اسكەريلەرمەن اڭگىمە وتكىزگەن تالدىقورعان گارنيزونى اسكەري پوليتسياسى ءبولىمىنىڭ اعا وفيتسەرى, ادىلەت مايورى ەرجان ماديماروۆ ەلىمىزدىڭ اۋماعىندا زاڭمەن تيىم سالىنعان ۇيىمدارعا مۇشە بولۋ «قىلمىستىق كودەكستىڭ» 255, 256, 257, 259, 260 باپتارىنا سايكەس جاۋاپكەرشىلىك جۇكتەيتىنىن ءتۇسىندىردى.
- دەسترۋكتيۆتى ءدىني ۇيىمدار توندىرەتىن قاۋىپ-قاتەر ناشاقورلىقتان كەم تۇسپەيدى. عالىمدار سەكتالىق جينالىس كەزىندە قان قۇرامىنان ءبولىنىپ شىعاتىن ەندورفين گورموندارى ادام اعزاسىنا ەسىرتكى جانە پسيحوتروپتى زاتتىڭ اسەرىمەن بىردەي بولاتىنىن دالەلدەگەن, - دەدى كەزدەسۋدە ادىلەت مايورى ە.ماديماروۆ.
ادىلەت مايورىنىڭ ايتۋىنشا, سەكتاعا جاڭا كىرگەن ادامنىڭ كوزقاراسى وندا ۇزاعىراق بولعاندارعا قاراعاندا مۇلدەم بولەك بولاتىن كورىنەدى. ونىڭ ۇيىمعا تەزىرەك ۇيرەنىپ كەتۋى ءۇشىن باسقا مۇشەلەرى بارىن سالىپ, جاڭا مۇشەنى بارىنشا قولداۋمەن بولادى. مۇنداي قارىم-قاتىناسقا ءزارۋ ادام وزگە قاجەتتىلىكتەرى مەن تىلەكتەرىنەن بىردەن باس تارتىپ, جاڭا ورتاعا تەز بەيىمدەلە باستايدى. وسىلايشا وتباسىنىڭ ورنىن سەكتا الماستىرادى ەكەن.
- جالپى, الەمدەگى سەكتالىق ۇيىمداردىڭ سانىن ءدوپ باسىپ ايتۋ قيىن. امەريكا الەۋمەتتانۋشىلارى ءوز ەلىندەگى سەكتانىڭ سانىن 3 مىڭنان اسىپ جىعىلاتىنىن, ونداعى ادام سانى 11 ملن شاماسىنا جەتكەنىن ايتىپ دابىل قاعۋدا. وكىنىشتىسى سول, قازاقستاندا دا استىرتىن جۇمىس جۇرگىزىپ, قاتارلارىن تولىقتىرىپ جاتقان سەكتالىق ۇيىمدار از ەمەس. الاڭداتارلىعى, ولاردىڭ قۇرامىنا كىرەتىن 2 ملن-عا جۋىق ادام 25 جاسقا دەيىنگى جاستار ەكەنى انىقتالدى. اسىرەسە, ۇلكەن قالالاردا ءداستۇرلى ەمەس ءدىن وكىلدەرى بەلسەندى تۇردە جۇمىس جۇرگىزۋدە. ءبىزدىڭ ەسەبىمىز بويىنشا, الماتى وبلىسىندا اسكەري قىزمەت وتكەرەتىن قىزمەتشىلەر اراسىندا ەكسترەميستىك, تەرروريستىك ۇيىمدارعا قاتىسى بار ادامدار انىقتالمادى, - دە ءيدى الماتى وبلىسىنىڭ قورعانىس ىستەرى جونىندەگى دەپارتامەنتىنىڭ ءباسپاسوز حاتشىسى جانار ءامىرجانوۆا.
قالماحانبەت مۇقامەتقالي,
«ەگەمەن قازاقستان»
الماتى وبلىسى
