەپ سەنەمىز. مۇنداي جىگىتتەرگە ءبىز ارنايى وقۋ ورنىنا بارۋ تۋرالى ۇسىنىس ايتامىز. ءبىز ءۇشىن ونىڭ دەر كەزىندە جاساعان ارەكەتى ۇلكەن ەرلىك دەپ ايتار ەدىم. ونىڭ اتا-اناسىنا جانە ۇستازدارىنا العىس ايتامىن»،- دەپ اتاپ ءوتتى.

ءباسپاسوز كونفەرەنتسياعا قاتىسقان باقىتجاننىڭ سوزىنشە، سول كۇنى ول كوشەدە كولىكتە وتىرعان. كەنەتتەن كورشىنىڭ اراي ەسىمدى قىزى ۇيلەرىندە ءورت شىققانىن ايتىپ، كومەك سۇراپ كەلگەن. «قاراسام ءۇيدىڭ ىشىندە ءورت شىعىپ، جان-جاعى جانىپ جاتىر ەكەن.    تۇتىنگە تۇنشىققان با، ايتەۋىر ەسىنەن تانۋعا شاق قالعان كىشكەنتايىن دەرەۋ قولىما كوتەرىپ الدىم دا، ۇلكەنىن جەتەكتەپ الىپ شىقتىم. سىرتقا شىققان سوڭ سۋ بەرىپ، كومەكتەسۋگە تىرىستىم. كورشىنىڭ ۇيىنە الىپ باردىم. انام قۇتقارۋ قىزمەتىنە حابارلاستى. كەيىن اتا-انالارى دا كەلدى»،- دەدى ءجاسوسپىرىم. مەكتەپتە وتكەن دايىندىق ساباقتارىندا العان بىلىمدەرى باقىتجاننىڭ الدىنان شىقتى. ال، باقىتجاننىڭ سىنىپ جەتەكشىسى بولسا ونىڭ ۇيىندە ءتورت اعايىندى، 13 جاستاعى وقۋشىسى ءۇيدىڭ كەنجەسى ەكەنىن ايتتى. سىنىپتا جۇرگەندە دە تەك جاقسى قىرىمەن تانىلعان. 

بۇگىن جاس قۇتقارۋشىنى تج دەپارتامەنتىنىڭ باستىعى  العىس حاتپەن ماراپاتتاپ، ەستەلىككە كىتاپ سىيلادى. سونداي-اق، دەپارتامەنت باستىعى نۇربولات دەربيسوۆ جاس باتىردى ۆەدومستۆولىق ناگرادامەن جانە ارنايى العىس حاتپەن ماراپاتتاۋ ءۇشىن ىشكى ىستەر مينيسترلىگىنە جانە قالالىق اكىمدىككە ۇسىنىس جولدانعانىن جەتكىزدى.

سوڭعى جاڭالىقتار

باسىلىم باسشىلارى - ەركىن قىدىر (1962)

باسىلىم باسشىلارى • كەشە

ۇقساس جاڭالىقتار