تۇتاستىق پەن تاتۋلىق – ەڭ ۇلى قۇندىلىقتار
سارسەنبى, 2 مامىر 2012 8:03
ۇلتتىق مەرەكە-مەيرامدارىمىزدىڭ دا قايتا تۇلەگەندىگىنە قاناعات سەزىمىمەن قاراۋمەن بىرگە, “كونە ءراسىم” رەتىندە بىرقاتار ەلدەر مەرەكە تىزىمىنەن الىپ تاستاعان 1 مامىر مەرەكەسىن بىرنەشە جىلدان بەرى قازاقستاندىق اعايىندار ءوز ىشىندەگى ۇلتارالىق تاتۋلىق پەن دوستىق, باۋىرلاستىق, ىنتىماق مەرەكەسى رەتىندە سالتاناتتى تۇردە تويلايتىن بولعاندىعى وسى ەل مەملەكەتى مەن باسشىلارىنىڭ سىندارلى ساياساتىنىڭ جانە ءبىر وڭتايلى جاعى دەپ بىلەمىن. دالىرەك ايتقاندا, قازاقستاننىڭ ءبىر ەلدە ءومىر سۇرەتىن كوپ ۇلت وكىلدەرىنىڭ مادەنيەتىن, ونەرىن, ءتىلىن, ءدىنىن, ءداستۇرىن دامىتۋعا ءادىل قاراۋ ساياساتى كوپتەگەن ەلدەرگە ۇلگى-ونەگە بولارى انىق.
سارسەنبى, 2 مامىر 2012 8:03
ۇلتتىق مەرەكە-مەيرامدارىمىزدىڭ دا قايتا تۇلەگەندىگىنە قاناعات سەزىمىمەن قاراۋمەن بىرگە, “كونە ءراسىم” رەتىندە بىرقاتار ەلدەر مەرەكە تىزىمىنەن الىپ تاستاعان 1 مامىر مەرەكەسىن بىرنەشە جىلدان بەرى قازاقستاندىق اعايىندار ءوز ىشىندەگى ۇلتارالىق تاتۋلىق پەن دوستىق, باۋىرلاستىق, ىنتىماق مەرەكەسى رەتىندە سالتاناتتى تۇردە تويلايتىن بولعاندىعى وسى ەل مەملەكەتى مەن باسشىلارىنىڭ سىندارلى ساياساتىنىڭ جانە ءبىر وڭتايلى جاعى دەپ بىلەمىن. دالىرەك ايتقاندا, قازاقستاننىڭ ءبىر ەلدە ءومىر سۇرەتىن كوپ ۇلت وكىلدەرىنىڭ مادەنيەتىن, ونەرىن, ءتىلىن, ءدىنىن, ءداستۇرىن دامىتۋعا ءادىل قاراۋ ساياساتى كوپتەگەن ەلدەرگە ۇلگى-ونەگە بولارى انىق.
ال 1 مامىر كۇنىنە كەلسەك, ول قازاقستاندا ۇلتتىق, ءدىني الالىعى جوق, بارلىق ۇلت وكىلدەرى سول كۇنى جاپپاي ورتاق, قۋانىشقا بولەنىپ, ءبىر-بىرىنە كىربىڭمەن ەمەس, شات كۇلكىمەن قارايتىن ىنتىماق تويىنا اينالعانىن كورىپ, ءبىلىپ وتىرمىز. بۇل كۇنى قازاقتار عانا قاۋقىلداسىپ, كورىسىپ, قۇشاقتاسىپ امانداسپايدى, بارلىق ۇلتتار جۇزدەسىپ, ديدارلاسىپ, بىرىگىپ ءماز-مەيرام توي جاسايدى. بىرىمەن-ءبىرى تەڭ سانالىپ, ءبىرىن-ءبىرى سىيلاپ, قۇرمەتتەپ, بۇرىن ءبىر كورگەن بولسا, ەندى ءبىلىسىپ, بىلىسكەن بولسا, تانىسىپ, تامىرلاسىپ, دوستاسىپ مارە-سارە بولادى. قانداي جاراسىمدىلىق.
اللا ساقتاسىن, قايسىبىر ەلدەردە بۇل كۇنى ىنتىماق مەرەكەسىن اتاپ وتكەندى بىلاي قويىپ, ۇلتىمەن, دىنىمەن, ءتىپتى ءبىر ءدىننىڭ ىشىندە بىرنەشە اعىمعا ءبولىنىپ, جاق-جاق بولىپ جانجالداسىپ, قىرقىسىپ جاتقانىنا قاراپ, «تىزگىندى تەڭ ۇستاپ» دۇرىس ساياسات جۇرگىزە الماعان, ءوزىنىڭ سىڭارجاقتىعىنا حالقىنىڭ مۇددەسىن قۇربان ەتكەن مەملەكەتىنە, كوشباسشىلارىنا نالىپ, رەنجيسىڭ. ءبىر وتباسىنداعى بالالار دا ءبىتىم-جاراتىلىسى, ءمىنەز-قۇلقى, اقىل-ويى, بويى جاعىنان دا ءار ءتۇرلى بولادى ەمەس پە. بىراق, جامان بولسىن, جاقسى بولسىن, «ىشتەن شىققان شۇبار جىلان» دەپ اتا-اناسى سولاردىڭ ءبارىن بىردەي كورەدى, بارىنە بىردەي جانى اشىپ, قايىرىم, قامقورلىق جاساعىسى كەلەدى. ءويتپەيىنشە, ارتىق كورەتىن بالاسى ەركەلەپ, ەمەكسىپ كەتۋى مۇمكىن دە, ءسال تومەنشىكتەۋ ساناعان بالاسى جاتباۋىر بولىپ, ءتىپتى ارتىق كورىلەتىن تۋىسقانىمەن ءوشتەسىپ, جاۋلاسىپ كەتۋى دە ىقتيمال. «ىشتەي قانشا جەك كورسەڭ دە ءوز باۋىر ەتىڭ – بالاڭ ەمەس پە, قۋانىپ قالسىن, باسىنان سيپاي سال», دەپ قازاقتىڭ قاريالارى اقىل ايتاتىن.
ءبىر وتاننىڭ ىشىندەگى ۇلتتار دا سول ءبىر وتباسىنداعى بالالارداي. مەملەكەت پەن ۇكىمەت, ونىڭ باسشىلارى سول ۇلتتار ءۇشىن بىرەۋى اكە, ەكىنشىسى شەشە دەگەن ءسوز. ونىڭ قايىرىمدىلىعى, قاتالدىعى دا بارىنە ورتاق, تەڭ بولسا, ەل ءىشى ءىرىپ, ۇلتارالىق ارازدىق تۋىندامايتىندىعىن قازاقستاننىڭ جيىرما جىلدىق تاريحي تاجىريبەلەرى دالەلدەپ بەردى. جوعارىداعى بەينەمەن ايتساق, ءبىر ەلدىڭ ىشىندەگى ءار ۇلت ءبىر وتباسىنداعى كوپ بالا دەگەن ءسوز. ول بالالار ءبىر-ءبىرىن جاقىن تارتىپ, ەرەسەگى كىشىرەكتەرىنە جاناشىرلىق, قايىرىمدىلىق جاساپ, ارقادان قاعىپ مەرەيىن ءوسىرىپ, كىشىلەرى اعالارىن قۇرمەتتەپ, قولقاناتى بولىپ, قولقابىس جاساپ, «حان كوتەرىپ» ءوزارا سىيلاستىقتا بولسا, وتباسىنىڭ ىرىس-بەرەكەسى كەمەلدەنىپ, ول شاڭىراقتاعى ادامدار دا راحاتتا تۇرىپ, باقىتقا كەنەلەتىنى سەكىلدى, ءبىر وتانداعى سىيلاستىقتى ارداق تۇتقان كوپ ۇلت حالىقتارىنىڭ شىرقى بۇزىلماي, كۇن سايىن قۇت-بەرەكە ۇيىسىپ, ەلى وركەندەپ, ونىڭ حالىقارالىق بەدەلى ارتا بەرەدى ەكەن. بۇل دا قازاقستاننىڭ عيبرات, تاعىلىمى.
ۇلتتىق بىرلىككە زارەدەي بولسا دا نۇقسان كەلتىرەتىن ءجايتتەر, اسىرەسە, ادام بالاسىنىڭ «جاندى جەرى» – ءدىن, ءتىل, ۇلتتىق سالت-ءداستۇر تۇرعىسىندا جاتسىنۋ, كەمسىتۋ, كەلەمەجدەۋ ارەكەتى بايقالسا, ول توڭىرەكتەن بەرەكە كەتەتىنىن اڭعارىپ ءجۇرمىز. وسى جاعدايدان اقىلى بار ءاربىر ادامنىڭ اباي بولعانى لازىم.
بۇل تۇرعىدا ءادىل زاڭ بولعانى, زاڭعا قايشى كورىنىستەرگە ءاردايىم تويتارىس بەرىلىپ وتىرعانى ابزال. ءتارتىپ, يمان, ينابات, قۋانىش, شاتتىق بار جەرگە قۇت-بەرەكە ۇيىرىلەدى. مىنە, مىنا بۇگىنگى باقىت – سولاردىڭ شاراپاتىمەن قولعا كەلىپ قونعان باقىت. مەن ءوز باسىم تۇرىپ جاتقان استانا قالاسىنىڭ ءبىر شەتى قاراوتكەل اۋىلى وسى باق پەن باقىتتىڭ كۋاسى. قاراوتكەل تۇرعىندارى ءوزىن دە, وزگەنى دە سىيلاۋمەن بىرگە, ءوزارا وتە-موتە تاتۋ تۇرادى. سوندىعىنان بولار, ءبىر جاعادان باس, ءبىر جەڭنەن قول شىعارىپ كۇشىن بىرىكتىرگەن تۇرعىندارى ۇرەيسىز, بولاشاعىنا نىق سەنىممەن قاراپ العا باسىپ كەلەدى. حالقىڭنىڭ ۇرەيسىز, الاڭسىز ءوسىپ-ءونىپ كەلە جاتقانىنا شۇكىرشىلىك ەتەسىڭ.
ۇزبەن قۇرمانباي.
استانا.
