كەلەلى جيىن كەلەشەككە جول اشادى
سەيسەنبى, 4 قىركۇيەك 2012 7:34
ەلوردادا شەتەلدىك مامانداردىڭ قاتىسۋىمەن ءوتىپ جاتقان قازاقستان كارديوحيرۋرگتەرىنىڭ ءبىرىنشى ۇلتتىق كونگرەسىندە وتاندىق كارديوحيرۋرگيانىڭ وزەكتى ماسەلەلەرى تالقىلانىپ, بۇل ورايدا قول جەتكەن جەتىستىكتەر دە اڭگىمەگە ارقاۋ بولۋدا.
سەيسەنبى, 4 قىركۇيەك 2012 7:34
ەلوردادا شەتەلدىك مامانداردىڭ قاتىسۋىمەن ءوتىپ جاتقان قازاقستان كارديوحيرۋرگتەرىنىڭ ءبىرىنشى ۇلتتىق كونگرەسىندە وتاندىق كارديوحيرۋرگيانىڭ وزەكتى ماسەلەلەرى تالقىلانىپ, بۇل ورايدا قول جەتكەن جەتىستىكتەر دە اڭگىمەگە ارقاۋ بولۋدا.
كونگرەستىڭ اشىلۋ سالتاناتىندا ءسويلەگەن سوزىندە دەنساۋلىق ساقتاۋ ۆيتسە-ءمينيسترى ەرىك ءبايجۇنىسوۆ قازاقستاندىق كارديوحيرۋرگتەردىڭ ءبۇگىندە الەمدىك ستاندارتتار دەڭگەيىندە جۇمىس ىستەپ, قازىردىڭ وزىندە جاساندى جۇرەك قارىنشاسىن اۋىستىرۋ جونىندەگى بىرەگەي جوعارى تەحنولوگيالىق وتالاردى جاساپ جاتقانىن جانە مۇنداي كۇردەلى وتا الەمنىڭ 22 ەلىندە ىسكە اساتىنىن اتاپ كورسەتتى. ۆيتسە-مينيستر سونداي-اق, تامىز ايىندا ەلىمىزدە العاش رەت جۇرەكتى اۋىستىرىپ سالۋ وتاسى ويداعىداي جۇزەگە اسىرىلعانىن حابارلادى.
كونگرەستە تمد مەملەكەتتەرى ءۇشىن مەملەكەتارالىق دونورلار بانكىن قۇرۋ جانە ەۋرازەق اياسىندا مەملەكەتارالىق ينتەرنەت سايتىن اشۋ ماسەلەلەرى كوتەرىلدى. بۇل تمد-نىڭ كارديوحيرۋرگتەرى مەن كارديولوگتارىنىڭ ىنتىماقتاستىعىن نىعايتۋعا جول اشپاق.
وتاندىق كارديوحيرۋرگيانى دامىتۋ, شەتەلدەردەن كەلگەن بىلىكتى ماماندارمەن تاجىريبە الماسۋ ماقساتىندا وتكىزىلىپ وتىرعان بۇل جيىننىڭ ەلىمىزدىڭ كارديوحيرۋرگيا سالاسى ءۇشىن ماڭىزى زور بولماق. الەمنىڭ جەتەكشى ەلدەرىنىڭ ءتاجىريبەلەرىن قولدانا وتىرىپ, وتا جاساۋدى قولعا العان وتاندىق ماماندارىمىز قازىردىڭ وزىندە جەمىستى ەڭبەك ەتۋدە. وعان ەلىمىزدە حالىققا كارديوحيرۋرگيالىق كومەك كورسەتەتىن جۇيەنىڭ بار ەكەنى جانە ونىڭ قاناعاتتانارلىق دەڭگەيدە جۇمىس ىستەپ تۇرعانى دالەل. كارديوحيرۋرگيالىق ۇيىمدار قۇرىلىمىنا سىزعانوۆ اتىنداعى ۇلتتىق عىلىمي حيرۋرگيا ورتالىعى, ۇلتتىق عىلىمي مەديتسينا ورتالىعى, ۇلتتىق عىلىمي
كارديوحيرۋرگيالىق ورتالىق, كارديولوگيا جانە ىشكى اۋرۋلار عىلىمي-زەرتتەۋ ينستيتۋتى, ۇلتتىق پەدياتريا جانە بالالار حيرۋرگياسى ورتالىعى, 10 ايماقتىق كارديوورتالىقتار جانە ەلىمىزدىڭ 10 ايماعىنداعى كوپ بەيىندى اۋرۋحانالار جانىنداعى 11 بولىمشە كىرەدى. سونداي-اق, جاقىن كۇندەردە پاۆلودار قالاسىندا كارديوحيرۋرگيالىق ورتالىق اشىلىپ, حالىققا قىزمەت كورسەتە باستايدى.
رەسمي دەرەكتەر بويىنشا ەلىمىزدە ءجۇرەك قان تامىرلارى اۋرۋلارىمەن اۋىراتىن ادامداردىڭ سانى 1 ميلليون بولسا, جىل سايىن شامامەن 16 مىڭعا جۋىق ادام كارديوحيرۋرگيالىق وتاعا مۇقتاج. سوندىقتان رەسپۋبليكامىزدا كارديولوگيالىق جانە كارديوحيرۋرگيالىق كومەكتىڭ قۇرىلۋىنا زور كوڭىل ءبولىنىپ وتىر. بۇگىندە «سالاماتتى قازاقستان» دەنساۋلىقتى ساقتاۋ مەن دامىتۋدىڭ مەملەكەتتىك باعدارلاماسىنىڭ شەڭبەرىندە مەديتسينانىڭ وسى باعىتىن جەتىلدىرۋ بويىنشا ۇلكەن جۇمىستار اتقارىلۋدا. سونىڭ ەڭ ءبىر نەگىزگىسى – ۇلتتىق مەديتسينالىق حولدينگ بازاسىندا ۇلتتىق عىلىمي كارديوحيرۋرگيالىق ورتالىقتىڭ قۇرىلۋى. بىلتىر عانا ءوز جۇمىسىن باستاعان ورتالىقتا وسى ۋاقىتقا شەيىن 5 مىڭنان اسا ادامعا وتا جاسالدى. بۇگىنگى تاڭدا بۇل كلينيكا ورتالىق ازيا وڭىرىندەگى الەمدىك ساپا ستاندارتتارىنا جاۋاپ بەرەتىن الدىڭعى قاتارلى كارديوحيرۋرگيالىق ورتالىق اتاعىن الدى. سوندىقتان جۇرەك دەرتىن ەمدەۋ بارىسىنداعى يمپلانتاتسيالىق, ترانسپلانتاتسيالىق العاشقى وتالاردىڭ وسىندا جاسالۋى كەزدەيسوقتىق ەمەس.
جيىن بارىسىندا كارديولوگيانىڭ, كارديوحيرۋرگيانىڭ, ينتەرۆەنتسيالىق كارديولوگيانىڭ, اريتمولوگيانىڭ, يادرولىق مەديتسينانىڭ جانە بيبىلىك ءىستىڭ نەگىزگى باعىتتارى بويىنشا پلەنارلىق وتىرىستار وتكىزىلدى. بۇعان ۆ.دەمبيتسكي (اقش), يا.گۋممەرت (گەرمانيا), يا.پيرك (چەح رەسپۋبليكاسى), س.جوشىباەۆ (قازاقستان) سىندى ءىرى كارديوحيرۋرگ ماماندار جەتەكشىلىك ەتتى. تاعى ءبىر ايتا كەتەتىن نارسە, كونگرەسس ءالى اياقتالعان جوق. ونىڭ جۇمىسى 6 قىركۇيەككە دەيىن جالعاسىپ, كونگرەسس شەڭبەرىندە ەلورداداعى جاڭادان اشىلعان ۇعكو بازاسىندا ەۋروپالىق كارديو-تروكالدى حيرۋرگيا قاۋىمداستىعىنىڭ (EACTS) كومەگىمەن شەبەرلىك سىنىپتارى ۇيىمداستىرىلادى.
ايگۇل سەيىلوۆا,
«ەگەمەن قازاقستان».
