رەفەرەندۋم ۋچاسكەلەرىنىڭ ارقايسىسى قاجەتتى قۇرالدارمەن, ءار ازامات ءوز قالاۋى بويىنشا جاڭا كونستيتۋتسيا جوباسىمەن تانىسا الاتىن اقپاراتتىق ستەندتەرمەن جابدىقتالدى.
«وڭىردە شامامەن 500 مىڭداي ادام داۋىس بەرۋ قۇقىعىنا يە. تىزىمدە 26 مىڭعا جۋىق مۇمكىندىگى شەكتەۋلى جان تىركەلگەن بولسا, ولاردىڭ ىشىندە 3 200 ادامعا ەرەكشە جاعداي قاجەت. ارباعا تاڭىلعاندار – №305, كورۋ قابىلەتى ناشار داۋىس بەرۋشىلەر – №365, ال ەستۋ قابىلەتى ناشار داۋىس بەرۋشىلەر №293 ۋچاسكەدە داۋىس بەرە الادى. ۋچاسكەلەردىڭ باسىم بولىگى پاندۋسپەن جابدىقتالىپ, ارنايى باعىتتاعىشتار ورناتىلعان. سونداي-اق كورۋ قابىلەتى بۇزىلعان سايلاۋشىلاردىڭ داۋىس بەرۋگە ءوز بەتىنشە قاتىسۋىنا مۇمكىندىك بەرەتىن برايل شريفتىمەن جازىلعان 520 بيۋللەتەن ترافارەتى دايىن تۇر. تۇرعىندار تاڭەرتەڭنەن بەلسەندىلىك تانىتىپ جاتىر», دەپ اتاپ ءوتتى وبلىستىق اۋماقتىق رەفەرەندۋم كوميسسياسىنىڭ توراعاسى گۇلنار امانجولوۆا.
قازاقستاننىڭ ەڭبەك ەرى, «تاۋەلسىز قازاقستاننىڭ حالىق باتىرلارى» قوعامدىق بىرلەستىگى وبلىستىق فيليالىنىڭ توراعاسى رىشات امىرەنوۆ ەكىباستۇز قالاسىنداعى №373 ۋچاسكەگە العاشقىلاردىڭ ءبىرى بولىپ كەلدى.
«كومىر ونەركاسىبىندە 38 جىل ەڭبەك ەتتىم. ادال ەڭبەك ماڭىزدى. اتا زاڭىمىز نەگىزىندە ادام جانە ادامي قۇندىلىقتار, بيلىك تارماقتارىنىڭ تەڭگەرىمى, زاڭ ۇستەمدىگى مەن الەۋمەتتىك ادىلەتتىلىك قاعيداتتارى جاتىر. ءبىز ورتا جاستان اسىپ, اقساقالدىق جاسقا جەتىپ قالدىق. قوعامنىڭ ەندىگى كىلتى – بالالارىمىزدا. ال كونستيتۋتسيا ولارعا قىزمەت ەتۋى كەرەك. سوندىقتان بۇگىن ءوز تاڭداۋىمدى جاساۋعا كەلدىم», دەيدى ول.
رىشات باباي ۇلىنىڭ ۇل-قىزدارى دا كومىر ونەركاسىبىندە قىزمەت ەتىپ ءجۇر. ولاردىڭ اراسىندا مەحانيك, بۇرعىلاۋشى, ماركشەيدەر, ەلەكتريك ماماندارى بار. اۋلەتتىڭ سالاداعى جالپى ەڭبەك ءوتىلى 270 جىلدان اسىپ وتىر.
ال تاڭداۋلارىن جاساعان ەگىز ارۋ ايمان مەن شولپان امانگەلديەۆالاردىڭ جاسى 20-دا. قوس ارۋ وزبەكستاندا دۇنيەگە كەلىپ, 2018 جىلى وتباسىمەن قازاقستانعا قونىس اۋدارعان. №529 رەفەرەندۋم ۋچاسكەسىندە داۋىس بەرگەن ەگىزدەر قولدارىنداعى بيۋللەتەندەرىن «ەلىمىزدىڭ ەرتەڭى باياندى بولسىن» دەگەن تىلەكپەن جاشىككە سالدى.
اتاپ وتەرلىگى, دەنساۋلىعىنا بايلانىستى ۇيدەن داۋىس بەرۋدى قالاعاندار بۇل كۇنى 12.00-گە دەيىن ءتيىستى رەفەرەندۋم ۋچاسكەسىنە حابارلاسىپ, ءوتىنىش قالدىرا الدى. قالاداعى قوعامدىق كولىكتەر جولاۋشىلاردى تەگىن تاسىمالدادى. سونداي-اق ينۆاتاكسيلەر تەگىن قىزمەت كورسەتتى.
پاۆلودار وبلىسى
