ۆەدومستۆو بۇعان دەيىن جاساندى ينتەللەكت جانە تسيفرلىق دامۋ مينيسترلىگى, كولىك مينيسترلىگى, استانا قالاسىنىڭ اكىمدىگى, سونداي-اق inDrive جانە Yandex Qazaqstan كومپانيالارى اراسىندا پيلوتسىز تاكسي جوبالارىن ىسكە اسىرۋ جونىندە ەكى مەموراندۋمعا قول قويىلعانىن ەسكە سالدى.
مينيسترلىكتىڭ مالىمەتىنشە, پيلوتتىق جوبا ءۇش جىلعا ەسەپتەلگەن جانە كەزەڭ-كەزەڭىمەن جۇزەگە اسىرىلادى. ءبىرىنشى كەزەڭدە ارنايى سىناق پوليگونىندا تەحنولوگيالىق شەشىمدەردى پىسىقتاۋ, سونداي-اق مارشرۋتتار مەن ينفراقۇرىلىم پارامەترلەرىن دايىنداۋ جانە تەكسەرۋ جوسپارلانىپ وتىر.
كەلەسى كەزەڭدە استانا جانە الماتى قالالارىندا الدىن الا كەلىسىلگەن مارشرۋتتار بويىنشا پيلوتسىز كولىك قۇرالدارىن قالادا پايدالانۋعا كەزەڭ-كەزەڭىمەن رۇقسات بەرۋ كوزدەلگەن. بۇل پروتسەسس تۇراقتى باقىلاۋ جانە مونيتورينگ جاعدايىندا جۇرگىزىلەدى.
تاكسي قىزمەتى: سالىق كودەكسى جۇرگىزۋشىلەرگە قالاي اسەر ەتەدى؟
جول بەلگىلەرىن ورناتۋ, جول تاڭبالارىن سىزۋ, جولاۋشىلاردى وتىرعىزۋ جانە ءتۇسىرۋ ايماقتارىن ۇيىمداستىرۋدى قامتيتىن ينفراقۇرىلىمدىق دايىندىق 2026 جىلدىڭ I توقسانىنا جوسپارلانعان. الايدا قازىرگى تاڭدا استانادا پيلوتسىز كولىكتەردى سىناقتان وتكىزەتىن ناقتى كوشە-جول جەلىسىنىڭ ۋچاسكەلەرى ءالى بەكىتىلمەگەن.
بۇل كەزەڭدە پيلوتسىز اۆتوموبيلدەردىڭ ناقتى مودەلدەرى مەن كونفيگۋراتسيالارى انىقتالعان جوق. جولاۋشىلار سىيىمدىلىعى مەن قىزمەت كورسەتۋ فورماتى پيلوتتىق جوبانى دايىنداۋ جانە ەنگىزۋ بارىسىندا ناقتىلانادى.
پيلوتسىز تاكسيمەن ءجۇرۋ قۇنىن قىزمەت وپەراتورلارى نارىقتىق جاعدايلاردى, پايدالانۋ بارىسىنداعى ەكونوميكالىق پارامەترلەردى, تەحنولوگيالار مەن ينفراقۇرىلىمعا كەتەتىن شىعىنداردى, سونداي-اق قولدانىستاعى زاڭناما تالاپتارىن ەسكەرە وتىرىپ, وزدەرى بەلگىلەيدى.
