تاياۋدا ىستامبۇلدا حالىقارالىق بوكس اسسوتسياتسيانىڭ (AIBA) جيىنى ءوتىپ, ۇيىمعا قاتىستى بىرقاتار ماسەلەلەر تالقىلانعان-دى. ءىس-شارادا ۇيىمعا كىرەتىن ۇلتتىق بوكس فەدەراتسيالارىنىڭ اراسىندا ىرىكتى سالىپ, AIBA-نىڭ ابىرويىنا نۇقسان كەلتىرگەن حاتتى تەكسەرۋ ماسەلەسى قارالعان.
حالىقارالىق بوكس اسسوتسياتسيانىڭ مالىمەتىنە سۇيەنسەك, حوك-كە حات جازعان قازاقستان ازاماتتارى ەكەن. جيىندا وسى ماسەلەنى تۇبەگەيلى زەرتتەپ, شارا قابىلداۋ قاجەتتىگى ايتىلعان.
ۇيىمنىڭ رەسمي سايتتارىندا حالىقارالىق وليمپيادا كوميتەتىنە (IOC) جازىلعان حاتتىڭ ۇلگىسىن جاريالادى. وندا بەلسەندى توپ AIBA-نى ايىپتاپ, 2020 جىلعى وليمپيادا ويىندارىنداعى بوكس باسەكەسىن ۇيىمداستىرۋعا ءازىر ەكەنىن مالىمدەگەن. حاتقا ەشكىم قول قويماعان. الايدا AIBA دومالاق ارىزدى جازعان قازاقستاندىقتار دەپ وتىر.
Washington Post گازەتىنىڭ حابارلاۋىنشا, بىلتىر وزبەكستاندىق گافۋر راحيموۆ AIBA پرەزيدەنتى رەتىندە سايلانعالى بەرى IOC پەن AIBA اراسىنداعى قارىم-قاتىناس ۋشىعىپ كەتكەن. ەستەرىڭىزدە بولسا, اتالعان لاۋازىمعا جەرلەسىمىز سەرىك قوناقباەۆ تا تالاسقان بولاتىن.
Washington Post باسىلىمىنىڭ مالىمەتىنە سۇيەنسەك, اقش-تىڭ قارجى مينيسترلىگى گ.راحيموۆتى ەسىرتكى تاسۋمەن, قىلمىس ۇيىمداستىرۋمەن اينالىستى دەپ ايىپتادى. الايدا وزبەكستاندىق بيزنەسمەن ونىڭ ءبارىن جوققا شىعارىپ وتىر.
قازىرگى تاڭدا AIBA 2020 جىلعى وليمپيادا ويىندار ۇيىمداستىرۋعا اتسالىسۋعا تىيىم سالىنعان. ماۋسىمدا IOC-تىڭ كەزەكتى جيىنىندا AIBA-نىڭ بولاشاعىنا قاتىسى شەشىم قابىلدانادى.
The Associated Press اگەنتتىگىنە حابارلاۋىنشا, قازاقستانداعى بوكستىڭ اينالاسىندا جۇرگەن ءبىر ازامات حاتتىڭ شىنايى ەكەنىن ايتقان. الايدا ول ءوزىنىڭ ەسىمىن جاريالاماۋدى سۇراعان ەكەن.
وسى ماسەلەگە قاتىستى «ەگەمەن قازاقستان» گازەتى قازاقستان بوكس فەدەراتسياسىنا حابارلاسقان بولاتىن. فەدەراتسيا وكىلدەرى بۇل ماسەلەدەن حاباردار ەكەنىن ايتىپ, الداعى ۋاقىتتا ارنايى مالىمدەمە جاسايتىنىن جەتكىزدى.
