ماحامبەت اتىنداعى اكادەميالىق قازاق دراما تەاترىنىڭ ارتىستەرى اقىننىڭ ايبالتا جىرلارىن ناقىشىنا كەلتىرىپ وقىسا, «نارىن» حالىق اسپاپتار وركەسترى كۇيلەرىن كۇمبىرلەتتى. ەڭ باستى جاڭالىق – اقىن مۇراسىن قاستەرلەپ, ناسيحاتتاۋ ىسىنە ۇلەس قوسىپ جۇرگەن ونەر قايراتكەرلەرىنە ماحامبەت اتىنداعى رەسپۋبليكالىق سىيلىق تابىستالدى.
وبلىس اكىمىنىڭ ورىنباسارى الىبەك ناۋتيەۆ سوڭعى رەت بۇل سىيلىق 2003 جىلى يۋنەسكو شەڭبەرىندە تويلانعان ماحامبەت وتەمىس ۇلىنىڭ 200 جىلدىعىنا وراي بەرىلگەنىن اتاپ ءوتتى. ودان بەرگى ۋاقىتتا دا ماحامبەت قۇبىلىسىنا بويلاپ, تەرەڭنەن وي قوزعاعان تۋىندىلار جارىق كوردى. سىيلىق تاعايىنداۋ جونىندەگى كوميسسيا شەشىمىمەن كوركەم جانە دەرەكتى فيلمدەر اراسىنان «ماحامبەت» تولىق مەتراجدى كوركەم ءفيلمى ءۇشىن اقىن, قوعام قايراتكەرى, قازاقستاننىڭ حالىق جازۋشىسى, مەملەكەتتىك سىيلىقتاردىڭ لاۋرەاتى, قازاقستاننىڭ ەڭبەك ەرى ولجاس سۇلەيمەنوۆ, فيلم رەجيسسەرى, قازاقستاننىڭ ەڭبەك سىڭىرگەن قايراتكەرى سلامبەك تاۋەكەل, باستى رولدە ويناعان تانىمال اكتەر, قازاقستاننىڭ ەڭبەك سىڭىرگەن قايراتكەرى بەرىك ايتجانوۆ ماراپاتتالدى. «مىنگەنى يساتايدىڭ اقتابان-اي!» اتتى دەرەكتى ءفيلمى ءۇشىن رەجيسسەر امانگەلدى تاجىباەۆ, «ماحامبەت» دەرەكتى ءفيلمى ءۇشىن رەجيسسەر جاڭابەك جەتىرۋوۆ سىيلىققا لايىق دەپ تانىلدى.
«ساز» اتالىمى بويىنشا حالىق ءارتىسى عافيز ەسىموۆ, كۇيشى-دومبىراشى, قازاقستاننىڭ ەڭبەك سىڭىرگەن ءارتىسى ايگۇل ۇلكەنباەۆا, ع.قۇرمانعاليەۆ اتىنداعى وبلىستىق فيلارمونيانىڭ داۋلەتكەرەي اتىنداعى قازاق حالىق اسپاپتارى وركەسترىنىڭ ديريجەرى, «دارىن» مەملەكەتتىك جاستار سىيلىعىنىڭ يەگەرى ەركىن نۇرىمبەتوۆ, قازاقستاننىڭ ەڭبەك سىڭىرگەن قايراتكەرى, "پاراسات" وردەنىنىڭ يەگەرى, اتىراۋ وبلىسىنىڭ قۇرمەتتى ازاماتى ايتقالي جايىموۆ «ماحامبەت سىيلىعىنا» يە بولدى. «ساۋلەت» اتالىمىندا اتىراۋ قالاسىنداعى «يساتاي-ماحامبەت» ەسكەرتكىشتەر كەشەنىن سالعانى ءۇشىن حالىقارالىق ساۋلەت اكادەمياسىنىڭ اكادەميگى, قر ەڭبەك سىڭىرگەن قايراتكەرى, پروفەسسور ساماتبەك بوكەباي, «ەرەن ەڭبەگى» ءۇشىن مەدالىنىڭ يەگەرى, ارحيتەكتور باقتىباي تايتاليەۆ ماراپاتتالدى. «پروزا» اتالىمىندا «يساتاي-ماحامبەت كوتەرىلىسى» جانە «ماحامبەت» اتتى كوركەم تۋىندىسى ءۇشىن جازۋشى, مەملەكەتتىك سىيلىقتىڭ يەگەرى انەس ساراي, جازۋشى,مەملەكەتتىك سىيلىقتىڭ يەگەرى قاجىعالي مۇحانبەتقاليەۆ, «ماحامبەت كىتاپحاناسى» سەرياسىمەن 20 تومدىق كىتاپتى جانە «ماحامبەت ەلى» اتتى كىتاپ-البومىن ءۇش تىلدە دايىنداۋدا جالپى رەداكتسياسىن باسقارعان, پرەزيدەنت سىيلىعىنىڭ لاۋرەاتى مەرەكە قۇلكەنوۆ, «ماحامبەت» اتتى فيلوسوفيالىق تولعاۋ كىتابى ءۇشىن جازۋشى, «دارىن» مەملەكەتتىك جاستار سىيلىعىنىڭ, تاۋەلسىز «تارلان» سىيلىعىنىڭ لاۋرەاتى ديدار امانتايعا رەسپۋبليكالىق «ماحامبەت سىيلىعى» تابىس ەتىلدى.
«ماحامبەت» اتتى گرافيكالىق سۋرەتتەر توپتاماسى ءۇشىن سۋرەتشى تىلەك حالين, عىلىمي-زەرتتەۋ ەڭبەكتەرى ءۇشىن قازاقستان جۋرناليستەر وداعى سىيلىعىنىڭ يەگەرى تىلەكقابىل بورانعالي ۇلى, پروفەسسور كاريما ساحارباەۆا, ەۋرازيا ۋنيۆەرسيتەتىنىڭ دوتسەنتى, بەلگىلى عالىم, اقىن وڭايگۇل تۇرجان, ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ پروفەسسورى, اكادەميك امانگەلدى شامعونوۆتار دا اتالعان سىيلىققا لايىق دەپ تانىلدى.
«پوەزيا» وتانشىلدىققا, باتىرلىق رۋحقا, ۇلتتىق پاتريوتيزمگە ارنالعان كوركەم شىعارمالارى ءۇشىن اقىن, مەملەكەتتىك سىيلىقتىڭ لاۋرەاتى, جازۋشىلار وداعى باسقارما توراعاسى ۇلىقبەك ەسداۋلەت, مەملەكەتتىك سىيلىق لاۋرەاتى اقۇشتاپ باقتىگەرەەۆا, رەسپۋبليكالىق «جۇلدىز» جۋرنالىنىڭ باس رەداكتورى عالىم جايلىباي, ت.ايبەرگەنوۆ اتىنداعى سىيلىقتىڭ لاۋرەاتى سۆەتقالي نۇرجان, حالىقارالىق «الاش» ادەبي سىيلىعىنىڭ يەگەرى جاركەن بودەش, شەشەنستان مەملەكەتتىك سىيلىعىنىڭ لاۋرەاتى, «ماحامبەت مايدانى» ولەڭدەر كىتابىنىڭ اۆتورى رافاەل نيازبەكوۆ, حالىقارالىق «شابىت» فەستيۆالىنىڭ لاۋرەاتى, «فاريزا جۇلدىزدارى» جاس اقىندار كلۋبىنىڭ جەتەكشىسى ءاليا داۋلەتباەۆا «ماحامبەت سىيلىعىمەن» ماراپاتتالدى. «ناسيحات» اتالىمى بويىنشا ماحامبەت شىعارماشىلىعىن ناسيحاتتاۋداعى ۇيىمداستىرۋشىلىق ەڭبەگى ءۇشىن ماحامبەت اتىنداعى اكادەميالىق قازاق دراما تەاترىنىڭ ديرەكتورى بەرىك جامەنوۆ, ارداگەر ۇستاز, ءبىلىم بەرۋ ءىسىنىڭ ۇزدىگى اتالىق بەيسەن سىيلىق يەگەرلەرى اتاندى.
- ءابىش كەكىلباەۆ ماحامبەت تۋرالى جازعان «شاندوز» اتتى ەڭبەگىندە ونىڭ «تابيعاتتان قالاعان ۋاقىتىندا تابىلا بەرمەيتىن اسىلداي اسا سيرەك كەزدەسەتىن قۇبىلىس» ەكەندىگىن ايتا كەلىپ: «ونداي قۇبىلىس تەك قازاق تۇگىل, بارشا ادامزاتتىڭ عۇمىرىندا دا كوپ كەزدەسە بەرمەگەن», - دەپ جازعان ەدى. ال ونداي تۇلعانى زەرتتەپ بولۋعا ءبىر عاسىر قايدان جەتسىن! اعىلشىندار وسىدان ءتورت جارىم عاسىر بۇرىنعى شەكسپيردى ءالى زەرتتەپ بىتكەن جوقپىز دەيدى. شەكسپير تۋرالى كۇللى الەمنىڭ عالىمدارى 10 مىڭنان استام زەرتتەۋ جاساپتى. ءبىز زەرتتەۋلەر اۋقىمىنا وسىنداي دەڭگەيدەگى سالىستىرۋلار ارقىلى قاراۋىمىز كەرەك,-دەيدى ماحامبەتتانۋشى عالىم, اقىن وڭايگۇل تۇرجان. الداسپان اقىن ارمانداپ كەتكەن ازاتتىق تاڭىندا ەلدىكتى جىر ەتكەن ءالى تالاي تۋىندى جازىلارى انىق.
باقىتگۇل باباش,
«ەگەمەن قازاقستان»
اتىراۋ
