مەملەكەتتىك قىزمەتشىلەر جۇمىس ۋاقىتىنان تىس ىستەلەتىن جۇمىسقا, دەمالىس جانە مەرەكە كۇندەرiندەگى جۇمىسقا قازاقستان رەسپۋبليكاسىنىڭ ەڭبەك زاڭناماسىندا كوزدەلگەن تارتىپپەن عانا تارتىلۋى ءتيىس.
- وتكەن جىلدىڭ قازان ايىندا اگەنتتىك تاپسىرماسى نەگىزىندە وبلىس اۋماعىنداعى مەملەكەتتىك ورگاندار اراسىندا جۇرگىزىلگەن ساۋالناما ناتيجەسى بويىنشا - 2112 مەملەكەتتىك قىزمەتشىنىڭ 513-ءى, ياعني 24,3%-ى جۇمىس ۋاقىتى اياقتالعاننان كەيىن دە جۇمىس ورنىندا كىدىرەتىنىن كورسەتتى, - دەيدى جاقسات مۇرات ۇلى.
بۇگىندە دەپارتامەنت مەملەكەتتىك قىزمەتشىلەردىڭ جۇمىستان تىس ۋاقىتتا جۇمىس ورنىندا نەگىزسىز قالۋ فاكتىلەرىن انىقتاۋ جانە ولاردى بولدىرماۋ بويىنشا قوعامدىق ۇيىمداردىڭ قاتىسۋلارىمەن بىرلەسكەن ءىس-شارالار وتكىزۋدە. شارا بارىسىندا دەپارتامەنت قىزمەتكەرلەرى 117 مەملەكەتتىك ورگانعا بارىپ تەكسەرىپ, ناتيجەسىندە مەملەكەتتىك قىزمەتشىنىڭ جۇمىس ۋاقىتىنان كەيىن جۇمىس ورنىندا وتىرعان 22 فاكتىنى انىقتاعان. ولاردىڭ 16-سى ءوز لاۋازىمدىق مىندەتىن مەملەكەتتىك ورگان باسشىسىنىڭ ۇستەمە جۇمىسقا تارتۋ تۋرالى ءتيىستى بۇيرىعىنا سايكەس اتقارعان ەكەن. ال 6 وقيعادا ۇستەمە جۇمىستارعا تارتۋ تۋرالى جۇمىس بەرۋشىنىڭ اكتىسى مەن جۇمىسكەردىڭ جازباشا كەلىسىمى بولماعان. اقىسىز ارتىق قىزمەت ەتىپ وتىرعان 5 قىزمەتكەر - ورال قالاسى تۇرعىن ءۇي-كوممۋنالدىق شارۋاشىلىعى جانە تۇرعىن ءۇي ينسپەكتسياسى ءبولىمى ماماندارى بولسا, 1-ءى – باتىس قازاقستان وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنان ەكەن.
وسى تەكسەرىس نەگىزىندە كىنالى لاۋازىمدى تۇلعالار تارتىپتىك جازاعا تارتىلدى.
سونداي-اق, مەملەكەتتىك قىزمەتشىلەردىڭ جۇمىسقا كەلۋ, جۇمىستان كەتۋ ۋاقىتى دا قاتاڭ باقىلاۋدا. دەپارتامەنت جەرگىلىكتى اتقارۋشى جانە اۋماقتىق مەملەكەتتىك ورگانداردىڭ مەملەكەتتىك ورگان عيماراتىنا ورناتىلعان كىرىپ-شىعۋدى باقىلايتىن سكۋد جۇيەسىنەن الىنعان دەرەكتەردى زەردەلەپ, وتكەن جىلدىڭ جەلتوقسان ايىندا بقو قازىناشىلىق دەپارتامەنتىنىڭ, بقو ستاتيستيكا دەپارتامەنتىنىڭ, بقو اۋىلشارۋاشىلىعى باسقارماسىنىڭ كەيبىر مەملەكەتتىك اكىمشىلىك قىزمەتشىلەرى جۇمىس ۋاقىتى اياقتالعاننان كەيىن جۇمىس ورىندارىندا بولعانى بەلگىلى بولدى. وسىعان وراي مەملەكەتتىك قىزمەتشىلەردىڭ قۇقىقتارىن قورعاۋ ماقساتىندا قازاقستان رەسپۋبليكاسىنىڭ ەڭبەك كودەكسىنىڭ 77 جانە 78 باپتارىنىڭ ساقتالۋى ماسەلەسى بويىنشا سايكەسىنشە تەكسەرۋ ۇيىمداستىرۋ تۋرالى باتىس قازاقستان وبلىسىنىڭ ەڭبەك ينسپەكتسياسىنا ۇسىنىس جولدانىپ, قازىر اتالعان مەملەكەتتىك ورگانداردى تەكسەرۋ جۇرگىزىلۋدە.
ءدال وسىنداي تەكسەرىستەر بۇدان بۇرىن دا ۇيىمداستىرىلىپ, قازاقستان رەسپۋبليكاسى ەڭبەك كودەكسىنىڭ ۇستەمە جۇمىستارعا اقى تولەۋ تالاپتارىن ساقتالماعانى ءۇشىن اقجايىق اۋدانى اكىمى اپپاراتىنىڭ جانە اقجايىق اۋدانىنىڭ تۇرعىن ءۇي كوممۋنالدىق شارۋاشىلىعى, جولاۋشىلار كولىگى جانە اۆتوموبيل جولدارى ءبولىمىنىڭ ەكى لاۋازىمدىق تۇلعاسىنا 30 اەك كولەمىندە ايىپپۇل سالىنعان ەدى.
- مەملەكەتتىك قىزمەتشىلەردىڭ جۇمىس ۋاقىتىنان كەيىن جۇمىس ورنىندا نەگىزسىز كىدىرۋىن بولدىرماۋ ماقساتىندا باتىس قازاقستان وبلىسىنىڭ مەملەكەتتىك ورگاندارىندا مەملەكەتتىك قىزمەتشىلەردىڭ جۇمىس كومپيۋتەرىنە جۇمىس ۋاقىتى اياقتالعان سوڭ اۆتوماتتى تۇردە ءسونىپ قالاتىن جۇيە ورناتىپ جاتىرمىز, - دەيدى جاقسات مۇرات ۇلى.
بۇگىندە وڭىردە وبلىستىق دەڭگەيدەگى 25 جەرگىلىكتى اتقارۋشى مەملەكەتتىك ورگاننىڭ 22-سىندە وسى باعدارلاما ىسكە قوسىلىپ, 88%-دى قۇراعان. ال ورال قالالىق, اۋداندىق جانە سەلولىق دەڭگەيدەگى 306 جەرگىلىكتى اتقارۋشى مەملەكەتتىك ورگاندا بۇل كورسەتكىش 43%-دى قۇراپ وتىر. ياعني تەك 133 بۇل جۇيەگە قوسىلعان.
قازبەك قۇتتىمۇرات ۇلى,
«ەگەمەن قازاقستان»
